Tag Archive | ஆபிரகாம்

இதழ்: 810 தனிமை என்றால் அர்த்தம் தெரியுமா?

ஆதி: 32: 27, 28 “ அவர் உன் பேர் என்ன என்று கேட்டார்; யாக்கோபு என்றான்.

அப்பொழுது அவர்; இனி உன் பேர் யாக்கோபு  என்னப்படாமல் இஸ்ரவேல் என்னப்படும், தேவனோடும், மனிதரோடும் போராடி மேற்கொண்டாயே என்றார்.”

யாக்கோபின் குடும்பத்தார் தேவன் காட்டிய புதிய வாழ்வைத் தேடி,தொடர்ந்து நடந்தனர். அவர்கள் எதிர்காலத்தை எதிர்நோக்கி செல்லும்போது இதோ ஏசா 400 பேர் கொண்ட பெரிய படையோடு யாக்கோபை எதிர்கொண்டு வருகிறான் என்று. 

யாக்கோபுக்கு தான் ஏசாவை ஏமாற்றி பிறப்புரிமையைப் பறித்தது தான் ஏசாவின் கோபத்துக்கு காரணம் என்று நன்கு தெரியும். அதனால் அதற்கு பரிகாரமாய் தான் சம்பாதித்த சொத்துகளில் ஒரு பங்கை ஏசாவுக்கு பரிசாக அனுப்பி, இதோ உமது அடியானாகிய யாக்கோபின் வெகுமதி என்று சொல்ல சொல்கிறான். வெகுமதி தன் சகோதரனின் கோபத்தை ஆற்றி விடும் என்ற எண்ணத்தில், ஐநூற்று எண்பது விலை உயர்ந்த மிருகங்களை மந்தை மந்தையாக பிரித்து  அனுப்புகிறான்.

நாம் பல நேரங்களில் முறிந்த உறவை புதுப்பிக்க முயற்சி செய்யும்போது, நம்முடைய செல்வாக்கினாலும், பொருளினாலும், உறவை வாங்கிவிடலாம் என்று நினைக்கிறோம். இதைவிட ஒரு படி மேலே போனால், நாம் கடவுளைக் கூட அப்படித்தான் நினைக்கிறோம். நாம் கொடுக்கும் காணிக்கையினாலும், நம் நல்ல செயல்களினாலும், நாம் நீதியான காரியங்களை கடைப்பிடிப்பதினாலும் கர்த்தரை நெருங்கிவிட முடியாது.

 நம் காணிக்கையோ, நம் செயல்களோ கர்த்தர் நம்மீது காட்டும் அன்புக்கும், இரக்கத்துக்கும் இணையாகாது.  நாம் தேவனை காணிக்கை கொடுத்து வாங்க முடியாது. பலியை அல்ல கீழ்ப்படிதலையே கர்த்தர் விரும்புகிறார் என்று வேதம் சொல்கிறது. 

இங்கே யாக்கோபின் இந்த நிலைக்கு காரணம் ஏசா அல்ல, யாக்கொபே தான். கர்த்தர்  யாக்கோபின் இந்த பிரச்சனைகளை எவ்வாறு தீர்த்து வைக்கப் போகிறார் என்று பார்ப்போம்.

வெகுமதிகளை அனுப்பிவிட்டு, யாக்கோபு தன் இரு மனைவிமாரையும், தன் இரு பணிவிடைக்காரிகளையும், தன் பதினொரு  பிள்ளைகளையும் கூட்டிகொண்டு யாப்போக்கு என்கிற ஆற்றைக் கடந்தான். அங்கு யாக்கோபு  அவர்களை முன் அனுப்பிவிட்டு பின் தங்கி தனியாக தரித்திருந்தான். அங்கே கர்த்தர் அவனை சந்திக்கிறார் என்று பார்க்கிறோம். 

தனிமை என்ற வார்த்தையின் அர்த்தம் தெரியுமா உனக்கு? எல்லாராலும் கைவிடப்பட்ட நிலை அல்லது எல்லா முயற்சிகளும் பயனில்லாமல் போன நிலை! இப்படிப்பட்ட நிலைக்கு நீ தள்ளப்பட்டிருக்கிறாயா? உன் தனிமையில் கர்த்தர் உன்னிடம் வருவார். 

