Archives

இதழ்: 843 தடுக்கி விழுந்தாலும் விட்டு விடாதே!

உபாகமம்: 33:3 மெய்யாகவே அவர் ஜனங்களை நேசிக்கிறார். அவருடைய பரிசுத்தவான்கள் எல்லாரும் உம்முடைய கையில் இருக்கிறார்கள். அவர்கள் உம்முடைய பாதத்தில் விழுந்து…

மோசே தன் வாழ்க்கையை கன்மலையாகிய கர்த்தரின் மேல் கட்டியிருந்தான், கர்த்தரை முகமுகமாய்  அறிந்திருந்தான் என்று பார்த்தோம். நம்முடைய வாழ்க்கையும் கற்பாறையாகிய கிறிஸ்து இயேசுவின் கட்டப்பட்டால் எந்த புயல் வீசினும், எந்த அலை வந்தாலும் அது நிலைத்திருக்கும் என்று பார்த்தோம்.

ஒரு வீட்டின் அஸ்திபாரத்தை கன்மலையின்மேல் போட்டால் மாத்திரம் போதாது. அந்த வீடு நிலைத்திருக்க நல்ல தூண்கள் வேண்டும் அல்லவா? அப்படிப்பட்ட தூண்களில் ஒன்றுதான் இந்த வசனத்தில் “அவர்கள் உம்முடைய பாதத்தில் விழுந்து” என்று நாம் பார்க்கிறோம். இது ஆங்கில வேதாகமத்தில் உம்முடைய பாதத்தில் அமர்ந்து என்று எழுதப்பட்டுள்ளது.

இவற்றில் எனக்கு தமிழ் மொழியாக்கமே மிகவும் பிடித்தது. அது எபிரேய மொழியாக்கத்தைப் போலவே இருந்தது. பாதத்தில் விழுந்து என்றால் என்ன?

இந்த வார்த்தை எனக்கு என் சிறு வயதில் நடந்த ஒரு சம்பவத்தைதான் நினைவுபடுத்தியது! நாங்கள் திருச்செந்தூர் தாலுக்காவை சேர்ந்த நாசரேத்து என்ற ஊரில் வாழ்ந்து கொண்டிருந்தோம்! அம்மா ஒருநாள் தாலுக்கா ஆபீசுக்கு போக வேண்டியதிருந்ததால் என்னையும் கூட அழைத்துச் சென்றார்கள். வேலை முடிந்தவுடன் கடற்கரைக்கு சென்றோம். அதுதான் முதல்தடவையாக நான் கடலைப் பார்த்தது!`அம்மாவுடைய கையைப் பிடித்துக்கொண்டு நின்று கொண்டிருந்தேன். ஒரு பெரிய அலை என்னிடமாய் வந்ததும், பயத்தில் நான் அம்மாவின் கையை உதறிவிட்டு பின்னோக்கி ஓட முயன்றேன் ஆனால் ஏதோ ஒன்று காலைத் தட்டியதால் நான் கீழே விழுந்து, அம்மாவின் கால்களை இறுகப் பிடித்துக்கொண்டேன். அந்த அலை வந்துவிட்டு போகுமட்டும் நான் கால்களை விடவேயில்லை!

இதைத்தான் நான் இந்த வார்த்தையில் பார்க்கிறேன். நாம் கர்த்தருடைய பிள்ளைகளாக அவரோடு நடக்கும்போது, அவருடைய சத்தத்தைக் கேட்டு அவரைப் பின்பற்றும்போது, நாம் எதிர்பார்க்காத சோதனைகள், கடல் அலைகள் போல வந்து நம்மைத் தாக்கும் வேளையில் ஒருவேளை நாம் பயத்தில் இடறினாலும் அவருடைய பாதத்திலேயே விழுந்து, அவருடைய பிரசன்னத்தை உணர்ந்து, அவருடைய கரத்தைப் பற்றிக்கொண்டு எழும்பி மறுபடியும் அவரைப் பின் தொடரும் இயல்புதான் நம் வாழ்க்கையில் தூணாக அமையும்.

நம்முடைய வாழ்க்கை என்னும் வீட்டின் அஸ்திபாரம் கன்மலையாகிய கிறிஸ்து என்று பார்த்தோம்.  நம்முடைய வீட்டின் முதல் தூண் நாம் பயப்படும் வேளையிலும், நாம் இடறும் வேளையிலும், அவருடைய பாதத்தில் விழுந்து அவர் கால்களை விடாமல் பிடித்துக்கொள்ளும் வாழ்க்கை!

நம்முடைய கிறிஸ்தவ வாழ்க்கையில் எந்த நேரத்தில் புயல் வீசும் என்று நம்மால் கூறமுடியுமா? சாத்தான் நம்மைத் தடுக்கி விழப்பண்ண அநேக இன்னல்களைக் கொண்டு வருவான். வேலை பார்க்கும் இடத்திலும், வீட்டிலும் நிம்மதியில்லாத வாழ்க்கையைக் கொடுத்து உன்னை இடறுதலடைய செய்வான். சூழ்நிலைகளைப் பார்த்து நீ கலங்கி பயமடைய செய்வான்.

கர்த்தருடைய தாசனாகிய மோசே பலமுறை தவறினார் ஆனாலும் முற்றிலும் கவிழ்ந்து விடவில்லை. கால் தடுக்கி தவறின பொழுதும் கர்த்தருடைய பாதத்திலேயே விழுந்து அஸ்திபாரமாகிய கன்மலையின் மேலேயே தங்கியிருந்தார்.

 உன் வாழ்க்கையிலும் நீ இடறும்போது அவர் பாதங்களைப் பற்றிக்கொள்! விழமாட்டாய்!

உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

 

 

இதழ்: 842 மோசே அறிந்த கன்மலை!

