Archives

இதழ்: 833 உன் வாயில் துதி புறப்படும்போதே தேவனுடைய வல்லமை புறப்படும்!

யாத்தி:15: 20, 21 ஆரோனின் சகோதரியாகிய மிரியாம் என்னும் தீர்க்கதரிசியானவளும், தன் கையில் தம்புருவை எடுத்துக்கொண்டாள்; சகல ஸ்திரீகளும் தம்புரோடும், நடனத்தோடும் அவளுக்கு பின்னே புறப்பட்டுப்போனார்கள். 

மிரியாம் அவர்களுக்கு  பிரதிவசனமாக; கர்த்தரைப் பாடுங்கள்; அவர் மகிமையாய் வெற்றிசிறந்தார்; குதிரையும் குதிரை வீரனையும் கடலிலே தள்ளினார் என்று பாடினாள்.

 இன்று காலையில் எப்பொழுதும் எழும்புகிற நேரத்தைவிட சிறிது அதிக நேரம் படுத்திருக்க என் சரீரம் ஆசைப்பட்டது. ஆனால் என் வீட்டுத் தோட்டத்தில் உள்ள பறவைகளின் சத்தம் என்னை நிச்சயமாக தூங்க விடவில்லை. எழும்பி சிறிது நேரம் அவைகளை கூர்ந்து கவனித்தேன்.

மழை மேகம் மூடிக்கொண்டிருந்தது. ‘சில்’ என்று வந்த காற்று தென்னை  ஓலைகளை ஊடுருவி சென்றது.  தென்னை மரத்தில் இருந்த காக்கைகளும், கிளிகளும் உற்சாகமாய் குரல் கொடுக்க, சிறிய குருவிகள் உற்சாகமாய் குரல்களை உயர்த்தின! அவைகளை பார்த்து ரசித்துக் கொண்டிருந்த எனக்கு வெட்கம் உண்டாயிற்று! இந்தப் பறவைகள் காலையில் தங்கள்  குரலை உயர்த்தி, தன் சிறு உடம்பையும், சின்னம்சிறு கால்களையும் ஆட்டி,  இறக்கைகளை அடித்து, உற்சாகமாய் தேவனை துதிக்கும்போது நான் ஏன் அப்படி செய்யக்கூடாது என்று சிந்தித்தேன்!

தேவன் எனக்கு கொடுத்திருக்கிற ஜீவன், சுகம், பெலன் இவற்றை எண்ணும்மோது, என் உடலின் ஒவ்வொரு நரம்பும்  தேவனை துதிக்கும் துதியால் அல்லவா நிரம்ப வேண்டும்! நாம் கடந்த சில நாட்களாக படித்துக் கொண்டிருக்கிற மிரியாமின் வாழ்க்கை துதித்தலுக்கு உதாரணமான வாழ்க்கை!

கடந்த வாரம் நாம் மிரியாமின் இரண்டு அருமையான குணநலன்களைப் பற்றிப் பார்த்தோம். அவள் ஞானமுள்ள பெண், திட நம்பிக்கையுள்ள பெண் என்று பார்த்தோம். சிறுவயதிலேய தேவனாகிய கர்த்தர் மேல் விசுவாசமும், அவர் அவர்களை எகிப்தின் அடிமைத்தனத்திலிருந்து விடுவிப்பார் என்ற நம்பிக்கையும் அவளுக்குள் இருந்ததால், மிகுந்த ஆபத்தான வேளையில் தேவன் அருளிய ஞானத்தினாலும், தைரியத்தாலும், ராஜ குமாரத்தியின் முன் நின்று, அவளை ஒரு சிறு பெண் தானே என்று ராஜ குமாரத்தி நினைத்து விடாதபடி பேசி தன் தம்பியின் உயிரைக் காத்தாள்.

நாம் எப்பொழுதும், கர்த்தர் மோசேயை உபயோகப்படுத்தி இஸ்ரவேல் மக்களை அடிமைத்தனத்திலிருந்து மீட்டார் என்று தான் நினைக்கிறோம். ஆனால் மோசேயை உருவாக்குவதற்கு , தங்கள் உயிரைப் பணயம் வைத்து எபிரேய ஆண் பிள்ளைகளை சிசுகொலை செய்யாமல் காத்த சிப்போராள், பூவாள் என்ற மருத்துவச்சிகளையும், எபிரேயக் குழந்தை என்று தெரிந்தும் இரக்கம் காட்டிய அந்நிய நாட்டு ராஜகுமாரத்தியையும், ஞானத்தோடும் விவேகத்தோடும் நடந்து தம்பியின் உயிரைக் காத்த மோசேயின் தமக்கை மிரியாமையும் கர்த்தர் கருவிகளாக உபயோகப்படுத்தினார்.

அதுமட்டுமல்ல, மோசே பார்வோனின் அரண்மனையில் 40 வருடங்கள் வளர்ந்து, எல்லா கலைகளையும் கற்றறிந்து, இஸ்ரவேலின் தலைவனாக உருவாகிக் கொண்டிருந்த  வேளையில், கர்த்தர் ஆரோனையும், மிரியாமையும் இஸ்ரவேல் மக்கள் மத்தியில் தலைவர்களாக உபயோகப் படுத்தி வந்தார். அவர்கள் இஸ்ரவேல் மக்களை உற்சாகப்படுத்தி, கர்த்தர் அவர்களை நிச்சயமாக இரட்சிப்பார் என்ற நம்பிக்கையூட்டினார்கள்.

மோசே பார்வோனின் அரண்மனையில் வாழ்ந்த  40 வருடங்கள் மட்டுமல்ல, அவன் மீதியான் வனாந்தரத்தில் வாழ்ந்த  40 வருடங்களும் சேர்த்து 80 வருடங்கள் வரை , கர்த்தர் ஆரோனை மீதியான் வனாந்தரத்தில் மோசேயை சந்திக்க சொன்ன நாள் வரைக்கும் அவர்கள் நம்பிக்கை இழக்காமல், இஸ்ரவேலின் தலைவர்களாய் வாழ்ந்தனர்.

தேவனாகிய கர்த்தர் மோசேயின் மூலமாய் இஸ்ரவேல் மக்களை அடிமைத்தனத்திலிருந்து மீட்டு, செங்கடலை இரண்டாய் பிளந்து, இஸ்ரவேலை வழிநடத்தி, எகிப்தியரை வீழ்த்திய போது, வேதத்தில், மிரியாம் தம்புருவை தன கையில் ஏந்தி, சகல ஸ்திரிகளையும் தம்புருவோடும், நடனத்தோடும் துதி பாடல் ஆராதனையில் நடத்தினாள் என்று பார்க்கிறோம்.

அதுமட்டுமல்ல     யாத்தி:  15: 20 நாம் இன்று வாசிக்கிற வேத பகுதி,  மிரியாமை தீர்க்கதரிசி என்று கூறுகிறது. வேதத்தில் முதல் முதலாக தீர்க்கதரிசி  என்று மிரியாமுக்கு தான் பட்டம் கொடுக்கப்பட்டது. ஆபிரகாமுக்கு அல்ல, யோசேப்புக்கு அல்ல, மோசேக்கு  கூட அல்ல, ஆனால் தேவ செய்தியை மக்களுக்கு அறிவித்த ஒரு பெண்ணாகிய மிரியாமே முதன் முதலில் தீர்க்கதரிசி என்றழைக்கப்பட்டாள். அடிமைத்தனத்திலிருந்த இந்த இஸ்ரவேல் ஜனத்துக்கு மோசே தலைவனாக செயல் பட்டான், ஆரோன் அவர்களின் ஆசாரியனாகவும், மிரியாம் தீர்க்கதரிசியாகவும் செயல் பட்டனர். சிறு வயதிலேயே பார்வோன் குமாரத்தியுடன் தெளிவாக செய்தியை அறிவித்தவள், நிச்சயமாக தேவ செய்தியை தெளிவாக மக்களுக்கு அறிவிக்கும் வரம் பெற்றிருந்திருப்பாள்.