இருபது வருடங்களுக்கு முன்பு கர்த்தர் பெத்தேலிலே யாக்கோபு தன் சகோதரனுக்கு பயந்து தனிமையில் ஓடிய போது  சந்தித்தார் . இப்பொழுது பெனியேலில் அவனை மறுபடியும் சந்திக்க வருகிறார்.

கர்த்தர் அவனோடு போராடினார் என்று வேதம் சொல்கிறது, நடுச்சாமத்தில் அவன் தான் போராடுவது கர்த்தர் என்று அறிந்து நீர் என்னை ஆசீர்வதித்தாலொழிய உம்மை போக விடேன்  என்று கெஞ்சுகிறான். அந்த வேளையில் தாமே கர்த்தர் யாக்கோபு என்கிற எத்தனை, ஏமாற்றுக்காரனை, தகப்பனையும் சகோதரனையும் வஞ்சித்தவனை, முற்றிலும் மாற்றி, அவனை இஸ்ரவேல் என்ற இளவரசனாக்கினார்.  அவனுடைய பயம் முற்றிலும் நீங்கிற்று. 

வேதம் சொல்கிறது அவனுடைய சகோதரனாகிய ஏசா அவனுக்கு எதிர்கொண்டு வந்து அழுது அவனை முத்தமிட்டு அணைத்தான் என்று. ஏசாவின் ஊழியக்காருக்கு முன்பாகவும், யாக்கோபின் குடும்பத்தாருக்கு முன்பாகவும் என்ன அருமையான சாட்சி! இந்த சமாதானம் யாக்கோபு அனுப்பிய வெகுமதிகளால் வந்ததா? அல்லது ஏசா அவனை பயமுறுத்தியதால் வந்ததா? இல்லவே இல்லை.

இந்த சமாதானம், ஆபிரகாமின் தேவனும், ஈசாக்கின் தேவனும், உன்னுடைய, என்னுடைய தேவனுமாகிய கர்த்தர் யாக்கோபின் வாழ்வின் கடந்த காலம் என்னும் இருளை நீக்கி, அவருடைய தயவினாலும், கிருபையினாலும் அவனுடைய நிகழ் காலத்தை நிரப்பி, தம்முடைய சித்தத்தின்படியான எதிர்காலத்தை அவனக்கு கொடுப்பேன் என்று வாக்கு கொடுத்ததினாலே வந்தது.

வாழ்வில் தனிமை என்ற கொடிய சூழ்நிலையில் இருக்கிறாயா? எல்லா முயற்சிகளும் தோல்வியடைந்து விட்டனவா? கடந்த காலத்தில் நடந்த பிரச்சனைகளால் நிம்மதி இல்லாமல் முறிந்து  போன உறவினால் மன வேதனையோடு இருக்கிறாயா? தனித்து தேவனுடைய சமுகத்துக்கு வா! அவர் உன்னை சந்திக்க வருவார்!

 

ஜெபம்:

ஆண்டவரே! யாக்கோபைப் போல என்னையும் ஆசீர்வதியும். என் வாழ்வில் உள்ள தோல்வி, பயம் எல்லாவற்றையும் நீக்கி, உம்முடைய தயவினாலும், இரக்கத்தினாலும் என்னை நிரப்பும். ஆமென்!

இதழ்: 806 வஞ்சித்தவன் வஞ்சிக்கப்பட்டான்!

ஆதி: 29:21 “ பின்பு யாக்கோபு லாபானை நோக்கி, என் நாட்கள் நிறைவேறினபடியால் என் மனைவியினடத்தில் நான் சேரும்படி அவளை எனக்குத் தர வேண்டும் என்றான்.”

சில தினங்களுக்கு முன்பு நாம் ரெபெக்காள் சதி திட்டம்  தீட்டி, யாக்கோபு ஏசாவைப் போல ஆள்மாறாட்டம் செய்து ஈசாக்கின் ஆசிர்வாதத்தைப் பெற செய்தாள் என்று பார்த்தோம். வேதத்தில் சில பக்கங்கள் புரட்டியவுடன் அவள் சகோதரன் லாபான் அதே விதமாக சதி திட்டம் தீட்டி, யாக்கோபுக்கு துரோகம் செய்கிறதைப் பார்க்கிறோம். சதி என்பது இவர்கள் இரத்தத்தில் ஓடிய குணம் போலும்! 