உபாகமம்:34:12 ”கர்த்தரை முகமுகமாய் அறிந்த மோசேயைப்போல ஒரு தீர்க்கதரிசியும் இஸ்ரவேலில் அப்புறம் எழும்பினதில்லை”

நாங்கள் இஸ்ரவேலில் கெத்செமனே தோட்டத்தில் நம்முடைய ஆண்டவராகிய இயேசு கிறிஸ்து யூதாஸ் என்பவனால் காட்டிக்கொடுக்கப்பட்ட மரத்தடியில் நின்று கொண்டு எங்கள் இருவரையும் சேர்த்து போட்டோ எடுக்கமுடியாமல்,  யாரிடம் கேட்பது என்று திகைத்துக் கொண்டிருந்தோம். அப்பொழுது ஒரு சகோதரி, ரஷ்யா நாட்டை சேர்ந்தவர்கள், எங்களிடம் வந்து கேமராவை வாங்கி சேர்ந்து நில்லுங்கள் நான் போட்டோ எடுக்கிறேன் என்று சொல்லி எங்கள் இருவரையும் படம் எடுத்ததுமட்டுமல்லாமல், என்னிடம் வந்து நீங்கள் கிறிஸ்தவரா?  என்று கேட்டார்கள், நான் ஆம் என்றெதும் என்னை பாசத்துடன் முத்தமிட்டு விட்டு கடந்து சென்றார்கள். அந்த சகோதரியின் முகப்பிரகாசமே, கர்த்தருடைய கிருபையையும், அன்பையும் அவர்கள் அதிகமாய் அறிந்தவர்கள் என்று காட்டிற்று. அவர்கள் முகம் என் கண்ணிலிருந்து மறையவேயில்லை!

எந்த மனிதனையும்விட கர்த்தராகிய தேவனை அதிகதிகமாக அறிந்த மோசேயின் வாழ்க்கையையும், அவர் கர்த்தரோடு கொண்டிருந்த தொடர்பையும் இன்றுமுதல் சில நாட்கள் நாம் படிக்கலாம். இதுவே நாம் உபாகமம் புத்தகத்தைப் படிக்கும் கடைசி வாரமாகும்.

மோசே தேவனை முகமுகமாய் அறிந்திருந்தார்! இந்த தேவன் யார்? மோசேயின் வார்த்தைகளைக் கேளுங்கள்!  கர்த்தருடைய நாமத்தை பிரசித்தம் பண்ணுவேன்; நம்முடைய தேவனுக்கு மகத்துவத்தைச் செலுத்துங்கள்.  அவர் கன்மலை; அவர் கிரியை உத்தமமானது; அவர் வழிகளெல்லாம் நியாயம்; அவர் நியாயக்கேடில்லாத சத்தியமுள்ள தேவன்; அவர் நீதியும் செம்மையுமானவர்.”  (உபா:32 : 3 – 4)

மோசேயின் வாழ்க்கையின் கடைசிக்கட்டமாக கர்த்தர் அவரை நேபோ மலையின் உச்சியில் உள்ள பிஸ்கா கொடுமுடிக்கு கொண்டுபோய் கானான் தேசத்தை அவருக்கு காட்டும் முன்னதாக மோசே இஸ்ரவேல் மக்கள் அனைவரையும் ஒன்று கூட்டி, கர்த்தரை அறிந்த ஜீவியத்தை ஜீவிக்கிறதைப் பற்றி உபதேசிக்கிறதை நாம் உபாகமம் 32 ம் அதிகாரத்தில் பார்க்கிறோம்.

மோசே இந்த உபதேசத்தை பண்ணும்போது அவருக்கு வயது 120! முதல் நாற்பது வருடங்கள் பார்வோன் குமாரத்தியின் வளர்ப்பு மகனாக எகிப்தின் அரண்மனையில் கழிந்தன! இரண்டாவது நாற்பது வருடங்கள் மீதியானின் வனாந்தரத்தில் ஆடுகளை மேய்ப்பதில் கழிந்தன! மூன்றாவது நாற்பது வருடங்கள் அடிக்கடி வழிதவறிய, முறுமுறுத்த இஸ்ரவேல் மக்களை வனாந்தரத்தில் நடத்துவதில் கழிந்து விட்டன!

இத்தனை வயதில் கணீரென்ற குரலில், மோசே உரத்த சத்தமாய் ” நான் என் ஜீவியத்தில் அறிந்த தேவனாகிய கர்த்தர் ஒரு கன்மலை! என்று கூறுகிறார். இந்தக் கன்மலைமேல் மோசேயின் வாழ்க்கையின் அஸ்திபாரம் இருந்ததால், அவருடைய வாழ்வின் முடிவில் ”கர்த்தரை முகமுகமாய் அறிந்த மோசேயைப்போல ஒரு தீர்க்கதரிசியும் இஸ்ரவேலில் அப்புறம் எழும்பினதில்லை என்று கூறும்படியாய் அமைந்தது

கர்த்தரை அறிந்த ஜீவியத்திற்கு உறுதியான அஸ்திபாரம் தேவை! அது நாம் ஒரு வீடு கட்டுவது போலத்தான்! உறுதியான துருப்பிடிக்காத கம்பிகளோடு போடும் தூண்களும், அஸ்திபாரமும் வீட்டின் உறுதிக்கு ஆதாரம் அல்லவா? அவ்வாறு நம் வாழ்க்கையின் அஸ்திபாரம் கன்மலையாகிய கிறிஸ்துவின்மேல் போடப்பட வேண்டும் என்று மோசே கூறுவதைப் பார்க்கிறோம்!

இந்த இடத்தில் நாம் முகமுகமாய் அறிந்த என்ற வார்த்தையின் எபிரேய மொழியாக்கத்தைப் பார்ப்போம். நாம் யாராவது நமக்கு நன்றாகத் தெரிந்தவர்களைப் பற்றி பேசும்போது ‘ஓ அவர்களை எனக்கு நன்றாகத் தெரியுமே’ என்கிறோம் அல்லவா அந்த வார்த்தைதான் அறிந்த என்ற வார்த்தையும். மோசேயும் கர்த்தரும் ஒருவரையொருவர் நன்கு அறிந்திருந்தனர், அவர்கள் இருவரும் நண்பர்கள்! ஒன்றாய் நடந்தனர்! பேசினர்! எல்லாவற்றுக்கும் மேலாக அவர்கள் ஒருவரையொருவர் நேசித்தனர்! என்ன அருமையான வாழ்க்கை!

பரலோகத்தின் தேவனை மோசே அறிந்ததாலே, பூமியிலே அவருடைய பிரசன்னத்தை ஒவ்வொரு நாளும் உணர்ந்தார்! என்ன வாழ்க்கை!! வானாதி வானங்களைப் படைத்தவர் பூமியிலே மோசேக்கு நண்பரானார்!