செங்கடல் கரையில் இந்தப் பெண்கள் தேவனை துதித்து ஆடி , பாடி, மெய் சிலிர்க்க வைத்த ஆராதனையில் கலந்து கொண்ட பாக்கியம் நமக்கு கிடைக்கவில்லை. ஆனால் வேதத்தின் மூலமாய் நம் மனக்கண்களால் அதைப் பார்க்கும் கிருபையை தேவன் நமக்கு அருளியிருக்கிறார். செங்கடலைப் பிளந்து, நம்மையும் நம் பிள்ளைகளையும் வழிநடத்தி, எகிப்தியரை முறியடித்ததால்,  கர்த்தரைப் பாடுங்கள்; அவர் மகிமையாய் வெற்றிசிறந்தார்; குதிரையும் குதிரை வீரனையும் கடலிலே தள்ளினார் என்று மிரியாம் பாடியது நம் காதுகளில் தொனிக்கிறது!

ஒருவேளை உன்னுடைய வாழ்க்கையில் ஒரு பக்கம் அலைவீசும் கடலும், மறுபக்கம் முறியடிக்க வரும் எதிரிகளும் நெருக்கிக் கொண்டிருக்கலாம். துதியா??? நான் எப்படி துதிக்க முடியும்? என்னைப் போல கஷ்டங்கள் இருந்தால் என் நிலைமை புரியும் என்று நீங்கள் எண்ணலாம்.

ஆனால் உன் வாயிலிருந்து துதி புறப்படும்போதே தேவன் தன் வல்லமையை புறப்படப் பண்ணுவார் என்று அறிவாயா? செங்கடலைப் பிளந்து உன்னை வழி நடத்துவார். மிரியாமைப் போல தேவனைத் துதித்து பாடு!  கர்த்தர் வல்லமையான காரியங்களை செய்வார்!

உன் வாழ்க்கை இன்று துதியால் நிரம்பியிருக்கிறதா? என்று சிந்தித்து பார்!

ஏசா:12: 5  கர்த்தரை கீர்த்தனம் பண்ணுங்கள்; அவர் மகத்துவமான கிரியைகளை செய்தார்; இது பூமியெங்கும் அறியப்படக்கடவது என்பீர்கள்;

 ஜெபம்: நீர் செய்த அதிசயங்களை எண்ணி உம்மை துதிக்க, ஆராதிக்க எனக்கு உதவி தாரும். என்னுடைய வாழ்க்கை எல்லா சூழ்நிலைகளிலும் துதி ஸ்தோத்திரங்களினால் நிறைந்திருக்க உதவி தாரும்! ஆமென்!

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

 

இதழ்: 832 திடமான நம்பிக்கையினால் வரும் விசுவாசம்!

சங்கீ: 16: 1 தேவனே என்னைக் காப்பாற்றும். நான் உம்மை நம்பியிருக்கிறேன்

நாம் நேற்று மிரியாமை ஒரு ஞானமுள்ள பெண்ணாய்ப் பார்த்தோம். பார்வோன்  குமாரத்தியிடம் ஞானமாய் பேசி குழந்தையின் தாயே குழந்தையை வளர்க்கும் திட்டத்தைக் கொடுக்கிறாள்.

ஞானமுள்ளவள்  மட்டுமல்ல, மிரியாமை ஒரு திடமான பெண்ணாகக் கூட இங்கு காண்கிறோம்.

நாணலினால் செய்த பெட்டியில் அவள் தம்பி மோசே நைல் நதிக்கரையில் வைக்கப்பட்டபோது, யார் அந்தப் பக்கம் வருகிறார்களோ,  அந்தப் பெட்டி யார் கண்ணில் படப்போகிறதோ என்று ஆவலுடன் பார்த்துக்கொண்டிருந்தாள். அந்தப் பெட்டி பார்வோனின் படை வீரர் கண்ணில் படுமானால் தன் தம்பி மறுநிமிடம் நைல் நதியில் பிணமாக மிதப்பான் என்பதும் இந்தப் பெண்ணுக்கு தெரியும். நிச்சயமாக அவள் தன் தம்பியை இழக்க விரும்பவில்லை, மனது திக் திக் என்று அடித்தது.

எந்த நிமிடம் என்ன நடக்குமோ என்று தெரியாத சூழலில், பார்வோன் குமாரத்தி அங்கு வருகிறாள்.  தன்னுடைய மனத்தைரியத்தை எல்லாம் ஒன்றாக சேர்த்து, கைகாலில் நடுக்கம் இல்லாமல், திடமாக நின்று பார்வோன் குமாரத்தியிடம், தன் தாய் தனக்கு கற்றுக் கொடுத்த விதமாய் அழகாக பேசி, தன் தம்பியின் உயிரைக் காக்கிறாள் இந்த இளம் பெண் மிரியாம். இந்த திடமான தைரியம் அவளுக்கு எப்படி இந்த இளம் வயதில் வந்தது?

நான்  பள்ளியில் படித்த இளம் வயதில்,  ஏதாவது ஒரு புதிய இடத்துக்கு போகவோ அல்லது புது நபர்களைப் பார்க்கவோ வேண்டிய  சூழ்நிலை ஏற்பட்டால், என்னை தேடி கண்டு பிடிக்க முடியாது. எங்காவது ஒரு மூலையில் புத்தகமும் கையுமாக  ஒதுங்கி விடுவேன். ஒரு கடையில் போய் பொருட்கள் வாங்க கூட தைரியம் இருக்காது.

ஒருநாள் என்னுடைய வேதாகம கல்லூரியில் நான் எல்லா ஆசிரியர் முன்பாகவும் ஒரு பிரசங்கம் செய்து காட்டவேண்டியிருந்தது. அந்த பத்து நிமிட செய்திக்காக , பத்து நாட்கள் யாரும்  பார்க்காத இடத்துக்கு போய், சத்தமாய் எனக்கு நானே பிரசங்கம் பண்ணிப் பழகினேன். அவ்வளவு வெட்கமும், பயமும் நிறைந்த நான் இன்று பலருக்கு வேதத்தை போதிப்பதையும், ஒரு நிறுவனத்தை பொறுப்பாக நடத்துவதையும்  பார்க்கும்போது எப்படி நான் இப்படி மாறினேன் என்று யோசிப்பேன். இந்த மனத்திடனும், தைரியமும் நிச்சயமாக ஒரே இரவில் வந்தவை அல்ல. தேவனாகிய கர்த்தர் மேல் வைத்த நம்பிக்கையும், விசுவாசமும், பரிசுத்த ஆவியானவர் எனக்குள்ளாய் வாசம் செய்ததுமே என்னை பெலப்படுத்தியது.