இந்த இடத்தில் சதி மன்னன் லாபானுடைய இளம் பிராயத்தை சற்று பார்ப்போம்.  ஆபிரகாமின் ஊழியக்காரன், ஈசாக்குக்கு பெண் தேடி, மெசொபோத்தாமியாவிலே நாகோருடைய ஊருக்கு வந்த போது, அவனிடம், பத்து ஒட்டகங்களில் தன் எஜமானின் எல்லா உச்சிதமான பொருள்களும் இருந்தன.

 ரெபெக்காள் தன் ஒட்டகங்களுக்கு தண்ணீர் வார்த்தவுடனே, (ஆதி:24:22) அவளுக்கு அரைச்சேக்கல் எடையுள்ள பொன் காதணிகளையும், பத்து சேக்கல் எடையுள்ள பொன் கடகங்களையும் பரிசளிக்கிறான். 

(ஆதி: 24:30) அவை யார் கண்ணில் முதலில் பட்டது தெரியுமா? அவள் சகோதரன் லாபான் கண்ணில் தான். அவன் ஒரு இருபதிலிருந்து, இருபத்து மூன்று வயதிற்குள் இருந்திருப்பான்.  வேதம் கூறுகிறது அவன் காதணிகளையும், கடகங்களையும் பார்த்தபோது, துரவண்டையில் ஓடி, ஆபிரகாமின் ஊழியக்காரனை வேகமாய் வீட்டுக்கு வரவழைக்கிறான். அவன் பேசுவதைப் பார்க்கும்போது அவன்தான் அந்த ராஜ்யத்தின் தலைவன் போல் இருக்கிறதல்லவா? இனிக்க இனிக்க பேசினான், அவன் தாய் தகப்பன் எங்கே என்று கூட தெரியவில்லை.

இன்னும் சில வசனங்கள் மேலே படிப்போமானால், லாபானும், அவன் தகப்பன் பெத்துவேலும், ரெபேக்களை ஈசாக்குக்கு கொடுப்பதாக வாக்கு கொடுத்தவுடனே, ஆபிரகாமின் ஊழியக்காரன் பரிசுகளை அள்ளி லாபானுக்கும் அவன் தாய்க்கும் கொடுப்பதைப் பார்க்கிறோம். இந்த திருமண பந்தத்தினால் லாபமடைந்தான் லாபான் என்று பார்க்கிறோம்.

இளம் பிராயத்திலேயே இப்படியான உலக ஆசை கொண்ட லாபான், யாக்கோபு இளமை துள்ள அவனிடம் வந்த போதே சதி திட்டம் தீட்டி விட்டான். யாக்கோபு ராகேல் மீது  கொண்ட அன்பு, லாபானின் சதியைக்  காணாதபடி, அவன் கண்களைக் குருடாக்கியது. ராகேலுக்காக ஏழு  வருடங்கள் அவனிடம் வேலை செய்யதான். ஏழு வருட முடிவில் ராகேலை கொடுக்கும் வேளையில் மேலும் சதி செய்து, ராகேலுக்கு பதிலாக அவள் சகோதரி லேயாளை கொடுத்து யாக்கோபை வஞ்சித்தான்.

ஒரு நிமிஷம்!!!!   வஞ்சித்தான் ( ஆதி: 29:25)  என்ற வார்த்தையை எங்கோ கேட்டிருக்கிறோம்!  ஆம்! ஏவாள் “ இந்த சர்ப்பம் என்னை வஞ்சித்தது” என்று (ஆதி: 3:13)  கூறியது நினைவிற்கு வருகிறது. வஞ்சித்தல் என்றால் என்ன? மயக்கமான வார்த்தைகள், ஏமாற்றுத்தனமான வாக்குகள், இவைகளை வாரியிறைத்து ஏமாற்றுவதுதான் வஞ்சித்தல் என்பது.