பரிசுத்த பவுல் இயேசு கிறிஸ்துவை நான் இன்னும் அதிகமாக அறிய வேண்டும் என்றார்.  நீ கன்மலையாகிய தேவனை அறிந்திருக்கிறாயா? அவர் உனக்கும் நண்பரா?? உன் கவலைகள், பாரங்கள் எல்லாவற்றையும் அவரிடம் சொல்வாயா? அவருடைய கிருபை, இரக்கம், அன்பு இவற்றை அறிந்திருக்கிறாயா? அவர் உன்னுடன் பேசுவாரா? இல்லையானால் இன்றே அவரிடம் வா!

 

உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

 

 

 

 

இதழ்:841 சாபமிட அவர் என்ன மந்திரவாதியா?

உபாகமம் 28:13  இன்று நான் உங்களுக்கு விதிக்கிற வார்த்தைகள் யாவையும் விட்டு விலகி வேறே தேவர்களைச் சேவிக்கும்படிக்கு நீ வலதுபுறம் இடதுபுறம் சாயாமல்,

கதைப் புத்தகங்களில் மந்திரவாதியின் சாபத்தினால் மனிதன் பூனையாவதைப் பற்றி படித்திருக்கிறேன்! ஏழை எளிய மக்கள் ஒருவரோடொருவர் சண்டை போட்டுக் கொள்ளும்போது நீ மண்ணாய் போவாய், நீ விளங்காமல் போவாய், என்று சாபமிடுவதையும் கண்களால் பார்த்திருக்கிறேன்.  என்னுடைய சொந்த கிராமத்தில் ஒரு குடும்பத்தில் பிள்ளைகள் தொடர்ந்து ஊனமாய், குருடாய்ப் பிறந்தபோது, அவர்கள் யாருக்கோ அநியாயம் செய்ததால் சபிக்கப்பட்டதாக ஊர் மக்கள் சொன்னார்கள்!

கடந்த சில நாட்களாக நாம் உபாகமம் புத்தகத்தில் தேவனாகிய கர்த்தர் தம் தாசனாகிய மோசே மூலம் நமக்கு கொடுத்த ஆசீர்வாதங்களைப் பற்றிப் பார்த்தோம். நாம் கர்த்தருடைய வார்த்தைகளை கவனமாகக் கேட்டு, அவருக்கு கீழ்ப்படிந்து நடப்போமானால் எந்த வேளையிலும், எந்த சூழ்நிலையிலும் நாம் அவரை ஆராதிக்கிறவர்களாகவும், அவருக்கு மகிமையையும் கனத்தையும் கொண்டு வருகிறவர்களாகவும் இருப்போம், கர்த்தருடைய பிரசன்னமானது கர்ப்பத்தின் கனியாகிய நம்முடைய பிள்ளைகளையும், நமக்கு சொந்தமான எல்லாவற்றையும் சூழ்ந்திருக்கும்! அவர் நம்மைத் தமக்கு பரிசுத்த ஜனமாக நிலைப்படுத்துவார்! நம்மை வாலாக்காமல் தலையாக்குவார்! இதுதான் அவர் நமக்கு கொடுக்கும் ஆசீர்வாதம்!

இன்றைய வேதாகமப் பகுதியில் நாம் சாபம் என்ற வார்த்தையைப் படிக்கும்போது கர்த்தரை ஒரு` மந்திரவாதியாகவோ அல்லது மண்ணைவாரி கொட்டி சாபம்போடும் ஒரு கொடிய மனிதனாகவோ நம் மனது கற்பனை செய்யக்கூடும். கர்த்தர் நம்மை சபித்துவிட்டால் அது கடுமையாக இருக்குமே என்று நம்மை பயப்பட செய்யும் ஏனெனில் சபிக்கப்படுதல் என்பது நாம் யாரும் விரும்பாத ஒன்று!

எபிரேய மொழியில் சாபங்களெல்லாம் உன்மேல் வந்து உனக்கு பலிக்கும் என்ற வார்த்தைக்கு உன்னைக் கிட்டி சேர்ந்து பற்றிகொள்ளும் என்று அர்த்தம் என்று நாம் ஏற்கெனவே பார்த்தோம்.

உபாகமம்:28:13 ல் மோசேயின் வார்த்தைகள் கடும் எச்சரிக்கையோடு வந்தன!

இன்று நான் உங்களுக்கு விதிக்கிற வார்த்தைகள் யாவையும் விட்டு விலகி வேறே தேவர்களைச் சேவிக்கும்படிக்கு நீ வலதுபுறம் இடதுபுறம் சாயாமல்  என்று. கர்த்தர் தம் பிள்ளைகளிடம் நிலையான,  நிரந்தர அன்பை  எதிர்பார்த்தார். பின்னர் உபா:28:15 ம் வசனத்தில் நாம் அவருடைய கட்டளைகளை கூர்ந்து கவனித்து, அவருடைய வழிகளில் நடவாமல் போனால் சாபம் நம்மைக் கிட்டி சேர்ந்து பற்றிக்கொள்ளும் என்று கூறுகிறார்.

அப்படியானால் என்ன? கர்த்தாராகிய ஆண்டவர் நம் மேல் ஏதாவது மந்திரத்தை ஏவி விடுவாரா? அவர் அவ்வளவு கொடியவரா? தமக்கு கீழ்ப்படியாதவர்களுக்கு சாபம் போட்டு விடுவாரா?

நிச்சயமாக இல்லை! அவருடைய வழிகளில் நடவாமல், நாமுடைய சொந்த வழிகளைத் தெரிந்து கொள்வோமானால் சாபம் நம்மைத் தொடரும் என்று கர்த்தர் சொல்லுவதின் கருத்து என்ன என்று பார்ப்போம்!

எபிரேய மொழியில் சாபம் என்ற வார்த்தைக்கு ’கழிவு அல்லது அசுத்தம் என்று அர்த்தம்.