வேதத்தில் நியாதிபதிகள் 6 வது அதிகாரத்தில் கிதியோனைப் பற்றி படிக்கிறோம். அவன் மீதியானியருக்கு பயந்து, யாருடைய கண்ணுக்கும்  படாத இடம் பார்த்து கோதுமையை போரடித்துக் கொண்டிருந்த வேளையில் கர்த்தர் அவனை மீதியானியருடன் போரிட அழைக்கிறார். தொடை நடுங்கியாகிய அவன் சந்தேகப்பட்டு, அடையாளங்கள் கேட்டு, பல சாக்கு போக்கு சொல்லி தப்பித்து கொள்ள முயன்றான். ஆனால் நியா:6:34 ல் , கர்த்தருடைய ஆவியானவர் கிதியோன் மேல் இறங்கியபோது அவன் எக்காளம் ஊதி , அனைவரையும் தன்னைப் பின் தொடருமாறு யுத்தத்துக்கு அழைத்தான் என்று பார்க்கிறோம். என்ன ஆச்சரியம்! இந்த தைரியமும், மனப்பலமும் எங்கிருந்து வந்தது. தேவனானவர் அவன் ஒரு காரியத்தை செய்து முடிப்பதற்காக அவனோடு இருந்து அவனைப் பெலப்படுத்தினார்.

சிறுவயதிலேயே தன் தாயின் மூலம் ஆபிரகாம், ஈசாக்கு, யாக்கோபின் மீது திட நம்பிக்கை வைக்க கற்றுக்கொண்ட மிரியாம், ஆபத்தான வேளையில் தேவனாகிய கர்த்தர் அவளுக்கு கொடுத்த பெலத்தினால் எந்த தயக்கமும், பயமும் இன்றி பார்வோன் குமாரத்தியை அணுகினாள் என்று பார்க்கிறோம்.

 விசுவாசம் என்பது தேவனுடைய கிருபையின் மேல் நாம் வைக்கிற திடமான நம்பிக்கை என்று மார்டின் லூதர் கூறினார்.

நானும் இப்படியான திட நம்பிக்கை எனக்கு வேண்டும் என்று  ஓவ்வொருநாளும் ஜெபிக்கிறேன்! நீங்களும் ஜெபியுங்கள்! கர்த்தர் உங்களை பலப்படுத்தி, திடப்படுத்தி, நீங்கள் செய்ய இருக்கிற காரியத்தை வெற்றியுடன் முடித்து தருவார்!

ஜெபம்:ஆண்டவரே! உம்முடைய பலத்தினால் என்னை இடை கட்டும். எனக்கு தேவையான தைரியத்தையும் திட நம்பிக்கையையும் தாரும். உம்முடைய கரத்தின் பாதுகாப்புக்குள்ளே தங்க எனக்கு பெலன் தாரும். ஆமென்.

உங்கள்சகோதரி

பிரேமா சுந்தர் ராஜ்

 பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

இதழ்: 831 ஒரு தாய் விதைத்த நம்பிக்கை என்னும் விதை!

சங்கீ: 25: 4, 5 கர்த்தாவே உம்முடைய வழிகளை எனக்குத் தெரிவியும்; உம்முடைய பாதைகளை எனக்கு போதித்தருளும்.  உம்முடைய சத்தியத்திலே என்னை நடத்தி என்னைப் போதித்தருளும். நீரே என் இரட்சிப்பின் தேவன்; உம்மை நோக்கி நாள்முழுதும் காத்திருக்கிறேன்.

சில நாட்கள் நாம்  மோசேயின் தாயாகிய யோகெபெத்தைப் பற்றி ஒரு பொறுப்புள்ள, பெலசாலியான, திறமைசாலியான, ஆசீர்வாதமான தாயாகப் பார்த்தோம். இன்று முதல் மோசேயின் தமக்கையாகிய மிரியாமைப் பற்றி ஒரு சில நாட்கள் படிப்போம்.

குழந்தை மோசேயை நாணல் பெட்டியில் வைத்து நைல் நதியோரமாய் நாணல் நிறைந்த கரையில் மிதக்க வைத்து, குழந்தையின் அக்காவாகிய மிரியாமை தூரத்தில் இருந்து காவல் காக்கும்படி செய்தாள் யோகெபெத்.

மிரியாமுக்கு அப்பொழுது பத்திலிருந்து பதின்மூன்று வயதிற்குள் இருக்கும். யார் அந்த நதிக்கரையோரமாக வருவார்களோ? யார் இந்த பெட்டியைப் பார்ப்பார்களோ?  என்று அவள் ஆவலும், பயமும் கலந்து கூர்ந்து கவனித்துக் கொண்டிருந்தபோது, அவள் கண்களை நம்பவே முடியவில்லை! பார்வோனின் ராஜகுமாரத்தி தன் தாதியரோடு நீராட அங்கு வருகிறாள்.

இந்த வயதில் நான் எப்படி இருந்தேன் என்று ஒரு நிமிடம் யோசித்து பார்த்தேன். என்னுடைய நிழலைப் பார்த்து நானே பயந்த வயது,  யாரையும் பார்த்தால் வாய் திறந்து ஒரு வார்த்தை கூட தைரியமாய் பேசாமல், அம்மாவுக்கு பின்னால் ஒளிந்து கொள்வேன். ஆனால் இந்த மிரியாம் இவ்வளவு சிறிய வயதில் தைரியமாய், தெளிவாய் பேசும் வரத்தை தேவனிடமிருந்து பெற்றிருந்தாள். பார்வோன் குமாரத்தி நாணல் பெட்டியை திறப்பதையும், குழந்தை மோசே அழுத சத்தத்தையும் கேட்ட மிரியாம், குழந்தையை வளர்க்க உதவி செய்வதாக ராஜகுமாரத்தியிடம் பேசும் எண்ணத்தில் நெருங்குகிறாள்.  எவ்வளவு தைரியமும், தெளிவும் கொண்ட பெண் இவள்! ஒருவேளை தேவனாகிய கர்த்தரை விசுவாசித்த தாய் யோகெபெத் விதைத்த நம்பிக்கையின் விதை இவளுக்குள் கிரியை செய்ததோ? யாருடைய கட்டளையின் கீழ் எபிரேய ஆண் பிள்ளைகள் கொலை செய்யப்பட்டர்களோ, அவனுடைய குமாரத்தியையே அணுகி பிள்ளையை வளர்க்க ஏற்பாடு செய்ய தைரியம் எப்படி வந்தது?

சிறு வயதிலேயே அவள் தாயின் பாதத்தில் அமர்ந்து கற்றுக்கொண்ட ஞானம் அவள் மற்றவர்களைத் தெளிவாக புரிந்துகொள்ள உதவியது. ராஜகுமாரத்தி குழந்தையைப் பார்த்தவுடன் மிரியாம் அவளை கூர்ந்து கவனித்தாள். அவள் முகத்தில் தெரிவது என்ன? கனிவா? வெறுப்பா? ராஜகுமாரத்தியின் முகத்தில் கனிவையும், கண்களில் பரிவையும் கண்டவுடன் அவளிடம் விரைகிறாள். குழந்தையை வளர்க்க ஒரு எபிரெயத் தாயை அழைத்து வருவதாக சொல்கிறாள். ராஜகுமாரத்தியின் இருதயத்தை ஊடுருவி, நன்மையா தீமையா என்று பகுத்தறியும் ஞானம் இந்த சிறு பெண்ணுக்கு தேவன் அருளியிருந்தார்.