வஞ்சித்தல் சாத்தானின் குணங்களில் ஒன்று.  பெண்ணாசை, பண ஆசை, பதவி ஆசைகளை தூண்டிவிட்டி அவன் நம்மில் பலரை வஞ்சிக்கிறான். 

என்ன  பரிதாபம்! யாக்கோபு அவன் தகப்பன் ஈசாக்கை, வயதான காலத்தில், கண் பார்வை குறைந்த வேளையில், புத்திர சுவிகாரத்துக்காக வஞ்சித்தான். 

இப்பொழுதோ தன் மாமனாரால், தான் விரும்பாத ஒரு பெண்ணை மணக்க செய்ய வேண்டி வஞ்சிக்கப்படுகிறான்.

இன்று நம் வாழ்க்கையில், யாரும் காண முடியாத அந்த இருண்ட பகுதியில், நாம் யாரையாவது வஞ்சிக்கிறோமா? அல்லது சதி மன்னன் சாத்தானால் வஞ்சிக்கப்படுகிறோமா? என்று சிந்தித்து பாருங்கள்!

ஜெபம்:

ஆண்டவரே! நான் யாரையும் வஞ்சியாமலும், சாத்தானால் வஞ்சிக்கப்படாமலும் இருக்க எனக்கு பெலன் தாரும்.ஆமென்!

இதழ் 765 ஷ் கவனம்! பிள்ளைகள் பார்க்கிறார்கள்!

2 சாமுவேல் 13:1,2  இதற்குப்பின்பு தாவீதின் குமாரனாகிய அப்சலோமுக்குத் தாமார் என்னும் பேருள்ள சவுந்தரியமுள்ள ஒரு சகோதரி இருந்தாள். அவள்மேல் தாவீதின் குமாரன் அம்னோன் மோகங் கொண்டான்.

தன் சகோதரியாகிய தாமாரின் நிமித்தம் ஏக்கங்கொண்டு வியாதிப்பட்டான். 

தாவீது இஸ்ரவேலுக்கும், யூதாவுக்கும் ராஜா. ஒரு பாடகன்,  இசைக்கருவி வாசிக்கும் கலைஞன்,  ஒரு மகா பெரிய யுத்த வீரன். மற்றும் காதலில் மன்னன் கூட! அவன் மனது விரும்பும் யாரையும் அடையத் தவற மாட்டான் –  அரண்மனை நிறைந்திருந்த அவனுடைய மனைவிமாரும், பிள்ளைகளும் இதற்கு சாட்சி!

வெளியிலிருந்து பார்ப்பவர்களுக்கு தவீதுக்கு எல்லாமே இருந்தமாதிரிதான் இருந்திருக்கும். ஆனால் தாவீதின்  அரண்மனைக்கு உள்ளே புகைந்து கொண்டிருந்தது!

இந்த 13ம் அதிகாரம் தாவீதின் அரண்மனைக்கு உள்ளே நடந்த காரியங்களை நாம் பார்க்கும்படி திரையை விலக்குகிறது! தீர்க்கதரிசியாகிய நாத்தான் தாவீதிடம் கூறியவை நிறைவேற ஆரம்பித்தன! அவனுடைய பாவத்தின் விளைவை அறுக்க ஆரம்பித்து விட்டான்.

தாவீது பத்சேபாளின் கதை விறுவிறுப்பாக நடந்தபோது அவனுடைய பிள்ளைகளின் கண்கள் எல்லாவற்றையும் காணும், செவிகள் எல்லாவற்றையும் கேட்கும் என்பதை அவன் கவனிக்கவே இல்லை! தாவீது எதிர்பார்த்ததை விட அதிகமாகவே அவனுடைய பிள்ளைகள் பார்த்து விட்டார்கள் என்றுதான் நான் நினைக்கிறேன். அரண்மனையை சுற்றிவந்த கிசுகிசுப்பையும் அவர்கள் நிச்சயமாக கேட்டு விட்டார்கள்!

அதே பிள்ளைகள் சற்று வளந்தவுடன் தங்கள் தகப்பனைப்போல நினைத்தபடி வாழ ஆரம்பித்தார்கள்!  அப்பா செய்ததைப்போல அவர்களும் நடந்து கொள்ளலாம் அல்லவா!  முதலில் அவனுடைய மகனான அம்னோனிடம் அப்படிப்பட்ட நடத்தை ஆரம்பிக்கிறது!