நாம் ஆசீர்வாதங்கள் என்ற வார்த்தையின் அர்த்தத்தை பார்த்திருக்கிறோம். ஆசீர்வாதங்கள் என்பது தேவனை எங்கிருந்தாலும், எந்த சூழ்நிலையிலும் ஆராதிக்கும் பரிசுத்தமான வாழ்க்கை. சாபங்கள் என்பது அதற்கு நேர்மாறான அசுத்தமான வாழ்க்கை. சாபம் எனபது நாம் கர்த்தருடைய வழிகளை பின்பற்றாமல் போவதால் கர்த்தர் நம் மேல் கோபப்பட்டு, பழிவாங்க ஏவிவிடும் மந்திரம் அல்ல!  அது நாம் பரிசுத்தரான கர்த்தரை நம்முடைய வாழ்வின் மையத்தில் வைக்கத் தவறியதால் நம்மை சூழ்ந்து கொள்ளும் அசுத்தங்கள். இப்பொழுது ஆசிர்வாதங்கள், சாபங்கள் என்ற வார்த்தைகள் தெளிவாக புரிகின்றன அல்லவா?

கர்த்தராகிய தேவன், உன்னுடைய வாழ்க்கை என்னும் பூந்தோட்டத்தில் பரிசுத்த ஆராதனையையும், அன்பையும், இரக்கத்தையும், மன்னிப்பையும், தலைமைத்துவ ஊழியத்தையும், வளர்த்து, உன் மூலமாக உன் பிள்ளைகளும், உன்னை சுற்றிலும் உள்ளவர்களும் ஆசீர்வதிக்கப்பட வேண்டுமென்று விரும்புகிறார்! இதுவே கர்த்தர் நமக்கு கொடுக்கும் ஆசீர்வாதங்களாம்!

ஆனால் நீயோ அவருடைய சத்தத்துக்கு செவிகொடுக்காமல், அவருடைய வார்த்தைகளுக்கு கீழ்ப்படியாமல் போவாயானால், உன் வாழ்க்கையில் அசுத்தம் என்கிற களைகள் வளர்ந்து பூந்தோட்டமாய் பூத்து குலுங்க வேண்டிய உன் வாழ்க்கையை நெருப்புக்கு இரையாகும் வாழ்க்கையாக மாற்றிவிடும்! இதுவே கர்த்தர் நமக்கு கொடுக்கும் சாபங்களாம்!

ஆசீர்வாதமா? சாபமா? முடிவு செய்!

உங்கள் சகோதரி,

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

 

 

 

இதழ் 840 நீ வாலாகாமல் தலையாவாய்!

உபாகமம்:28:14 “ இன்று நான் உனக்கு விதிக்கிற உன் தேவனாகிய கர்த்தரின் கட்டளைகளைக் கைக்கொள்ளவும் அவைகளின்படி நடக்கவும், அவைகளுக்கு செவிகொடுத்து வந்தால் கர்த்தர் உன்னை வாலாக்காமல் தலையாக்குவார், நீ கீழாகாமல் மேலாவாய்.”

சில வருடங்களுக்கு முன் நான்  அலுவலகத்துக்கு போகும் வழியில் வயல்வெளிகள்இருந்தன! அந்த வயல்களில் வாத்துகள் கூட்டம் கூட்டமாய் வலம் வந்துக்கொண்டிருக்கும் அழகை அடிக்கடி நான் ரசிப்பதுண்டு. அதில் எப்பொழுதுமே ஒரு வாத்து முன்னால் இருக்கும், மற்றவை அனைத்தும் அந்த தலைவர் வாத்து போகிற திசையில் தான் திரும்புவார்கள்! யாராவது அவர்களை தொந்தரவு செய்தால் தலைவர் வாத்து இறக்கைகளை விரித்து சிறிது பறப்பதைப் பார்த்து மற்றவையும் இறக்கைகளை விரித்து பறக்க முயற்சி செய்யும். இதில் என்னைக் கவர்ந்த காரியம் என்ன தெரியுமா? முன்னால் போகிற வாத்தின் குரலை அல்ல அதின் நடக்கையைத்தான்  மற்றவை பின்பற்றும்!

இன்று நாம் வாசித்த வேதபகுதியில், ‘ஆசீர்வாதங்கள்’ என்ற பட்டியலில் தேவனாகிய கர்த்தர் நமக்கு, நீ வாலாகாமல் தலையாவாய் என்று தலைமைத்துவத்தை ஒரு ஆசீர்வாதமாகக் கொடுக்கிறார்.

நாம் கர்த்தருடைய வார்த்தைகளுக்கு கீழ்ப்படிந்து நடந்தால் எந்த சூழ்நிலையிலும் நாம் அவரை ஆராதிக்கிறவர்களாகவும், அவருக்கு மகிமையையும் கனத்தையும் கொண்டு வருகிறவர்களாகவும் இருப்போம் என்பதே இதன் அர்த்தம்! அவரே நம் வாழ்வில் முதலிடம் பெற்றிருப்பார்! அப்படிபட்ட சுகந்த வாசனையுள்ள வாழ்க்கையை நாம் வாழும்போது நாம் தலையாயிருப்போம் என்று கர்த்தர் வாக்குத்தத்தம் கொடுத்திருக்கிறார்.

 தலை என்ற  வார்த்தைக்கு எபிரேய மொழியில் சேனையின் தலைமை என்ற அர்த்தமுள்ள வார்த்தை உபயோகப்படுத்தப்பட்டுள்ளது! நாம் கர்த்தருடைய கட்டளைகளைக் கைக்கொண்டு வாழும்போது, அவருடைய முன்மாதிரியை பின்பற்றும்போது மற்றவர்கள் நம்முடைய நடக்கையை பின்பற்றுவார்கள்!

நம்முடைய தலைவராகிய இயேசு கிறிஸ்து நமக்கு, ஆண்டவரும் போதகருமாகிய நானே உங்கள் கால்களைக் கழுவினதுண்டானால் நீங்களும் ஒருவருடைய கால்களை ஒருவர் கழுவக்கடவீர்கள். நான் உங்களுக்கு செய்ததுபோல நீங்களும் செய்யும்படி மாதிரியைக் காண்பித்தேன்” என்றார். (யோவான்: 13:14,15)

அங்கேயிருந்த யூதாசுக்கு இதைத் தாங்கிக்கொள்ளவே முடியவில்லை. இவரைப் பின்தொடர்ந்தால் நான் தலையாயிருக்கலாம் என்று எண்ணினேன் இவர் என்னை மற்றவர்கள் காலைக் கழுவ சொல்கிறாரே என்று வெறுப்புடன் பார்த்தான். இன்று கூட திருச்சபையானாலும் சரி அல்லது அரசாங்கமானாலும் சரி , ஊழியம் செய்யும் தலைவர்களை உலகம் பெலவீனராகவே பார்க்கிறது! யூதாஸ் இயேசு கிறிஸ்துவை தலையாக அல்ல வாலாகப் பார்த்தான்! அவரைக் காட்டிக்கொடுக்கத் துணிந்தான்!