எல்லா குணங்களைப் பார்க்கிலும், மற்றவர்களைத் தெளிவாக புரிந்து கொண்டு, நன்மைதீமையை பகுத்தறிந்து, ஞானமாய் பேசி, ஞானமாய் நடந்து கொல்லும் விசேஷமான கிருபைக்காக நாம் ஒவ்வொருவரும் தேவனிடம் ஜெபிக்க வேண்டும்.

I ராஜா: 3: 9, ல் தாவீதிடமிருந்து சிங்காசனத்தைப் பெற்றுக் கொண்ட சாலோமொன் ராஜா, ஆஸ்திகாகவோ, வல்லமைக்காகவோ தேவனிடம் கேட்காமல், நன்மைதீமை இன்னதென்று வகையறுக்கத் தக்க தெளிவான ஞானமுள்ள இருதயத்தை கேட்பதைப் பார்க்கிறோம்.

நம்முடைய சரீரத்துக்கு கண்கள் போல செயல்பட்டு, நம்முடைய இருதயத்தின் சிந்தனைகளையும், செயல்களையும் ஆராய்ந்து பார்த்து, நாம் ஒரு காரியத்தை செய்வது அல்லது பேசுவது  சரியா தவறா என்று நமக்குள் உணர்த்துவது இந்த ஞானமே. இந்த விசேஷ ஞானமில்லாமல் நாம் எத்தனை தவறுகள் செய்திருக்கிறோம். பேசக்கூடாத இடத்தில் பேசக்கூடாத வார்த்தைகளை பேசி எத்தனை பிரச்சனைகளை சந்தித்தோம்! பின்னர் ‘ஐய்யோ நான் ஞானமில்லாமல் நடந்து கொண்டேனே! இதனால் என் குடும்பம் இரண்டாகிவிட்டதே! என் கணவர் என்னை விட்டு போய்விட்டாரே! என் பிள்ளை என்னோடு பேசாமல் இருக்கிறானே!’ என்றெல்லாம் கதறி அழுதால் என்ன பிரயோஜனம்.

தேவன் நமக்கு  மிரியாமைப் போல நன்மைதீமை என்று பகுத்தறியும் ஞானத்தை,  மற்றவர்களை தெளிவாக புரிந்து கொள்ள செய்யும் ஞானத்தை, சரியான இடத்தில் சரியான வார்த்தைகளை பேசும் ஞானத்தை அருளுமாறு ஜெபிப்போம்.

 ஜெபம்: தேவனே நீர் என் கால்களுக்கு தீபமாய் இருந்து என் சொல்லிலும், செயலிலும் என்னை வழிநடத்தும். ஆமென்!

உங்கள் சகோதரி

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

இதழ்: 830 ஒரு தாய் தன் பிள்ளைகளுக்கு கொடுக்கும் விலைமதிப்பற்ற சொத்து!

எண்ணா: 26: 59 அம்ராமுடைய மனைவிக்கு யொகெபெத் என்று பேர்; அவள் எகிப்திலே லேவிக்கு பிறந்த குமாரத்தி; அவள் அம்ராமுக்கு ஆரோனையும், மோசேயையும், அவன் சகோதரியான மிரியாமையும் பெற்றாள்

யோகெபெத்தை நாம் பொறுப்புள்ள ஒரு தாயாகவும், பெலசாலியான ஒரு தாயாகவும், திறமைசாலியான ஒரு தாயாகவும் பார்த்தோம். இந்த தாய் தன்னுடைய  பிள்ளைகளுக்கு மட்டும் அல்ல, இஸ்ரவேல் மக்களுக்கு எவ்விதமாய் ஒரு ஆசீர்வாதமாக இருந்தாள் என்று பார்க்கலாம்.

யோகெபெத் வாழ்ந்த சமயம் இஸ்ரவேல் மக்கள் அடிமைத்தனத்தில் இருந்தனர். அவர்கள் மேல் கடினமான சுமை சுமத்தப்பட்டது. அப்படிப்பட்ட சமயத்தில் வாழ்ந்த இந்த இளம் தாய் தன் பிள்ளைகளுக்கு , ஆபிரகாம், ஈசாக்கு, யாக்கோபு என்பவர்களின் தேவனாகிய கர்த்தரின் வழிகளை  போதித்தாள். அவர்களை  வளர்க்கும்போது வல்லமையுள்ள தேவனைப் பற்றியும், அவர் அவர்களை அடிமைத்தனத்திலிருந்து மீட்க வல்லவர் என்றும் போதித்தாள்.

மோசே பெரியவனானபோது அவன் தன் சகோதரர் சுமை சுமந்து கஷ்டங்கள் அனுபவிப்பதை பார்த்து, ஒரு எகிப்தியனை வெட்டிப் போட்டு விட்டு, அது   பார்வோன் செவிகளுக்கு எட்டியபடியால், எகிப்தை விட்டு ஓடி மீதியான் தேசத்தில் 40 வருடங்கள் ஆடு மேய்த்து அலைந்து திரிந்த போதும் அவள் மோசே மேல் கொண்ட நம்பிக்கையை இழக்கவில்லை.

மோசேயை திறமையாய் காப்பாற்றி , அவனுக்கு ஆபிரகாமின், ஈசாக்கின், யாக்கோபின் தேவனைப் பற்றி சொல்லிக்கொடுத்து,  பார்வோனின் அரண்மனையின் எல்லா செல்வ சிறப்புகளிலும், எல்லா கலைகளிலும் வல்லவனாய் அவன் வளருவதை தூரத்திலிருந்து பார்த்து, என்றாவது ஒருநாள் தன் மகன், நம் ஜனங்களை எகிப்தின் அடிமைத்தனத்திலிருந்து மீட்பான் என்று கனவு கண்டுகொண்டிருந்தாளே, அவள் கனவு நனவாயிற்றா?

ஆம்!  40 வருடங்களுக்கு பின்னர், யோகெபெத் தன் பிள்ளைகளுக்கு அறிமுகப்படுத்திய அதே தேவனானவர், அவளுடைய மூன்று பிள்ளைகளையும், இஸ்ரவேலை அடிமைத்தனத்திலிருந்து மீட்கும் மிகப்பெரிய    ஊழியத்துக்கு அழைத்ததைப் பார்க்கிறோம். ஆம் அவளுடைய மூன்று பிள்ளைகளும் தேவனுடைய பணிவிடைக்காரர் ஆயினர். மோசே அந்த ஊழியத்தின் தலைவனாகவும், ஆரோனும் அவன் குமாரரும் ஆசாரியராகவும், மிரியாம் தேவனுடைய முதல் தீர்க்கதரிசியாகவும் ஆயினர்.

யோகேபெத்தை எத்தனை அருமையான ஒரு தாயாகப் பார்க்கிறோம். ஒரு தாய் தன் பிள்ளைகளுக்கு சொத்து சுகம் தேடிகொடுத்தால் மட்டும் போதாது, அவர்களை கர்த்தரின் வழிகளில் நடத்த வேண்டும். நாம் தேடி வைக்கிற பணத்தினால் நம் பிள்ளைகள் நம்மை நினைவு கூற மாட்டார்கள். நாம் எவ்வளவு தூரம் அவர்களுக்கு ஆசீர்வாதமாக இருந்தோம் என்பதைக்கொண்டு தான் நினைவு கூறுவார்கள். கர்த்தருடைய சமூகத்துக்கு போய் 42  வருடங்கள் கடந்து போனாலும், என்னுடைய அம்மாவைப் பற்றி நான் நினைத்தவுடன் கண்கள் கலங்கும். அவர்கள் எனக்கு சொத்து தேடி வைத்துவிட்டு செல்லவில்லை, ஆனால் என் வாழ்க்கையில் அவர்கள் ஆசீர்வாதமாக இருந்ததுதான் நினைவுக்கு வரும்.