அந்த கால கட்டத்தில் வாழ்ந்த ராஜாக்கள் அனைவரும் இப்படித்தானே பல மனைவிமாரோடும், மறுமனையாட்டியாரோடும், அநேக பிள்ளைகளோடும் வாழ்ந்தார்கள். தாவீது மட்டும் பல பெண்களோடு வாழ்ந்தது எப்படி தவறு ஆகும் என்று யோசிப்பீர்கள்! யாரோ எப்படியோ வாழலாம் ஆனால் கர்த்தரால் தெரிந்துகொள்ளப்பட்ட இஸ்ரவேல் மக்களும், தேவனால் அபிஷேகம் பண்ணப்பட்ட அவர்களுடைய ராஜாவும் அப்படி நடந்து கொள்ளும்போது அவர்களுக்கு துக்கமே முடிவானது நமக்கு ஆபிரகாம், சாராள், ஆகார் என்பவர்களின் கதையிலிருந்து தெரியும் அல்லவா!

அநேக மனைவிகளின் பிள்ளைகள் நடமாடிய அரண்மனையில் ஒருசில காரியங்கள் தலைதூக்க ஆரம்பித்தன! அண்ணன் தங்கை உறவை மீறி காதல் எழும்ப ஆரம்பித்தது!  அம்னோனுக்கு அவனுடைய தங்கை தாமார் மீது இச்சை எழும்பியது. அம்னோனுக்கும் தாமாருக்கும் ஒரே தந்தைதான்! அவர்களுக்குள் எந்த உறவு  ஏற்படுவதையும் கர்த்தர் ஏற்றுக்கொள்ள மாட்டார், அவனுடைய தந்தையும் ஏற்றுக்கொள்ள மாட்டார்.  இது நன்கு தெரிந்த அவனுக்கு ஏக்கம் பிடித்து விட்டது.

எப்படியாவது தாமாரை அடைய வேண்டும் என்ற ஏக்கம் நமக்கு எதை ஞாபகப்படுத்துகிறது? அவனுடைய தந்தையாகிய தாவீது பத்சேபாளை அடையவேண்டும் என்ற ஏக்கம் கொண்டதையல்லவா?

ஆம்! பிள்ளைகள் எல்லாவற்றையும் கவனித்தே வளர்ந்தனர். அவர்கள் பார்த்த எதுவும் பரிசுத்தமாக இல்லையே! தகப்பனிடத்தில் பார்த்ததைத்தானே அம்னோன்  இங்கு எதிரொலிக்கிறான்!

நம்முடைய பிள்ளைகள் நம்மைத்தானே எதிரொலிப்பார்கள்! நம்முடைய தினசரி வாழ்க்கையில் பிள்ளைகள் எதைப்பார்க்கிறார்கள்? நாம் தேவனோடு நடப்பதை அவர்கள் நம்மில் காண முடிகிறதா? அல்லது நாம் ஏமாற்றுவதையா? லஞ்சம் வாங்குவதையா? வயதான அம்மா அப்பாவை கேவலமாக நடத்துவதையா? இருட்டில் வாழும் வழ்க்கையையா?

பிள்ளைகள் நம்மைக் கவனிக்காத நேரத்தில் நாம் பின்னும் பாவம் வலையில் நம்முடைய பிள்ளைகளே சிக்கிக்கொளவார்கள் என்பது நாம் அனுபவிக்கும்போதுதான் புரியும் உண்மை! ஜாக்கிரதை!

உங்கள் சகோதரி

பிரேமா சுந்தர் ராஜ்

 

 

இதழ்: 742 தேவையா? இச்சையா?

2 சாமுவேல் 12: 4    அந்த ஐசுவரியவானிடத்தில் வழிப்போக்கன் ஒருவன் வந்தான். அவன் தன்னிடத்தில் வந்த வழிப்போக்கனுக்கு சமையல் பண்ணுவிக்க, தன்னுடைய ஆடுமாடுகளில் ஒன்றைப் பிடிக்க மனதில்லாமல், அந்த தரித்திரனுடைய ஆட்டுக் குட்டியைப் பிடித்து அதைத் தன்னிடத்தில்வந்த மனுஷனுக்கு சமையல் பண்ணுவித்தான் என்றான்.

ஆதியாகமத்தில் நாம் ஆபிரகாமின் குடும்பமும், லோத்தின் குடும்பமும் பலுகிப் பெருகிப்போனதைப் பார்க்கிறோம். இருவரும் பெரிய ஆஸ்தியை சேர்த்துவிட்டனர், அவர்களுடைய ஆடு மாடுகளுக்கு இடம் கொள்ளவில்லை. அதனால் ஆபிரகாம் தன்னுடைய குமாரனைப்போல இருந்த லோத்தை அழைத்து நமக்குள் எந்தப் பிரச்சனையும் இல்லாமல் உனக்குப் பிரியமான இடத்தை நீ பிரித்து எடுத்துக் கொள் என்றான்.

லோத்து தன் கண்களை ஏறெடுத்துப்பார்த்து யோர்தானின் சமனான வெளியைத் தெரிந்துகொண்டான். மிகவும் செழிப்பாக காணப்பட்ட அங்குதான் சோதோம் என்ற பட்டணமும் இருந்தது.

லோத்து உயரமான இடத்திலிருந்து பார்க்கும்போது,  நல்ல நீர் வளமுள்ள பச்சை பசேலென்ற சமவெளி ஒரு பெரிய தோட்டம் போலவும் சோதோமின் பள பளவென்ற வாழ்க்கை மிகவும் அழகாகவும் தெரிந்ததால், அவன் சோதோமை நோக்கி தன் கூடாரத்தைப் போட்டான் என்று வாசிக்கிறோம். ( ஆதி:13)

கண்ணுக்குத் தெரியும் அழகான வாழ்க்கை மீது கொண்ட  மோகம் ஆபிரகாமின் சகோதரன் மகனாகிய லோத்தை தன்னுடைய ஆவிக்குரிய தகப்பனாகிய ஆபிரகாமை விட்டும், ஆபிரகாமின் தேவனாகிய கர்த்தரை விட்டும் பிரித்து விட்டன. பின்னர் லோத்தின் குடும்பத்துக்கு நடந்தது நமக்குத் தெரிந்ததே!

லோத்து உயரமான இடத்திலிருந்து சோதோமைப் பார்த்தற்கும், தாவீது உய்ரமான இடத்திலிருந்து பத்சேபாளை பார்த்தற்கும் எந்த வித்தியாசமும் தெரியவில்லை! இருவரும் பெரிய பணக்காரர்கள்! பணத்தின் மேட்டிமையால் தாங்கள் விரும்பியதை அடைய ஆவல்.

இதைத்தான் நாத்தான் கூறும் கதையில் வரும் பணக்காரனும் செய்கிறான். பணத்தின் மேட்டிமையிருந்து அவன் கண்களை நோக்கிப் பார்த்தபோது அவ்னுக்குத் தென்பட்டது அந்த ஏழையின் அழகான செல்ல ஆட்டுக்குட்டிதான். அதை அடிக்க முடிவு செய்து விட்டான். இது அவனுடைய தேவை இல்லை! இச்சை!

ஆனால் மிகவும் உயரத்திலிருந்து தேவனாகிய கர்த்தர் அவர்களைப் பார்த்துக் கொண்டிருந்ததை லோத்தும், தாவீதும், இந்த பணக்காரனும் மறந்து விட்டார்கள்.

நீ இன்று உயரத்திலிருந்து  எதைப் பார்க்கிறாய், எது உன் கண்களில் பச்சையாக தெரிகிறது, எதை நீ அடைய இச்சிக்கிறாய், என்பதை கர்த்தர் மிகவும் உயரத்திலிருந்து பார்த்துக் கொண்டிருக்கிறார் என்பதை மறந்து விடாதே! உன்னுடைய தேவை என்பது வேறு, இச்சை என்பது வேறு! இதை கர்த்தர் நன்கு அறிவார்!

உங்கள் சகோதரி

பிரேமா சுந்தர் ராஜ்