 ‘வால் என்ற வார்த்தைக்கு எபிரேய மொழியில் அர்த்தத்தைப் பாருங்கள்! நாம் அதன் அர்த்தம் ’கடைசியானது’ அல்லது ஒரு குவியலில் அடியில் இருப்பது என்று எண்ணுவோம்! ஆனால் அப்படியல்ல! அதன் அர்த்தம் பதர் என்பது. வாலாக இருப்பவர்கள் பதரைப் போல காற்றோடு செல்லுவார்கள்! காற்றடிக்கும் திசையில் அவர்கள் நம்பிக்கையும் விசுவாசமும் மாறும்! திடநம்பிக்கையற்றவர்கள்! மணலின்மேல் அஸ்திபாரம் போடப்பட்ட வீட்டைப் போல பெருங்காற்றில் வீழ்ந்து போவார்கள்!

கர்த்தராகிய இயேசு இன்று உன்னை வாலாக்காமல் தலையாக்குவேன்,  நீ கீழாகாமல் மேலாவாய் என்கிறார். உன்னை பலருக்கும் ஊழியம் செய்யும் தலையாக மாற்றுவேன் என்கிறார்! பலருக்கும் முன்மாதிரியான வாழ்கைக்கு உன்னை அழைக்கிறார்! இது கர்த்தர் உனக்கு கொடுக்கும் பெரிய ஆசீர்வாதம்! இழந்து போகாதே!

 உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

இதழ்: 839 மின்னலுடன் கூடிய மழை வரும்!

உபாகமம்: 28:12 ஏற்றகாலத்திலே உன் தேசத்திலே மழை பெய்யும், நீ கையிட்டுச்செய்யும் வேலைகளையெல்லாம் ஆசீர்வதிக்கவும்,கர்த்தர் உனக்குத் தமது நல்ல பொக்கிஷ சாலையாகிய வானத்தை திறப்பார்.

சில வருடங்களுக்கு முன்பு மே மாதத்தில் ஒருநாள், நாங்கள் காரில் பெங்களூருக்கு போய்க் கொண்டிருந்தோம். அன்று மழைக்கு எந்த அறிகுறியுமே இல்லை. சென்னையிலிருந்து வேலூர் வரை கடும் வெயில் காய்ந்து கொண்டிருந்தது! வேலூரைத் தாண்டி சற்று தூரம் சென்றவுடன் திடீரென்று மின்னல்களோடு, கருமேகத்துடன் மழை கொட்டியது. அப்படிப்பட்ட மழையை நான் இதுவரை பார்த்ததே இல்லை. என்றைக்குமே மழைக்கு பயந்து நாங்கள் வண்டியை ஓரமாக நிறுத்தியது கிடையாது! ஆனால் அன்று காரை ஒரு அடி கூட ஓட்ட முடியவில்லை. எல்லா வண்டிகளும் ஓரமாக நிறுத்தப்பட்டன. என்ன ஆச்சரியம் என்றால் தூரத்தில் இரண்டு மலைகளுக்கு நடுவே சூரியன் ஒளிவீசிக் கொண்டிருந்தது தெரிந்தது. நாங்கள் இருந்த இடத்தில் ஒரு இரண்டு கிலோமீட்டர் பரப்பளவுக்கு மட்டும் கருமேகத்துடன் மழை பெய்து எங்களுக்கு புத்துணர்சியைக் கொடுத்தது. நாங்கள் காரின் ஜன்னல்களை சிறிது இறக்கிவிட்டு சில்லென்று முகத்தில் விழுந்த மழைத்துளிகளை மிகுந்த ஆனந்தத்தோடே அனுபவித்தோம். சாலைகளும், சாலையோர மரங்களும், கழுவப்பட்டதுபோல் காட்சியளித்தது. மே மாத வெயிலில் வந்து கொண்டிருந்த நாங்கள் ஏதோ ஒரு பெரிய நீர்வீழ்ச்சியின் அடியில் நின்ற புத்துணர்வோடு பிரயாணத்தை தொடர்ந்தோம்!

இன்றைய வேதாம பகுதியில் ‘ஆசீர்வாதங்கள்’  என்ற பட்டியலில் ஏற்றகாலத்திலே உன் தேசத்திலே மழை பெய்யும் என்று மழையை நமக்கு ஒரு ஆசீர்வாதமாக கர்த்தர் கொடுக்கிறார்.

மழை நீர் அவ்வளவு முக்கியத்துவம் வாய்ந்ததா? என்று கேட்கலாம். வானத்திலிருந்து வரும் இந்த ஆசீர்வாதம், பூமியில் வாழும் நம்மையும், மிருகங்களையும், தாவரங்களையும் உயிருடன் வாழ உதவி செய்வது மட்டுமல்ல, அது ஒரே வடிவமாய் பூமிக்கு வந்தாலும் நம்மை வெவ்வேறுவிதமாய் ஆசீர்வதிக்கிறது அல்லவா? அதனால் தானோ என்னவோ நம்முடைய கர்த்தராகிய இயேசு கிறிஸ்து நமக்கு அருளிய பரிசுத்த ஆவியானவரை தண்ணீருக்கு ஒப்பிட்டு இவ்விதமாகக் கூறினார். நான் கொடுக்கும் தண்ணிரைக் குடிக்கிறவனுக்கோ ஒருக்காலும் தாகமுண்டாகாது; நான் அவனுக்கு கொடுக்கும் தண்ணீர் அவனுக்குள்ளே நித்திய ஜீவகாலமாய் ஊறுகிற நீரூற்றாயிருக்கும் என்றார்” (யோவா:4:14).

ஒருவேளை இன்று உன் வாழ்க்கை மழையில்லாமல் வறண்டுபோன பாலைவனம் போல இருக்கலாம்! அடி மேல் அடி! சோதனை மேல் சோதனை! எப்படி இவற்றையெல்லாம் தாங்குவது என்று நீ பெருமூச்சு விட்டுக்கொண்டிருக்கலாம்! அப்படித்தான் இருந்தது யோபுவின் வாழ்க்கை!