பரிசுத்த பவுல் பிரயாணங்கள் செய்து பல நாடுகளில் தேவனுடைய வார்த்தையை பிரசங்கித்து , பல சபைகளை நிறுவியவர் என்று நமக்கு நன்கு தெரியும். அவர் ஒவ்வொரு இடத்தை விட்டு வேறு இடம் சென்ற பின்னரும், அவர்களுக்கு கடிதம் எழுதி அவர்களை கர்த்தருக்குள் உற்சாகப்படுத்துவார். அப்படி எழுதப்பட்டவை தாம் நாம் வேதத்தில் படிக்கிற ரோமர், கலாத்தியர், எபிசேயர், கொரிந்தியர், கொலோசெயர், பிலிப்பியர் என்கிற நிருபங்கள். இதில் சில நிருபங்களை அவர் சிறையிலிருக்கும்போதும் எழுதினார். எபிரேயருக்கு விசேஷமாக ஒரு நிருபத்தை எழுதினார். அதுமட்டுமல்ல தன்னுடைய ஆவிக்குரிய மகன் தீமோத்தேயுவுக்கும், தீத்துவுக்கும், பிலேமோனுக்கும்  தனியாக நிருபங்களை எழுதினர்.

பவுல் எழுதிய இந்த நிருபங்கள் இரண்டாயிரம் வருடங்களாக, தலைமுறை தலைமுறையாக கிறிஸ்தவர்களாகிய  நமக்கு ஆசீர்வாதமாக இருந்து வருகிறது. அவருடைய வாழ்க்கையும், அவருடைய வார்த்தைகளும் நம்மை எவ்வாறு ஒவ்வொருநாளும் கிறிஸ்தவ வாழ்க்கையில் பெலப்படுத்துகிறது என்பதை பவுல் இன்று பரத்திலிருந்து கண்ணோக்குவாரானால் அசந்து விடுவார். பவுல் விட்டு சென்றது நம் எல்லாருக்கும் ஒரு ஆசீர்வாதமான வாழ்க்கை!

யோகெபெத் தன் பிள்ளைகள் மூவரையும் கர்த்தருக்குள் வழி நடத்தியதால், அவளுடைய மூன்று பிள்ளைகளும் இஸ்ரவேலின் தேவனாகிய கர்த்தருக்கு ஊழியக்காரராகி, இஸ்ரவேலின் சரித்திரத்தில் முக்கிய இடம் பெற்றனர். ஒரு தாயால் இதைவிட பெரிய ஆசிர்வாதத்தை தன் பிள்ளைகளுக்கு கொடுக்க முடியுமா? பொறுப்புள்ள தாய், மனபெலம் கொண்டவள், திறமைசாலி என்றெல்லாம் நாம் யோகெபெத்தை பற்றி பார்த்தோம்! எல்லாவற்றுக்கும் மேலாக அவள் தன் பிள்ளை கர்த்தருக்குள் வழிநடத்தி அவர்களுக்கு பேராசிர்வாதத்தை கொடுத்த ஒரு தாயாக பார்க்கிறோம்!

நீ  இன்று யாருக்கு ஆசீர்வாதமாக இருக்கிறாய் என்று எண்ணிப்பார்! உன் பிள்ளைகளை கர்த்தருக்குள் வழிநடத்தியிருக்கிறாயா? கர்த்தரின் வார்த்தைகளை போதிக்கிறாயா?

நீ கிறிஸ்துவால் ஆசிர்வதிக்கப்பட்டிருப்பாயானால் நிச்சயமாக நீயும் மற்றவர்களுக்கு ஆசீர்வாதமாய் இருப்பாய்!

ஜெபம்: ஆண்டவரே யோகெபெத் போல என் பிள்ளைகளுக்கு நான் ஆசீர்வாதமாய் இருக்க எனக்கு உதவி தாரும்! ஆமென்.

 

உங்கள் சகோதரி

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

.

இதழ்: 829 புல்லினால் செய்த அற்புத கிரியை!

யாத்தி: 2: 3 அவள் அதை அப்புறம் ஒளித்துவைக்கக் கூடாமல், ஒரு நாணற்ப்பெட்டியை எடுத்து, அதற்கு பிசினும், கீலும் பூசி , அதிலே பிள்ளையை வளர்த்தி, நதியோரமாய் நாணலுக்குள்ளே வைத்தாள்.

மோசே அழிவிலிருந்து மீட்கப்பட்ட இந்த கதையை மறுபடியும் வாசிக்கும்போது, கண்ணில் பட்ட இன்னுமொரு அருமையான காரியம், யோகெபெத்தின் கைவிரல்களின் சிருஷ்டிப்பு திறமை!

பத்து விரல்களால் திறமையாக, அங்கே நைல் நதியண்டை கிடைக்கிற சாதாரண நாணல் என்னும் புல்லைக் கொண்டு, ஒரு பேழையை செய்தாள். அதில் தன் செல்ல மகனுக்கு மூச்சு விட காற்றும் வேண்டும், அதே சமயத்தில் அதற்குள் நீர் புகுந்துவிடக் கூடாது என்பதற்காக பக்குவமாக அதின் அடிப்புறம் பிசினும், கீலும் பூசினாள்!

எத்தனை திறமையாக இந்தப் பெண் இதை படைத்திருக்க வேண்டும்! அவள் விரல்கள் அந்த நாணலை எடுத்து.. பதப்படுத்தி….வளைத்து….நெளித்து…..பின்னி… இணைத்து….. எத்தனை வேலைகள் செய்தன!  இதை அவள் சரிவர செய்யாமலிருந்திருந்தால் அவள் குழந்தை மூச்சு திணறி இறந்திருப்பான் அல்லது நீரில் மூழ்கியிருப்பான். தன்னுடைய குழந்தையை காப்பாற்ற அவளுடைய திறமையை வெளிப்படுத்துகிறாள் யோகெபெத்

செய்யும் வேலையை சிறப்பாய், திறமையாய் செய்யும் தன்மையை தேவன் நம் ஒவ்வொருவருக்கும் அருளியிருக்கிறார். நம்மில் எத்தனை பேர் நம்முடைய விரல்களின் படைப்புத் திறமையினால் நம் குடும்பத்தை காப்பாற்றுகிறோம்? கையினால் பூக்கள் கட்டுவதில் இருந்து, கம்ப்யூட்டரில் டைப் அடிப்பது வரை எத்தனை விதமான வேலைகளை பெண்கள் செய்து தங்கள் பிள்ளைகளை படிக்க வைக்கிறார்கள்!