அவனுடைய் பணம், ஆஸ்தி, அந்தஸ்து எல்லாம் அழிந்து போயின! பிள்ளைகள் மரித்து போயினர்! உடம்பெல்லாம் ஒரே புண்! இவற்றின் மத்தியில் யோபு தேவனாகிய கர்த்தரைத் தேடி நான் தேவனை நாடி என் நியாயத்தை தேவனிடம் ஒப்புவிப்பேன்; ஆராய்ந்து முடியாத பெரிய காரியங்களையும், எண்ணிமுடியாத அதிசயங்களையும் அவர் செய்கிறார்என்றான். பின்னும் அவன்அவர் பூமியின்மேல் மழையை வருஷிக்கப்பண்ணி, வெளிநிலங்களின் மேல் தண்ணீர்களை வருவிக்கிறார்” (யோபு:5:9-11) என்று கர்த்தரை ஸ்தோத்தரிப்பதைப் பார்க்கிறோம்.

வறண்ட பாலைவனமாக இருந்த யோபுவின் வாழ்க்கையில் கர்த்தருடைய கிருபை மழையைப் போல வந்து புத்துணர்ச்சியை கொடுத்து அவன் தேவனுடைய மகத்துவத்தைப் போற்ற, தேவனை ஸ்தோத்தரிக்க அவனுக்கு உதவியது. அதே தேவன் இன்று உனக்கும் உதவி செய்வார்! யோபுவைப் போல கர்த்தரை நாடி, உன் கவலைகளை அவரிடத்தில் ஒப்புவி! தேவனுடைய கிருபை என்னும் மழைத்துளிகள் , வேதனையால் வறண்டு போயிருக்கும் உன் வாழ்க்கையின் மேல் படும்போது உனக்கு புத்துணர்ச்சி பிறக்கும்!

 “பின்மாரிகாலத்து மழையை கர்த்தரிடத்தில் வேண்டிக்கொள்ளுங்கள்; அப்பொழுது கர்த்தர் மின்னல்களை உண்டாக்கி …..மழையைக் கட்டளையிடுவார்.” (சகரியா: 10:1)

உன்னுடைய வாழ்க்கையின் வறட்சியைப் போக்க இன்று கர்த்தருடைய கிருபை என்னும் மழை தேவையா? கர்த்தரிடம் வேண்டிக்கொள்! மழை நிச்சயம் வரும்!

 

உங்கள் சகோதரி,

பிரேமா சுந்தர் ராஜ்

இதழ்: 838 பூவோடு சேர்ந்த நார் யாராயிருக்கும்?

உபாகமம்: 28:10  ”அப்பொழுது கர்த்தருடைய நாமம் உனக்குத் தரிக்கப்பட்டது என்று பூமியின் ஜனங்களெல்லாம் கண்டு, உனக்குப் பயப்படுவார்கள்.”

நான் கல்லூரியில் படித்த நாட்களில் நாங்கள் அனைவரும் பயந்த ஒரு பேராசிரியை இருந்தார்கள். அவர்களைக் கண்டால் பயம் என்றவுடன் அவர்களைப்பற்றி தவறாக நினைத்துவிடாதீர்கள். மரியாதையால் வந்த பயம். அழகும், நவீனமும், அறிவும், திறமையும் கொண்ட அவர்களை எங்கள் எல்லாருடைய உள்ளத்திலும் இடம் பிடித்துவிட்டார்கள். யாருடைய வகுப்பை தவற விட்டாலும் சரி, அவர்கள் வகுப்புக்கு சரியாக போய்விடுவோம் வேலையை சரியாக செய்துவிடுவோம். வகுப்பிலும் அவர்களுடைய பாராட்டுதல் என்பது எங்களுக்கு தேன் குடித்த மாதிரி இருக்கும், அவர்களுடைய எதிர்பார்ப்பு எங்கள் தகுதிக்கு மேலாக இருந்தாலும் அதை கஷ்டப்பட்டு செய்து முடித்து விடுவோம்.

இன்றைய ’ஆசீர்வாதங்கள்’ என்ற பட்டியலில் நாம் பார்க்கும் வேத வார்த்தை, கர்த்தருடைய நாமம் உனக்குத் தரிக்கப்பட்டது என்று பூமியின் ஜனங்களெல்லாம் கண்டு, உனக்குப் பயப்படுவார்கள், என்று சொல்லுகிறது!

முதலில் வாசிக்கும்போது இது கொஞ்சம் பயமாகவே இருந்தது. உங்களைக் கண்டவுடன், நீங்கள் கர்த்தரால் அழைக்கப்பட்டவர்கள், கர்த்தர் உங்களை ஆசீர்வதித்திருக்கிறார் என்பதை உணரும் மக்கள் பயந்து ஓடிவிடுவார்கள் என்றால் பயமாக இல்லையா? சிலநேரம் ஒருசிலரைக் கண்டு நான் கூட ஓடியிருக்கிறேன், ஏனெனில் அவர்களுக்கு வார்த்தைகளால் மற்றவர்களை கொல்லும் சக்தி அதிகம்! மற்றவர்களுடைய குற்றங்களை பகிங்கரமாக பட்டி மன்றம் போட்டு பேசுவார்கள்! அப்படிபட்டவர்களுக்குத்தான் பயந்து ஓடுவேன்.

ஆனால் இந்த வசனத்தின்படி கர்த்தருடைய நாமம் தரிக்கப்பட்ட நம்மைக் கண்டு ஏன் பயம்? இது நமக்கு கர்த்தர் கொடுக்கிற ஆசீர்வாதம். நாம் கர்த்தருடைய பிள்ளைகளாய் இருக்கும்போது நாம் உலகத்தாரோடு கொள்ளும் தொடர்பை இது காட்டுகிறது. கர்த்தர் நம் மேல் காட்டுகிற அளவில்லாத கிருபையினாலே, நாம் இரக்கத்தையும், பரிவையும், அன்பையும் மற்றவர்களிடம் காட்டுகிறோம். கண்ணாடியைப் போல அவருடைய அன்பை பிரதிபலிக்கிறோம். இதன் விளைவு என்ன? பூமியின் ஜனங்களெல்லாம் கண்டு, நமக்கு பயப்படுவார்கள்.

பூமியின் ஜனங்களெல்லாம் உனக்கு பயப்படுவார்கள் என்ற வார்த்தை எபிரேய மொழியில் எப்படி சொல்லப்பட்டிருக்கிறது பாருங்கள்! பூமியின் ஜனங்களெல்லாரும் உன்னைக் கண்டு, பயத்தோடு மரியாதை செலுத்தி, உன்னை கனம் பண்ணுவார்கள் என்று. ஏன் கனம் பண்ணுவார்கள்? இரக்கமில்லாத மக்களை நாம் நம் வாழ்க்கையில் கடந்து வரும்போது கூட நம்முடைய தேவனாகிய கர்த்தர் தகுதியில்லாத நம்மேல் காட்டிய கிருபையையும் இரக்கத்தையும் பிரதிபலிக்கிறோம்! இதில் ஆச்சரியமேயில்லை! நம்முடைய எல்லா பெலவீனங்களுக்கு மத்தியிலும் கர்த்தர் தம்முடைய அன்பை ஊடுருவ செய்து மற்றவர்களையும் அதை அடைய செய்கிறார்.

நம்முடைய தேவனாகிய கர்த்தருக்கு நாம் பயந்து, அவருக்கு கனத்தையும் மகிமையையும் கொடுத்து நாம் வாழும்போது, அவருடைய பிள்ளைகளாகிய நமக்கும் பூமியின் ஜனங்கள் முன்பு கனமும் மரியாதையும் உண்டு!

தமிழில் பூவோடு சேர்ந்த நாரும் மணக்கும் என்ற பழமொழியை கேட்டிருக்கிறீர்களா? கிருபையும், இரக்கமும், கனமும் , மகிமையும், மகத்துவமும் பொருந்திய தேவாதி தேவனுடைய பிள்ளைகளாகிய நாமும் அவருடைய சுகந்த வாசனையை , உலகத்தாருக்கு நம்முடைய சாட்சியினாலும், பரிவினாலும், இரக்கத்தாலும் பரவச்செய்ய வேண்டும் அல்லவா? அவ்வாறு செய்யும்போது நீயும் சுகந்த வாசனை பெறுவாய்!

உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

 

 

 

 

 

 

 

 

 

 

 

 

 

 

 

 

 

 

இதழ்: 837 தலைக்கு வந்த ஆபத்து கீழ்ப்படிதலால் போனது!

யாத்தி:4: 20, 24, 25 அப்பொழுது மோசே தன் மனைவியையும், தன் பிள்ளைகளையும் கழுதையின் மேல் ஏற்றிக் கொண்டு எகிப்து தேசத்துக்கு திரும்பினான்….

வழியில் தாங்கும் இடத்தில் கர்த்தர் அவனுக்கு வெளிப்பட்டு அவனைக் கொல்லப் பார்த்தார்.

அப்பொழுது சிப்போராள் ஒரு கருக்கான கல்லை எடுத்து, தன் புத்திரனுடைய  நுனித்தோலை அறுத்து, அதை அவன் கால்களுக்கு முன்பாக எறிந்து நீர் எனக்கு இரத்த சம்பந்தமான புருஷன் என்றாள்.

சிப்போராள் மோசேக்கு பாலைவனத்தில் கிடைத்த நீரோடை.  பல கனவுகளோடு அவள் மோசேயை மணந்தாலும் அவள் கனவுகள் எதுவும் பலிக்க வில்லை. அவளுக்கு மோசேயோடு கிடைத்தது 40 வருடங்கள் நாடோடியாய் கானானுக்கு போகிற வழியில் நடந்து திரிந்த வாழ்க்கைதான. அப்படி இருந்தபோ சிப்போராள் ஒரு நல்ல மனைவியாக வாழ்ந்தாள் என்று பார்த்தோம்.

இன்று சிப்போராளின் வாழ்க்கையில் காணப்பட்ட கீழ்ப்படிதல் என்னும் குண நலனைப் பற்றி சிறிது அறியலாம்!

கர்த்தர் மோசேயோடு பேசி, அவனை இஸ்ரவேல் மக்களை எகிப்தின் அடிமைத்தனத்திலிருந்து விடுவிக்கும்படியான பெரிய பொறுப்பைக் கொடுத்து எகிப்துக்கு திரும்பி போகும்படி கட்டளை கொடுக்கிறார்.

நாம் தியானிக்கிற இந்த சம்பவம் மோசே தன்னுடைய மனைவியோடும், பிள்ளைகளோடும் எகிப்த்துக்கு போகும் வழியில் சம்பவித்தது. அவன் தன் குடும்பத்தோடு தங்கிய இடத்தில்  கர்த்தர் அவனை  கொலை செய்ய முயற்சித்தார் என்று பார்க்கிறோம்.

இதை வாசிக்கிற உங்களைப் பற்றி தெரியவில்லை, ஆனால் எனக்கு கொஞ்சம் பயங்கரமாகத்தான்  தோன்றியது இந்த சம்பவம்!

இதை வாசிக்கும் நமக்கு,  கர்த்தர் ஏன் மோசேயிடம் இப்படி நடந்து கொண்டார்? இவரை எப்படி நான் நேசிப்பது என்ற எண்ணங்கள் வரலாம். தேவன் அன்பானவர், இரக்கமும், கிருபையும் உள்ளவர் என்று நாம் விசுவாசிப்போமானால், கர்த்தருடைய இப்படிப்பட்ட செயல்களுக்கு பின்னால் உள்ள அர்த்தத்தையும், அதன் மூலம் நாம் கற்றுக்கொள்ள வேண்டிய பாடத்தையும் நாம் அறிந்து கொள்ள வேண்டும்.

நாம் இன்று வாசிக்கிற வேத பகுதி நமக்கு மோசேயின் பிள்ளைகளில் ஒருவர் விருத்தசேதனம் பண்ணப்படாமல் இருந்ததைக் காட்டுகிறது.