நான் ‘கிராஸ் 2 கிராஸ்’ என்ற நிறுவனத்தை நடத்தி வந்தேன். இதை வறுமையால் பின்தங்கிய சமுதாயத்திலிருந்து வரும் பெண்களுக்காக ஆரம்பித்தேன். சாதாரண துணியில் பெருக்கல் குறி போன்ற தையல்களைப் போட்டு அதின்மூலம் அழகிய வர்ணத்தில்  வடிவங்களை உருவாக்குவதும், வேத வசனங்களை எழுதுவதும் தான் நான் இவர்களுக்கு கற்றுக் கொடுத்த கலை. இதை நான் என்னிடம் முதன்முறையாக வேலைக்கு வந்த பெண்களுக்குக் கற்றுக் கொடுத்தேன். பின்னர் அவர்கள் புதிதாய் சேர்ந்த ஒவ்வொருவருக்கும் கற்றுக் கொடுத்தனர்.  வேலைக்குவரும் ஒவ்வொரு பெண்ணின் கை விரல்களும் அவர்களின் திறமையை வெளிப்படுத்தின!  இவ்வாறு மிகத்  தாழ்மையான நிலையில் ஆரம்பிக்கப்பட்ட இந்த நிறுவனம் கம்ப்யூட்டர் மூலமாக இயங்கும் தையல் இயந்திரங்களோடு , மேல்  நாடுகளுக்கு,  பொருட்களை அனுப்பும் வகையில் வளர்ந்தது.  இன்று இங்கு கம்ப்யூட்டர் மூலமாக இயங்கும் இயந்திரங்களை இயக்குகியதும் பெண்கள் தான்! தேவன் இவர்களுக்கு அருளிய  திறமை இவர்கள் குடும்பத்தை காக்கவும், பிள்ளைகளை படிக்க வைக்கவும் உதவியது.

யோகெபெத் நாணல் பெட்டியை, ஒரு புல்லை வைத்து சிருஷ்டித்து தன் குழந்தையை காப்பாற்றிய கதை,  நம்முடைய தேவனாகிய கர்த்தர், வானத்தையும் பூமியையும் உருவாக்கினவர், வானத்தை சிங்காசனமாகவும், பூமியை பாதபடியாகவும் கொண்ட தேவன், அவருடைய கரத்தின் சிருஷ்டியாகிய நமக்குள்ளும் சிருஷ்டிப்பு என்கிற திறமையை கொடுத்திருக்கிறார் என்பதை தெளிவாய் வெளிப்படுத்துகிறது.

இருளை நட்சந்திரங்களைக் கொண்டு அழகு படுத்துகிற தேவன், நம் வாழ்வை இருள் சூழும் போது, நமக்குள்ளே அவர் கொடுத்திருக்கிற படைப்பின் திறமையின் மூலம் நம்மை ஆபத்திலிருந்து காத்துக் கொள்ள வகை செய்கிறார்.

வானத்தில் நட்சத்திரங்களை திறமையாய் தொங்க வைக்கிற தேவன், தன்னுடைய குழந்தையை காப்பாற்ற அலைமோதின ஒரு தாய்க்கு நாணல் புல்லைக் கொண்டு ஒரு பெட்டியை, பேழையைப் போல திறமையாய் செய்து, இஸ்ரவேலை அடிமைத்தனத்திலிருந்து மீட்க வந்த குழந்தை மோசேயை காப்பாற்ற உதவி செய்த அதே தேவன், உனக்கும் எனக்கும் தேவையான திறமையை அனுக்கிரகம் செய்வார். அவர் உனக்கு கொடுக்கும் இந்த விசேஷக் கிருபையால் நீ வேலை செய்யும் ஸ்தலத்தில் முன்னேறுவாய்! நீ கையிட்டு செய்யும்வேலையை ஆசீர்வதிப்பார்! நீ எந்த துறையில் வேலை செய்தாலும் சரி, அதை சிறப்பாய், திறமையாய் செய்யது முடிக்க கர்த்தர் உதவி செய்வார்!

யோகேபெத்தின் கதை வாழ்க்கையில் சோர்ந்து போயிருக்கும் உங்களை உற்சாகப்படுத்தட்டும்! நமக்கு வற்றாத ஜீவ ஊற்றாய் உதவி செய்யும் நம் சிருஷ்டி கர்த்தர் நம்மோடிருக்கும்போது, நாம் எதையும் கண்டு அஞ்ச வேண்டாம்! அவர் நம் வாழ்வில் நம்மை சூழும் பிரச்சனைகளை நாம் திறமையாய் எதிர்கொள்ள உதவி செய்வார்!

சங்கீ: 8: 3,4 உமது விரல்களின் கிரியையாகிய உம்முடைய வானங்களையும், நீர் ஸ்தாபித்த சந்திரனையும்,நட்சந்திரங்களையும் நான் பார்க்கும்போது, மனுஷனை நீர் நினைக்கிறதர்க்கும், மனுஷகுமாரனை நீர் விசாரிக்கிறதர்க்கும் அவன் எம்மாத்திரம் என்கிறேன்

நம் ஒவ்வொருவருக்குள்ளும் உள்ள சிருஷ்டிப்பு என்கிற சிறப்பான திறமை, நாம் சிருஷ்டி கர்த்தராகிய தேவனுடைய சாயலாய் படைக்கப் பட்டோம் என்று நினைவுறுத்துகிறது அல்லவா?

ஜெபம்: ஆண்டவரே! நீர் எங்களை திறமைசாலியாக உருவாக்கயதற்காக நன்றி. எங்கள் திறமையோடு நடத்த எங்களுக்கு உதவி தாரும்.ஆமென்!

உங்கள் சகோதரி

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

 

இதழ்:828 தீமைவழியை பின்பற்றாத பார்வோன் குமாரத்தி!

யாத்தி:2: 5,6 அப்பொழுது பார்வோனுடைய குமாரத்தி நதியில் ஸ்நானம் பண்ண வந்தாள்.அவளுடைய தாதிகள் நதியோரத்தில் உலாவினார்கள்; அவள் நாணலுக்குள்ளே இருக்கிற பெட்டியைக் கண்டு, தன் தாதியை அனுப்பி அதைக் கொண்டுவரும்படி செய்தாள்.

அதைத் திறந்தபோது பிள்ளையைக் கண்டாள்; பிள்ளை அழுதது; அவள் அதின்மேல் இரக்கமுற்று இது எபிரேயர் பிள்ளைகளில் ஒன்று என்றாள்.

 ஒருவரை  முதுகெலிம்பில்லாதவர்  என்று யாராவது சொல்லக் கேட்டால் அவரைப்  பற்றி நாம் என்ன நினைக்கிறோம்? ஒரு முடிவில்  நிலைத்து நிற்பவர்  அல்ல என்றுதானே! எல்லோரும் தவறு  பண்ணினால் நாமும் பண்ணலாம் என்றுதானே முதுகெலும்பற்ற ஒவ்வொருவரும் எண்ணுவோம்! இங்கு வித்தியாசமான ஒரு பெண்ணைப்பற்றி படிக்கிறோம்!

பார்வோனின் குமாரத்தி எகிப்து சாம்ராஜ்யத்தில் செல்வத்தில் வளர்ந்தவள். அவள் தந்தை ராஜ்யத்தை ஆண்டதால் அவள் நினப்பதை பெற்றுக்கொள்ளும் செல்வாக்கு நிறைந்தவள்.

ஆனால் எதைப் பற்றியுமே கவலைப்படாமல் வாழவேண்டிய இவளின் மனதை ஒரு பாரம் நெருக்கியது. அவள் தகப்பன் பார்வோன் ராஜாவின் கட்டளையின் பேரில், எபிரேய ஆண்குழந்தைகள் நைல் நதியில் குப்பையைப் போல தூக்கி எறியப்படுகிறார்கள் என்ற பயங்கர செய்தி அவளுக்கு பாரமாக இருந்தது.

ஒருநாள் இந்த அழகிய ராஜகுமாரத்தி நைல் நதிக்கு ஸ்நானம் பண்ண வருகிறாள்.  ஓர் நிமிஷம்!  நானாயிருந்தால் அந்தப் பக்கமே தலைவைத்து படுத்திருக்க மாட்டேன். ஏனெனில் குழந்தையை பறிகொடுத்த யாரோ ஒருவர், அப்பா பார்வோன் செய்த குற்றத்துக்காக நம்மேல் பழிவாங்கி விட்டால் என்ன செய்வது என்ற பயம் இருந்திருக்கும்! அது மட்டுமல்ல ஒருவேளை நதியில்  எறியப்பட்ட ஒரு குழந்தையை முதலையாவது, ஏதாவது மதிய உணவாக சாப்பிடுவதைப் பார்க்க நேரிட்டால் அதையும் இந்த மனது தாங்காது.

வேதம் கூறுகிறது, யோகெபெத் தன்னுடைய மூன்று மாத குழந்தை மோசேயை நாணல் பெட்டியில் வைத்து நதியோரமாய் நாணலுக்குள்ளே வைத்த நேரத்தில், ராஜகுமரத்தி நதியில் ஸ்நானம் செய்ய வந்தாள் என்று. இன்று எகிப்துக்கு போகிறவர்கள் நிச்சயமாக நைல் நதியில் ஸ்நானம் செய்ய விரும்ப மாட்டார்கள். ஆனால் பல ஆயிரம் ஆண்டுகளுக்கு முன்னர் நைல் நதி பரிசுத்தமாய் கருதப்பட்டது. இன்றைய ஜனத்தொகையும்,  மாசும், இல்லாமல் அது பாலைவனத்தில் முத்தாய் ஜொலித்திருக்கும்.

என்ன நடக்கிறது பாருங்கள். பார்வோன் குமாரத்தி நதியண்டை வந்ததும் ஒரு நாணல் பெட்டி, நாணலுக்குள்ளே சொருகி வைக்கப்பட்டிருக்கிறதைக் கண்டாள். உடனே தன் தாதிமாரை அனுப்பி அதை எடுத்து வர சொல்கிறாள்.

இந்த இடத்தில் நாம் யாத்தி:  2: 5,6 லிருந்து இந்த பார்வோன் குமாரத்தி எப்படிப்பட்டவள் என்று அறிவோம்!

முதலாவது வேதம் கூறுகிறது, அவள் பிள்ளையின் மேல் இரக்கமுற்றாள்  என்று. அவள் அந்தப் பெட்டியைத் திறந்தவுடன் பிள்ளை அழுதது, அவள் அதின்மேல் இரக்கமுற்றாள். ஒரு குழந்தையின் அழுகை சத்தத்தில் அவளின் பெண்மைக்குரிய இரக்க குணம் தலை தூக்கியது.    

இரண்டாவது அவளை  நான் ஒரு தைரியசாலியான பெண்ணாக பார்க்கிறோம். அவளுடைய தகப்பனின் படை வீரர்கள் இதை பார்த்திருந்தால் என்ன நடந்திருக்கும்? அல்லது அவளது தகப்பனின் கட்டளையை மீறுவதற்காக என்ன தண்டனை கிடைத்திருக்கும்? இவற்றைப் பற்றி அவள் சிந்திக்கவே இல்லை. ராஜ கட்டளையை மீறி ஒரு ஒரு எபிரேய குழந்தையை காப்பாற்ற அவளுக்கு மிகுந்த தைரியம் தேவைப்பட்டது.

மூன்றாவது அவள் அந்த குழந்தையைக்  காப்பாற்றுவதில் காட்டிய ஆர்வம் அவளுடைய நல்மனசாட்சியைக் காட்டியது. குழந்தையைக் கண்டவுடன் அவளுக்கு அது எபிரேயக் குழந்தை என்று தெரியும். அதை தொடர்ந்து வந்த குழந்தையின் அக்கா, பின்னர் குழந்தையை வளர்த்து தருகிறேன் என்ற தாய், இவர்களைப் பார்த்தும், இந்தக் குழந்தையை பெற்றவள் யாரென்று அறியாமலிருக்க அவள் ஒன்றும் முட்டாள் இல்லை. அந்த தாய் தன் குழந்தையை காப்பாற்ற எடுத்த முயற்சி அவள் உள்ளத்தை தொட்டது.

அவளுக்கு உதவி செய்ய வேண்டும் என்று அவள் முடிவு செய்தாள். எகிப்தில் இருந்த அத்தனை பேரும் குழந்தைகளை கொல்லும் முயற்சியில் இருந்தாலும், தான் அந்த வழியில் போவதில்லை என்று முடிவு செய்தாள்.

யாத்தி: 23: 2 தீமை செய்ய திரளானபேர்களைப் பின்பற்றாதிருப்பாயாக என்று வேதம் சொல்லுகிறது. பார்வோன் குமாரத்தி தீமை செய்ய அவள் தகப்பனையோ அல்லது மற்ற எகிப்தியரையோ பின்பற்றவில்லை. பார்வோன் குமாரத்தியைப் பற்றி சொல்ல வேறு வார்த்தைகள் இல்லை. அவள் இரக்கமும், தைரியமும், நல் மனசாட்சியும் உள்ள ஒரு பெண்மணி!

நீ எப்படி? எடுத்த முடிவில் நிலைத்து நிற்பவரா? அல்லது எல்லாரும் செய்கிறார்கள், நான் செய்தால் என்ன தவறு? என்பவரா!

கோழையை ஒரு காரியத்தை செய்ய சொன்னால் அது ஆபத்தில்லையா? என்று யோசிப்பான். சுயநலவாதியிடம் சொன்னால், அதனால் என்ன லாபம்? என்று கேட்பான். பெருமைக்காரனிடம் சென்றால் தனக்கு புகழ் கிடைக்குமா? என்று யோசிப்பான். ஆனால் நல் மனசாட்சி உள்ளவனோ தான் செய்வது சரியா? அல்லது தவறா? என்று மட்டும் தான் யோசிப்பான் என்று ஒரு மேதை கூறியிருக்கிறார்

ஜெபம்: ஆண்டவரே உலகம் எங்களை பகைத்தாலும், எங்கள் மனசாட்சிக்கு விரோதமாய் நடக்காதவாறு எங்களைக் காத்துக்கொள்ளும். ஆமென்.

உங்கள் சகோதரி

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

இதழ்: 827 பிள்ளைகளுக்காக எதை இன்று தியாகம் செய்கிறீர்கள்?

யாத்தி :2:2, 9  “அந்த ஸ்திரி (யொகெபேத்) கர்ப்பவதியாகி, ஒரு ஆண் பிள்ளையைப் பெற்று, அது அழகுள்ளதென்று கண்டு அதை மூன்று மாதம் ஒளித்து வைத்தாள்.