கர்த்தர் தமக்கு சொந்தமான ஜனமாக இஸ்ரவேலைத் தெரிந்து கொண்டபோது அவர்களுக்கு விருத்தசேதனம் பண்ண வேண்டும் என்ற புது கட்டளையையும் கொடுத்தார். இதை ஏன் செய்யவேண்டும் என்று அவர்களுக்கு விளக்கி கூறியதாக வேதம் சொல்லவில்லை. இஸ்ரவேல் மக்கள் தேவனுடைய வார்த்தைக்கு கீழ்ப்படிந்தனர். மோசேயின் தாய் தகப்பன் இருவரும் தேவனுக்கு கீழ்ப்படிந்தவர்கள் ஆதலால் தங்கள் குமாரனாகிய மோசேக்கு நிச்சயமாக விருத்தசேதனம் செய்திருப்பார்கள்.

ஆனால் 40 வருடங்கள் எகிப்தின் அரண்மனையில் வாழ்ந்ததாலும், இன்னுமொரு   40 வருடங்கள் மீதியான் தேசத்தின் வனாந்திரத்தில் வாழ்ந்ததாலும் அவன்  விருத்தசேதனத்துக்கு முக்கியத்துவம் கொடுக்காமல் இருந்திருக்கலாம், அல்லது அதின் முக்கியத்துவத்தைப் பற்றி அவன் மனைவிக்கு எடுத்துரைக்காமல் இருந்திருக்கலாம்.

அதனால் அநேக வேதாகம வல்லுநர்கள் எண்ணுகின்றனர், மோசே தன்னுடைய மூத்த மகனுக்கு எபிரேய முறைப்படி விருத்தசேதனம் செய்திருப்பான், ஆனால் இளையவனுக்கு விருத்தசேதனம் செய்ய விடாமல் சிப்போராள் தடை செய்திருக்கக் கூடும் என்று. இது நமக்கு மோசேயின் இரு குமாரரில் ஒருவன் ஏன் விருத்தசேதனம் செய்யப்படவில்லை என்ற கேள்விக்கு பதில் கொடுக்கிறது அல்லவா?

தன்னுடைய கணவனுக்கு வந்த ஆபத்தைக் கண்டவுடன் சிப்போராள் ஒரு கருக்குள்ள கத்தியை எடுத்து, தன் புத்திரனின் நுனித்தோலை அறுத்தது எறிந்தது மாத்திரமல்லாமல், நீர்  எனக்கு இரத்தத சம்பந்தமான புருஷன் என்று கூறினது அவள் இந்த இரத்த சம்பந்தமான விதிமுறையை விரும்பவில்லை என்று தெரிகிறது.

இந்த சம்பவத்தில் கீழ்ப்படிதல் என்ற பெரிய பாடம் நமக்கு காத்திருக்கிறது.

மோசே மீதியான் தேசத்தில் போய் பெண் எடுத்த போது, அவன் அந்த தேசத்து பழக்க வழக்கங்களின் படி நடக்க ஆரம்பித்திருப்பான். தன் வாழ் நாள் முழுவதும் அந்த தேசத்தில் கழிந்துவிடும் என்று தானே நினைத்திருப்பான்? எகிப்துக்கு திரும்புவதை கனவில் கூட நினைத்திருக்கமாட்டான். அதேவிதமாய் சிப்போராள் முதலில் அவனை மணந்தபோது, மோசேயுடைய எபிரேய பழக்க வழக்கங்களில் ஆர்வம் காட்டியிருப்பாள். அதனால் தான் அவர்கள் முதல் பிள்ளைக்கு விருத்தசேதனம் செய்திருந்தனர். ஆனால் காலப்போக்கில் அந்த ஆர்வம் குன்றியிருக்கும்.   கர்த்தருடைய வார்த்தைக்கு செவிகொடுப்பதும், கீழ்ப்படிவதும் அவர்களிடம் குறைவு பட்டிருக்கும்.

இப்பொழுது மோசே இஸ்ரவேல் மக்களின் தலைவனாக எகிப்துக்கு செல்கிறான். தேவனாகிய கர்த்தர் தம்முடைய பிள்ளைகளான மோசேயும், சிப்போராளும் தேவனுடைய கட்டளைக்கு கீழ்ப்படியாதவர்கள், தங்கள் பிள்ளைக்கு விருத்தசேதனம் செய்யாதவர்கள் என்ற குறையோடு  இஸ்ரவேல் மக்களின் தலைமைப் பொறுப்பை ஏற்க விரும்பவில்லை. அதனால் வழியில் இடைப்பட்டு  சிப்போராள் தன் குமாரனுக்கு விருத்தசேதனம் செய்யாததால் மோசேயின் உயிருக்கு ஆபத்து நேரிடும் என்று வெளிப்படுத்துகிறார்.

சிப்போராளின் கீழ்ப்படிதல், அவள் கணவன் உயிரைக் காத்தது.

தேவனுடைய வார்த்தைக்கு செவிகொடுத்தலும், கீழ்ப்படிதலும், உன்னுடைய குடும்பத்தில் குறைந்து காணப்படுகிறதா? இன்று உன் குடும்பத்தில் இருக்கிற ஆபத்தான சூழ்நிலைக்கு உன் கீழ்ப்படியாமை காரணமாயிருக்கக் கூடும்! கீழ்ப்படியாமை நம் தலைக்கு கத்தியை கொண்டு வரும்! ஏனெனில் நாம் அவருடைய வார்த்தைக்கு செவிகொடுக்காமல் இருக்கும்போது கர்த்தர் நம்மைக் காத்து வழிநடத்த முடியாது. உன்னைக் காக்கிறவர் உறங்கார் என்ற வாக்குத்தத்தம் நமக்கு சொந்தமாகாது,

நாம் குடும்பமாக தேவனுடைய கட்டளைகளுக்கு கீழ்ப்படியும் போது கர்த்தர் நம்மை சுற்றி ஒரு பாதுகாப்பு வளையமிடுகிறார். அதை யாரும் முறிக்க இயலாது. நம்மைத் தொடுகிறவன் அவர் கண்மணியைத் தொடுகிறான் என்று கூறினார் அல்லவா?

பலிகளையல்ல கீழ்ப்படிதலையே நம் தேவன் நம்மிடத்தில் விரும்புகிறார்! சிப்போராளைப் போல கீழ்ப்படிந்து இந்த புதிய மாதத்தில் தேவனுடைய  ஆசீர்வாதத்தைப் பெற்றுக் கொள்ளுங்கள்!

 

உங்கள் சகோதரி

பிரேமா சுந்தர் ராஜ்

premasunderraj@gmail.com