பார்வோனுடைய குமாரத்தி அவளை நோக்கி, நீ இந்தப் பிள்ளையை எடுத்துக்கொண்டுபோய் அதை எனக்கு வளர்த்திடு; நான் உனக்கு சம்பளம் கொடுக்கிறேன் என்றாள். அந்த ஸ்திரி பிள்ளையை எடுத்துக்கொண்டுபோய் அதை வளர்த்தாள்

பெண்களை பெலவீனப்பாண்டமாக உலகத்தார் நினைக்கிறார்கள். அது உண்மையா??? சரீரப்பிரகாரமாய் ஒருவேளை இருக்கலாம்! ஆனால் ஆவிக்குரிய வாழ்க்கையிலும், விசுவாசத்திலும், நேர்மை, உண்மை போன்ற காரியங்களிலும் பெண்கள் இளைத்தவர்கள் அல்ல என்பதுதான் என் கருத்து.

பெண்களின் வாழ்க்கை சுகந்த மணம் வீசும் மலர் போல என்பார்கள்! ஏனெனில் மலர் என்றாள் கிள்ளி எறிந்து விடலாம் அல்லவா? ஆனால் யாரோ ஒருவர் பெண்களை தேயிலையோடு ஒப்பிட்டது எனக்கு மிகவும் பிடிக்கும். ஏனெனில் தேயிலையை கொதித்த நீரில் போட்டாலும் அதிக சுவையும், மணமும் உள்ள தேநீரைத்தான் கொடுக்கும்!

நாம்  யொகெபேத் என்ற ஒரு பொறுப்புள்ள தாயைப் பற்றி படித்தோம். தன்னுடைய பிள்ளைகளின் நலனுக்காக, எதையும் செய்ய தயாராக இருந்த இந்த தாய், பார்வோன் ராஜா , பிறந்த ஆண்குழந்தைகளை நைல் நதியில் போட கட்டளை கொடுத்திருந்தபோதும், இஸ்ரவேலின் தேவன் மேல் நம்பிக்கையோடு தன் குழந்தையை மூன்று மாதம் ஒளித்து வைத்தாள் என்று பார்த்தோம்.

வேதம் கூறுகிறது, மூன்று மாதங்களுக்கு பின் அவள் நாணலினால் செய்த ஒரு பெட்டியில், நீர் உள்ளே செல்லாமலிருக்க, பிசினும் கீலும் பூசி, தன் குமாரனைப்  படுக்க வைத்து, பார்வோன் குமாரத்தி நதிக்கு ஸ்நானம் செய்ய வரும் நேரம் அறிந்து, நதியோரமாய் நாணலுக்குள்ளே வைத்து, என்ன நடக்கிறது என்று கவனிக்க குழந்தையின் அக்காவை அங்கே நிற்க வைக்கிறாள்.

அவள் திட்டமிட்டு எதிர்பார்த்தபடியே பார்வோன் குமாரத்தி அந்தக் குழந்தையின் அழகில் மயங்கி அதை வளர்க்க ஆசைப்படுகிறாள். அதை பால் கொடுத்துவளர்க்கும் ஒரு தாதியாக யொகெபேத் மாறி தன் குழந்தையை பார்வோன் குமாரத்திக்கு விட்டுக் கொடுக்கிறாள் என்று பார்க்கிறோம்.

இதைப் படிக்கும்போது என் எண்ணத்தில் ஓடியதெல்லாம், எவ்வளவு பெலமுள்ள ஒரு தாய் இவள் என்று தான்!

பார்வோனின் போர்வீரர்கள் கண்ணில் பட்டால் தன் குழந்தைக்கு ஆபத்து என்று நன்கு அறிந்த யொகெபேத், தன் மனப்பலத்தைக் கூட்டி தன் பிள்ளையை பார்வோன் குமாரத்தி அவள் பிள்ளையாக்கிக் கொண்டாலும் பரவாயில்லை, அவனை அந்த கொலைகாரப் பார்வோன் கையிலிருந்து காப்பாற்றினால் போதும் என்று எண்ணினாள்.!

யொகெபேத், தன் குழந்தையாகிய மோசேக்கு ஜீவனை மாத்திரம் கொடுக்கவில்லை, அவனை அழிவிலிருந்து மீட்டு, அவனுக்கு நல்ல எதிர்காலத்தையும் கொடுத்தாள்.

வேதாகம வல்லுநர்கள் கூறுகின்றனர் மோசே, மிகுந்த அழகுள்ளவனாயும், பார்க்கும்போதே ஒரு சிறப்புத்தன்மை வாய்ந்த குழந்தையாக இருந்திருப்பான் என்று. அவனைப் பார்த்தவுடன், தேவனை அறிந்த இந்த தாயின் உள்ளம் ‘இவன் நம்மை இரட்சிப்பான், நம்மை எகிப்த்தின் அடிமைத்தனத்திலிருந்து மீட்பான்’ என்று திட்டமாக கூறியிருக்கும். அவனை எப்படியாவது காப்பாற்றி, நல்ல எதிர்காலத்தை அமைத்துக் கொடுப்பது தன் கடமை என்று உணர்ந்திருப்பாள்.

அவள் தன் பெலத்தையெல்லாம் திரட்டி, தான் பெற்றெடுத்த செல்லக் குழந்தையை பார்வோன் குமாரத்தியின் கையில் கொடுத்து, அவனை எகிப்து அரண்மனையில், எபிரேய ஆண்பிள்ளைகளை கொலைசெய்ய கட்டளை பிறப்பித்த ராஜாவின் அரண்மனையில் வளரும்படி அனுப்பியபோது, அவள் உள்ளம் ஆபிரகாம்,ஈசாக்கு, யாக்கோபின் தேவனை நோக்கி மன்றாடியிருக்கும் அல்லவா?

யொகெபேத்தின் சுயநலமில்லாத தாய்மையைப் பற்றி சிந்தித்தபோது, என் பிள்ளைகளுக்காக, அவர்களின் எதிர் காலத்துக்காக எதையெல்லாம் நான் விட்டுக் கொடுத்திருக்கிறேன் என்று நான் சிந்திக்க ஆரம்பித்தேன்!

என் பிள்ளைகள் இருவரும் அவரவர் குடும்பத்தில் சாட்சியாய் வாழ்வது  மட்டுமல்லாமல் ஆவிக்குரிய வாழ்க்கையில் அநேகருக்கு வழிகாட்டியாய் வாழ்ந்து வருகின்றனர்.

ஆனால் இளம் தாய்மாராகிய நீங்கள் உங்கள் பிள்ளைகளுக்காக என்ன தியாகம் செய்கிறீர்கள்? பிள்ளைகளுக்கு நல்லதொரு எதிர்காலத்தை அமைத்துக் கொடுத்த  இந்த எபிரேய தாயைப் போல, தேவன் மேல் திடமான நம்பிக்கையும், பெலமும், ஞானமும் உங்களிடம் உண்டா? உங்கள் பிள்ளைகளுக்காக உங்கள் நேரத்தை தியாகம் செய்ய உங்களால் முடியுமா? டிவி பார்க்க நேரம் உண்டு, பிள்ளைகளின் எதிர்காலத்துக்காக கர்த்தரிடம் மன்றாடி ஜெபிக்க நேரம் உண்டா? 

 

ஜெபம்: ஆண்டவரே! என் பிள்ளைகளின் எதிர்காலத்தை உம்முடைய கரத்தில் ஒப்புக்கொடுக்கிறேன். அவர்களுக்காக ஒவ்வொரு நாளும் அதிக நேரம் ஜெபிக்க எனக்கு உதவி தாரும்! ஆமென்.

 

உங்கள் சகோதரி

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.itaz: