Tag Archive | சவுல்

இதழ்: 779 நீண்ட நன்மையான வாழ்வு வேண்டுமா?

சங்: 34:11,12  பிள்ளைகளே வந்து எனக்குச் செவிகொடுங்கள், கர்த்தருக்குப் பயப்படுதலை உங்களுக்குப் போதிப்பேன். நன்மையைக் காணும்படி, ஜீவனை விரும்பி, நீடித்த நாட்களை அபேட்சிக்கிற மனிதன் யார்?

கொஞ்ச நாட்களுக்கு முன்பு ஆமைகளில் கலபகோஸ் என்ற ஒருவகையான ஆமை 100 – 170 வருடங்கள் வரை வாழும்  என்று படித்தேன். நான் ஒருவேளை 150 வருடங்கள் வாழ முடிந்தால் எப்படியிருக்கும்?என நினைத்தேன். ஆனால் இந்த பூமியில் அத்தனை வருஷம் வாழ்ந்தால் நான் என்ன செய்வேன் என்ற எண்ணமும் வந்தது! ஒரு தரமான, நன்மையான வாழ்க்கைக் கிடைக்குமானால் 150 வருடங்கள் வாழ நான் தயார்!

நன்மையான வாழ்வைப்பற்றி நான் சிந்திக்க ஆரம்பித்தவுடன் எப்படிப்பட்ட வாழ்க்கையை நாம் நன்மையான வாழ்வு என்று சிந்திக்கிறோம் என்ற கேள்வி எழுந்தது! ஒருவேளை அமெரிக்காவில் வாழ்பவர்களைப் பார்த்து அவர்கள் நன்மையான வாழ்வை வாழ்கிறார்கள் என்று நினைக்கலாம்! பல இலட்சம் சம்பாதிக்கும் நடிகர்களைப் பார்த்து?  நாம் உலகத்தில் சுற்றிப்பார்க்கும் நாடுகளின் எண்ணிக்கையைக் கொண்டு? நம்முடைய பெயருக்கு பின்னால் வரும் டிகிரிகளின் எண்ணிக்கையைக் கொண்டு? இன்னும் எதையெல்லாம் வைத்து நாம் நன்மையான வாழ்வு என்று கணக்கு போடுகிறோம்?

ப்ளாரன்ஸ் நைட்டிங்கேல் அம்மையார் பற்றிக் கேள்விப்பட்டதுண்டா? போரில் அடிபட்ட வீரர்களுக்கு  இரவும் பகலும் சேவை செய்த ஒரு நர்ஸ்! அவர்களுடைய பின்னணி என்ன தெரியுமா? இங்கிலாந்தில் ஒரு பெரிய பணக்கார குடும்பத்தை சேர்ந்தவர்! சிலர் விரும்பும் நல்ல வாழ்க்கை அது! அவருடைய அம்மாவும், சகோதரனும் தடுத்தும் அவர் தான் நர்ஸ் ஆக பணி செய்வதே தேவன் தன்னை அழைத்த அழைப்பு என்று நிச்சயமாக நம்பி தன்னை அந்த சேவைக்காக அர்ப்பணித்தார். அவருடைய சேவையை போர்க்காலத்தில் பார்த்தவர்கள் அவரை ஒரு தேவதூதனாகவே பார்த்தனர். அவர் எந்த ஆடம்பர வாழ்க்கைக்காகவும் தான் வாழ்ந்த கடினமான ஆனால் நன்மையான வாழ்க்கையை விட்டுக் கொடுக்கவில்லை!

நன்மையான வாழ்க்கையைப் பற்றி நாம் சிந்திக்கும் இந்த வேளையில், தாவீதை நாம் வாலிபனாக சந்தித்தபோது எப்படிப்பட்ட வாழ்க்கையை வாழ்ந்தான் என்று யோசித்துப் பாருங்கள்! அவன் ராஜாவாகிய சவுலுக்கு பயந்து காடு மேடு குகைகளில் வாழ்ந்த நாட்களில் அவன் தேவனாகிய கர்த்தரிடம் நெருங்கிய தொடர்பு கொண்டிருந்தான். தினமும் அவரோடு பேசி அவருடைய சித்தத்தை அறிந்து செயல்பட்டான். கடினமான சூழ்நிலையில் நன்மையான வாழ்க்கையை வாழ்ந்தான்.

ஆனால் அவனுக்கு இஸ்ரவேலின் சிங்காசனம் கிடைத்தபோதோ அதோடு அவனுக்கு வசதி, புகழ், பதவி  மற்றும் அநேக மனைவிமாரும் கிடைத்தனர். நாமெல்லாரும் மிகவும் விரும்பும் ஒரு நன்மையான வாழ்க்கை அது! தாவீதுக்கு எல்லாமே இருந்தது அல்லவா? ஆனால் அவனுடைய அரண்மனையின் நான்கு சுவருக்குள் நாம் எட்டிப் பார்க்கும்போதுதான் தெரிகிறது நாம் எல்லோரும் நினைக்கும் எந்த நன்மையானதும் அங்கு இல்லை என்று! என்ன பரிதாபம்! அவனுடைய இச்சையினால் ஏற்பட்ட கொலை! பாவத்தின் பலனாய் இழாந்த குழந்தை! அண்ணனே தங்கையை கற்பழித்த அபூர்வ கதை! பழிவாங்க காத்திருந்த சகோதரன்! விருந்துக்கு அழைத்து எதிர்பாராத வேளையில் சகோதரனை செய்த கொலை!  அப்பப்பா! நாமொன்று நினைக்க மற்றொன்று அல்லவா நடக்கிறது!

இன்று எதை நன்மையான வாழ்க்கை என்று நீ நினைக்கிறாய்? வசதியையும், ஆடம்பரத்தையுமா? அல்லது தேவனுடைய பிரசன்னம் நிரம்பிய, தேவனுடைய கரத்தால் வழிநடத்தப்படும் வாழ்க்கையையா? கர்த்தருக்கு பயப்படுதலே நீண்ட நன்மையான வாழ்க்கையை நமக்குக் கொடுக்கும்! அது கடினமான பாதையாயிருந்தாலும் அது நம்மை திருப்தியாக்கும்!

கர்த்தர்தாமே இந்த வசனங்கள் மூலமாக நம்மை ஆசீர்வதிப்பாராக!

 

உங்கள் சகோதரி

பிரேமா சுந்தர் ராஜ்

 

 

 

இதழ்: 709 ஆற்றல் மிக்க ஆறு அழிக்கும் சக்தியாய் மாறுவது போல!

2 சாமுவேல் 11:  அப்பொழுது தாவீது, அந்த ஸ்திரீ யார்  என்று விசாரிக்க ஆள் அனுப்பினான்.

இரண்டு வருடங்களுக்கு முன்பு இமாலய மலையில் உள்ள தரம்சாலா என்ற மலை நகருக்கு சென்றிருந்தோம். அங்கே எங்கள் விமானம் இறங்கியவுடன் என்னுடைய செல் போனில் ஒரு மெசேஜ் வந்தது. அங்கு உள்ள நதிகளின் ஒரங்களில் நடக்க வேண்டாம் என்ற எச்சரிக்கை அது. அங்கே நதிக் கரையோரம் சென்ற போதுதான் அந்த எச்சரிக்கையின் அர்த்தம் புரிந்தது.  நதிகளின் ஓரங்களில் பெரிய பெரிய பாறைகள் உருண்டோடி இருந்தன. பார்க்க அமைதியாய் ஓடிக்கொண்டிருந்த அந்த நதிகளில்  எதிர்பாராத வேளையில் வெள்ளம் பெருக்கெடுத்து ஓடும். பெரிய பாறைகள் உருண்டோடி வரும்.

நம்முடைய வாழ்க்கையும் ஒரு நதிபோல என்று யாரோ ஒருவர் கூறியது நினைவிற்கு வருகிறது. நம்மால் மற்றவர்களுக்கு ஆசீர்வாதமான ஒரு சக்தியாகவும் இருக்கமுடியும், மற்றவர்களை அழிக்கும் ஒரு சக்தியாகவும் மாற முடியும்.

தாவீது தன்னுடைய உப்பாரிகையின்மேல் ஓய்வெடுக்கும் வேளையில், குளித்துக் கொண்டிருந்த ஒரு பெண்ணைப் பார்த்தது மட்டும் அல்லாமல், அவளைப் பற்றி விசாரிக்கவும் ஆள் அனுப்பினான் என்று பார்த்தோம்.

இந்த “விசாரிக்க” என்ற வார்த்தை என்னை சற்று ஆழமாக சிந்திக்க வைத்தது. இந்த வார்த்தை வேதத்தில் பல முறை உபயோகப்படுத்தப்பட்டுள்ளது.  1 சாமுவேல் 23:2, தாவீது கர்த்தரிடத்தில் விசாரித்தான் என்று பார்க்கிறோம். 1 சாமுவேல் 28:6 ல் சவுல் கர்த்தரிடத்தில் விசாரித்தான் என்று பார்க்கிறோம். கர்த்தர் சவுலுக்கு பதிலளிக்காததால், அவனுக்கு  சாதகமாக பதிலளிக்க அஞ்சனம் பார்க்கும் ஒரு ஸ்திரீயை தேடி விசாரிக்க போனான் என்று 1 சாமுவேல் 28:7 சொல்கிறது.

இந்த வசனங்கள் இந்த வார்த்தையின் அர்த்தத்தை எபிரேய மொழியில் தேட வைத்தது. தாவீதும், சவுலும் கர்த்தரிடம் விசாரித்தார்கள் என்பது ‘ ஷாவால்’ என்ற வார்த்தை. அது ஆலோசனை வேண்டுவது என்று அர்த்தம். அவர்கள் தேவனாகிய கர்த்தரிடம் ஆலோசனையை வேண்டி சென்றார்கள்.

ஆனால் சவுல் அஞ்சனம் பார்க்கும் ஸ்திரீயிடம் விசாரிக்க சென்றதும், தாவீது பத்சேபாளை குறித்து விசாரிக்க ஆள் அனுப்பினதும் ‘ டாவ்ராஷ்’ என்ற வார்த்தை. இதன் அர்த்தம், ஒருவர் எதையாவது விரும்பி ஒரு குறிப்பிட்ட பாதையில் செல்வது.

தாவீதும் சவுலும் கர்த்தரை விசாரித்தபோது அவருடைய ஆலோசனையை விரும்பினர். ஆனால் இங்கோ தாவீதும் சவுலும் ஒரு தாங்கள் அடைய விரும்பிய ஒன்றை அடைய ஒரு குறிப்பிட்ட பாதையில் சென்றனர் என்பது எவ்வளவு உண்மை! தேவனாகிய கர்த்தரை வழிபடுவதைவிட்டு விலகி மனித ஆசைகளை வழிபட ஆரம்பித்தனர்.  தாங்கள் விரும்பியது நடக்க வேண்டும் என்று தாங்கள் தெரிந்து கொண்ட பாதையிலே சென்றனர்.

அமைதியான ஆறு கட்டுக்கடங்காமல் பெருக்கெடுத்து ஓடி அழிக்கும் ஆற்றலாக மாறுவது போல அவர்கள் வாழ்க்கை மாறிவிட்டது.

தாவீது பத்சேபாளைப் பற்றி விசாரிக்க ஆள் அனுப்பிய போது எதைக்குறித்து விசாரித்திருப்பான்? அவளைப்பற்றியோ அல்லது அவள் குடும்பத்தை பற்றியோ விசாரித்திருப்பானா?அல்லது அவளை தான் எப்படி அடைய முடியும் என்று விசாரித்திருப்பானா? அவன் விரும்பியதை அடைய முடிவு செய்துதான் விசாரிக்க ஆள் அனுப்பினான்.

நாம் யாரை விசாரிக்கத் தெரிந்து கொள்கிறோம் என்பது தான் முக்கியம்! கர்த்தரின் ஆலோசனையையா அல்லது நம்முடைய சரீரத்தின் ஆவல்களை பூர்த்தி செய்யும் காரியத்தையா? வேத வார்த்தைகள் நம்மோடு பேசும் என்று நம்புகிறேன்.

உங்கள் சகோதரி

பிரேமா சுந்தர் ராஜ்

 

 

 

இதழ்: 666 பெயரை அழிக்கும் அவதூறு!

2 சாமுவேல் 3: 7 – 8 சவுலுக்கு ஆயாவின் குமாரத்தியாகிய ரிஸ்பாள் என்ன்னும் பேருள்ள ஒரு மறுமனையாட்டி இருந்தாள். இஸ்போசேத் அப்னேரை நோக்கி: நீ என் தகப்பனாருடைய மறுமனையாட்டியினிடத்தில் பிரவேசித்தது என்ன என்றான். அப்னேர் இஸ்போசேத்தின் வார்த்தைகளுக்காக மிகவும் கோபம் கொண்டு……. என்னை நீர் இன்று ஒரு ஸ்திரீயினிமித்தம் குற்றம் பிடிக்கிறதற்கு, நான் யுதாவுக்கு உட்கையான ஒரு நாய்த்தலையா?

தேர்தல் போர் என்ற தலைப்பில் அவ்வப்பொழுது செய்தி வருவதை நாம் பார்த்துக்கொண்டிருக்கிறோம். உண்மைக்கு தட்டுபாடு ஆகிய நிலமை நமக்கு ஏற்பட்டுள்ளது. ஒருவரையொருவர் சரமாரியாக குற்றம் சாட்டி வருகின்றனர்.ஒருவரின் பெயரை தரமட்டமாக பேசி அழிப்பதையே மற்றவர் குறிக்கோளாக கொண்டுள்ளனர்.

இன்றைய வேதாகமப்பகுதி நமக்கு, கர்த்தருடைய வார்த்தை இன்றைய சூழ்நிலைக்கு  எப்படி பொருந்துகிறது என்று காட்டுகிறது. பல ஆயிரம் வருடங்களுக்கு முன்பு நடந்த ஒரு சம்பவமாயிருந்தாலும், நம்முடைய வாழ்வுக்குத் தேவையான பாடத்தை நாம் இதிலிருந்து கற்றுக்கொள்ள முடிகிறது.

இந்தக் கதையை நீங்கள் முன்பு வாசித்ததுண்டா? நான் வேதத்தை பலமுறை வாசித்திருந்தாலும் உண்மையில் இந்தக் கதை எனக்கு ஞாபகமே இல்லை!

இதன் பின்னணியை சற்று சுருக்கமாக சொல்கிறேன்.

ஒருவன் செய்த உதவிக்கு நன்றி செலுத்தாமல், அதற்கு பதிலாக தீங்கு செய்ய நினைத்த சவுலின் குடும்பத்தில் வளர்ந்தவன் தான் அவனுடைய இளைய குமாரன் இஸ்போசேத். சவுலின் மரணத்துக்கு பின்னர் அவனுடைய படைத்தலைவனாகிய அப்னேர், இஸ்போசேத்தை இஸ்ரவேலின் ராஜாவாக்கினான். அதற்காகத் தன் காலமெல்லாம் நன்றியோடு இருக்கவேண்டிய இஸ்போசேத், அப்னேர் தன்னுடைய குடும்பத்தில் பலத்தவனாயிருப்பதைக் கண்டு அவன் மேல் வீண்பழி சுமத்துகிறான்.

மிகக் கொடிய முறையில் அப்னேர் தன் தகப்பனாகிய சவுலின் மறுமனையாட்டியை தனக்கு சொந்தமாக்கியதாகப் பழி போடுகிறான்.

மறுமனையாட்டி என்பது ராஜாக்களின் காலத்தில் விரும்பி ஏற்றுக்கொள்ளப்பட்ட ஒரு வாழ்க்கை. இது  வேசித்தனம் அல்ல! இரண்டாவது மனைவியாக வாழ்க்கைப்படுவதுதான். அநேக ஏழைப் பெண்கள் இப்படி இரண்டாவது அல்லது மூன்றாவது மனைவியாக மனப்பூர்வமாக மணம் செய்வது வழக்கம். இங்கே சொல்லப்பட்ட  ரிஸ்பாள் சவுலின் மறுமனையாட்டி, சவுலுக்கு சொந்தமானவள். சவுலின் குடும்பத்தை சேர்ந்தவள்.

இஸ்போசேத் இங்கு கணவனை இழந்த ஒரு ஏழைப் பெண்ணைத் தனக்கு சாதகமாக உபயோகப்படுத்தி அப்னேர் மேல் பழி சுமத்துகிறான். ஆனால் அப்னேர் கை கட்டிக்கொண்டு அந்தப்பழியை ஏற்கவில்லை! அதற்கு பதிலடி கொடுக்க முடிவெடுக்கிறதைப் பார்க்கிறோம்.

இதை வாசிக்கும்போது, அப்னேரைப்போன்ற உண்மையான ஒரு நண்பனின் பெயரைக் கெடுக்க இஸ்போசேத் எப்படித் துணிந்தான் என்று தான் நினைக்கத் தோன்றியது.

நாம்கூட சிலநேரங்களில் நம்முடைய நண்பர்களைப்பற்றி வீண்காரியங்களைப் பேசுவதில்லையா? ஒருவேளை அது அந்த நண்பரின் காதுக்கு எட்டுமாயின் அவர் மனது புண்படுமே என்று நினைப்பதேயில்லை!

அதே சமயத்தில் நண்பர்களைப் பற்றி பேசப்படும் அவதூறுகளை செவி கொடுத்து கேட்பதும் தவறே!

ஒருவரைப்பற்றி  அவதூறு சொல்வதை விட பெரிய கெடுதி நாம் யாருக்குமே இழைக்க முடியாது. நாம் பேசும் ஒரே ஒரு வார்த்தையில் கூட ஒருவரின் பெயரை அழித்துவிடலாம்.

கர்த்தர் இப்படிப்பட்ட பாவத்திலிருந்து நம்மைக் காத்துக் கொள்ளும்படி ஜெபிப்போம்.

உங்கள் சகோதரி

பிரேமா சுந்தர் ராஜ்

 

 

 

இதழ்: 663 ஒரு உயர்ந்த மனிதனின் தாழ்ந்த மரணம்!

1 சாமுவேல் 31:1-6 பெலிஸ்தர் இஸ்ரவேலரோடே யுத்தம் பண்ணினார்கள்…..சவுலுக்கு விரோதமாய் யுத்தம் பலத்தது. வில்வீரர் அவனைக் கண்டு நெருங்கினார்கள். அப்பொழுது சவுல் வில்வீரரால் மிகவும் காயப்பட்டு, தன் ஆயுததாரியை நோக்கி….. நீ உன் பட்டயத்தை உருவி என்னைக் குத்திப்போடு என்றான். அவனுடைய ஆயுததாரி மிகவும் பயப்பட்டதினால் அப்படிச் செய்யமாட்டேன் என்றான்.  அப்பொழுது சவுல் தன் பட்டயத்தை நட்டு அதின்மேல் விழுந்தான்.

சவுல் ஒரு திறமைசாலி! நேர்முகமான நோக்கம் கொண்டவன்! எல்லாவற்றுக்கும் மேலாக தேவனால் தெரிந்துகொள்ளப்பட்டவன்! ஆனால் என்ன நடந்தது அவன் வாழ்க்கையில்? அவனுடைய முடிவு எப்படியாயிற்று பாருங்கள்!

அவனுடைய வாழ்க்கையை சற்றுத் திரும்பி பார்ப்போமானால், அவன் அமலேக்கியருடன் செய்த யுத்தத்தில் கர்த்தருடைய வார்த்தைக்குக் கீழ்ப்படியாமல் போனது நமக்கு ஞாபகத்துக்கு வரலாம். அங்கிருந்து அவன் ஒரேயடியாக சறுக்கிக் கீழே வந்து கொண்டிருந்தான்!

சவுல் வெகு சீக்கிரமாகவே மிகப்பெரிய பிரச்சனைக்குள்ளானான்.  ஏனெனில் அவன் தன்னை மிகப்பெரியவனாகக் கருதினான். அந்த எண்ணம்தான் அவனை கீழே தள்ளிவிட்டது.

ஏதேன் தோட்டத்தில் இருந்த ஆதாமும் ஏவாளும்தங்களுக்கு கடவுளைவிட அதிகமாக எல்லாம் தெரியும் என்று எண்ணியதுபோல, சவுலும் எண்ணினான்!  நான்கூட சிலவேளைகளில் முட்டாள்தனமாக அவ்வாறு எண்ணியதுண்டு! அந்த எண்ணம் எப்பொழுது வரும் தெரியுமா? என் வாழ்க்கையில் எல்லாமே சுமூகமாக செல்லும்போதுதான்!  அந்த சமயத்தில்,  நான் எல்லாவற்றையும் எளிதாக செய்துவிடுவேன், என் வாழ்க்கையை என்னால் நடத்த முடியும் என்று எண்ணியிருக்கிறேன்!

அப்படியாக நினைத்த சவுல் ஒருநாள் பெலிஸ்தியர்  பாளையம் இறங்கியதைக் கண்டவுடன் நடுங்கிப் போய்விட்டான்!

இப்படி என்றாவது உங்கள் வாழ்க்கையில் நடந்தது உண்டா? உங்கள் வாழ்க்கைக்கு நீங்கள்தான் மாலுமி, எல்லாமே நன்றாக நடக்கிறது என்று நினைத்துக் கொண்டிருக்கும் போது, திடீரென்று வீசிய ஒரு புயல்! உங்களால் எதுவுமே செய்ய முடியாது என்று உணர்ந்து என்ன செய்வது என்று புரியாமல் பயத்தில் நடுங்கிய அந்த வேளை!

கடைசியில் சவுல் என்ற திறைமைசாலி, கர்த்தரால் தெரிந்து கொள்ளப்பட்டவன், சாமுவேலால் அபிஷேகிக்கப்பட்டவன் எப்படி முடிவடைகிறான் என்று பாருங்கள்! ஒருகாலத்தில் ந்மிர்ந்து நின்ற இஸ்ரவேலின் முதல் ராஜா, இன்று பட்டயத்தின் மேல் விழுந்து தன் வாழ்வை முடிக்கிறான்! தேவனை மறந்ததால் சவுல் மரணத்தை ஆதாயமாக்கினான்.

கர்த்தருடைய வார்த்தைக்குக் கீழ்ப்படியாமல் அவரை நாம் ஏமாற்றுவதாக நினைத்தால், நாம் அவரையல்ல, நம்முடைய ஆத்துமாவைத்தான் ஏமாற்றுகிறோம் என்பதை மறக்கவேண்டாம்!

உங்கள் சகோதரி,

பிரேமா சுந்தர் ராஜ்

இதழ் : 661 உன்னை வஞ்சிப்பவன் யார்?

1 சாமுவேல்: 28: 24,25 அந்த ஸ்திரீயினிடத்தில் கொழுத்த கன்றுக்குட்டி ஒன்று வீட்டில்  இருந்தது. அதைத் தீவிரமாய் அடித்து, மா எடுத்துப் பிசைந்து, அதைப் புளிப்பில்லாத அப்பங்களாகச்சுட்டு, சவுலுக்கும், அவன் ஊழியக்காரர்களுக்கும் முன்பாகக் கொண்டுவந்து வைத்தாள். அவர்கள் புசித்து எழுந்திருந்து…

ஒரு பள்ளியில் ஆசிரியை ஒருவர் தன் பிள்ளைகளிடம் யாராவது ஒருவரின் முகத்தை வரையும்படி கூறினார். அந்த சிறு குழந்தைகள் வரைய ஆரம்பித்தனர். அந்த ஆசிரியை ஒவ்வொருவரும் என்ன வரைகிறார்கள் என்று சுற்றிப் பார்த்தார். ஒருசிலர் தாங்கள் வரைந்த முகத்துக்கு அம்மா என்று பேரிட்டனர், சிலர் அக்கா என்றும், சிலர் தாத்தா என்றும் வரைந்திருந்தனர். ஆனால் ஒரு சிறு பெண் மாத்திரம் தான் வரைந்ததற்கு பெயர் கொடுக்கவில்லை. அதைக்கண்ட ஆசிரியை, நீ யாரை வரைகிறாய் என்று கேட்டார். அந்த சிறுபெண் உடனே, கடவுளை வரைகிறேன் என்றாள். அதற்கு ஆசிரியை, கடவுளை யாரும் கண்டதில்லை, கடவுளின் முகம் எப்படி இருக்கும் என்று யாருக்கும் தெரியாது, பின்னே எப்படி உன்னால் வரைய முடியும் என்றார். அதற்கு அந்த சிறுபெண், அப்படியானால் இனிமேல் எல்லோருக்கும் தெரியவரும்  என்று உடனே பதிலளித்தாள்.

இந்தக் கதை எனக்கு மிகவும் பிடிக்கும் ஏனெனில் நாம் கூட பலருடைய முகங்களை கற்பனை பண்ணி வைத்திருக்கிறோம். ஓய்வு நாள் பாடசாலையில் கேட்ட கதைகளையெல்லாம் கற்பனையில் காண்பதில்லையா? ஏன் கடவுள் எப்படியிருப்பார், சாத்தான் எப்படியிருப்பான் என்றுகூட நமக்கு கற்பனையில் தெரியும். விசேஷமாக சாத்தான் என்றவுடன் நாம் ஒரு பயங்கரமானஉருவத்தைதான் நினைப்போம். ஆதியாகமம் 3:1 ல் சாத்தான் பயங்கர ரூபத்தில் வந்து ஏவாளை பயமுறுத்தவில்ல, மாறாக தந்திரமாய்ப் பேசக்கூடிய சர்ப்பமாய் வந்தான் அல்லவா?

சவுல்,பெலிஸ்தியரின் பாளயத்தைக் கண்டு அஞ்சி,  பொல்லாங்கைத் தேடி சென்றான் என்று பார்த்தோம். எந்தோரில் ஒரு அஞ்சனம் பார்க்கும் ஸ்தீரியிடம் சென்றான், அவளோ அவனிடம் மிகவும் கருணையாக நடந்து கொள்வதை இன்றைய வேதாகமப் பகுதியில் பார்க்கிறோம். அவனுக்கு விருந்தே சமைத்துக் கொடுக்கிறாள் அந்தப்பெண்.

சவுலுக்கு அவ்வப்போது ஆலோசனைத் தேவைப்படும்போது யாரவது ஆலோசனைக் கொடுத்து, அவன் பயத்தை நீக்க வேண்டும். இது அவனுடைய பழக்கம். அதனால்தான் சாமுவேலைத்தேடி ஓடுவான். இப்பொழுது சாமுவேல் இல்லை, அதனால் இந்த ஸ்திரியிடம் வந்திருக்கிறான்.இங்கே சாத்தான் இந்தப் பெண்ணின் ரூபத்தில் சவுலின் சரீரப்பிரகாரமானத் தேவைகளை சந்திக்கிறான்.

இந்த சம்பவம் நமக்கு ஒரு பெரிய பாடத்தைக் கொடுக்கிறது. சாத்தான் என்றுமே நம்மை பயப்படுத்தும் ரூபத்தில் நம்மிடம் வருவதே இல்லை. நமக்குப் பிடித்த, நம்முடைய உடனடி ஆசைகளை நிறைவேற்றும் ரூபத்தில் தான் நம்மிடம் வருவான். நாம் ஏமாந்துவிட்டோம் என்று உணருவதற்குள் நாம் அவன் வலையில் சிக்கி விடுவோம்.

சோர்ந்து போயிருந்த சவுலுக்கும், அவனுடைய ஊழியருக்கும் நல்ல சாப்பாடோடு வந்தான் சாத்தான். அது அந்த வேளையின் தேவையாயிருந்தது. நாம் பலமாக இருக்கையில் நம்மை அணுகமாட்டான் சாத்தான். நம்முடைய பலவீன வேளையில்தான் நம்மை நெருங்குவான். நம்முடைய பலவீனத்தை நம்மைவிட அகிகமாக அறிந்தவன் அவன்!

இன்று யாருடைய ரூபத்தில் சாத்தான் உன்னை ஏமாற்றிக்கொண்டிருக்கிறான்? நவீனமயமாகக் கூட சாத்தான் வருவான்! தன்னை தேவதூதனைப் போல மாற்றி வந்து கூட உன்னை ஏமாற்றுவான்! சிற்றின்பங்களை அள்ளி அள்ளித் தருவான்!  அவன் வஞ்சிக்கிறான் என்று உணரும் முன்பே நீ அவன் வலையில் விழுந்துவிடுவாய்!

ஜாக்கிரதை!  ஒவ்வொருநாளும் உன்னை சுற்றி வேலியடித்து உன்னைக் காக்கும்படி கர்த்தரிடம் மன்றாடு!

உங்கள் சகோதரி,

பிரேமா சுந்தர் ராஜ்

 

 

 

இதழ்: 660 பொல்லாங்கை விட்டு விலகு!

1 சாமுவேல் 28:7 அப்பொழுது சவுல் தன் ஊழியக்காரரை நோக்கி: அஞ்சனம் பார்க்கிற ஒரு ஸ்திரீயைத் தேடுங்கள். நான் அவளிடத்தில் போய் விசாரிப்பேன் என்றான்.அதற்கு அவனுடைய ஊழியக்காரர்: இதோ எந்தோரில் அஞ்சனம்பார்க்கிற ஒரு ஸ்திரீ இருக்கிறாள் என்றார்கள்.

குறி சொல்கிறவர்கள், பில்லி சூனியம் செய்கிறவர்கள், மந்திரவாதிகள், தந்திரவாதிகள் என்று பலவிதமானவர்கள் நம்முடைய நாட்டில் நம்மை சுற்றி இருக்கிறார்கள். விக்கிரகாராதனையாலும், ஆவிகளாலும் நடத்தப்படும் இவர்களைவிட்டு விலகியிருக்க வேண்டும் என்று வேதாகமம் நமக்கு கற்றுக்கொடுத்திருக்கிறது.

கர்த்தருடைய கட்டளைக்கு இணங்க, குறிசொல்லுபவர்களும், அஞ்சனம் பார்ப்பவர்களும் இஸ்ரவேலை விட்டுத் துரத்தப்பட்டனர் என்று 28 ம் அதிகாரத்தில் பார்க்கிறோம். இஸ்ரவேலில், வானத்தையும், பூமியையும் படைத்த சர்வ வல்லவராகிய கர்த்தர்  ஒருவரே ஆராதிக்கப்பட வேண்டும் என்று அவர் விரும்பினார்.

சவுல் பெலிஸ்தியரின் பாளயத்தைக்கண்டு பயந்து கர்த்தரை விசாரிக்கும்போது அவனுக்கு எந்தப்பதிலும் கிடைக்கவில்லை. தீமையோடு விளையாடிக்கொண்டிருந்த அவனுக்கு ஆலோசனைக் கொடுக்க கர்த்தர் அவனோடு இல்லை.

ஆதலால் சவுல் ராஜா தன் ஊழியக்காரரைப் நோக்கி, அஞ்சனம் பார்க்க ஒருவரைத் தேடுமாறு கூறினான். அவனுடைய ஊழியர் அவனை உடனே எந்தோரில் இருக்கும்  ஆவிகளோடு தொடர்ப்புள்ள ஒரு பெண்ணிடம் அனுப்பினர்.

இன்றைய வேத பகுதியில்,அஞ்சனம் பார்க்கிற ஒரு ஸ்திரீயைத் தேடுங்கள் என்ற வார்த்தை என் கருத்தைக் கவர்ந்தது. வேதம் முழுவதும் தீமையை விட்டு விலகும்படி கர்த்தர் உத்தரவு கொடுத்திருக்க, இங்கு ஒருவன் தன் வாழ்நாள் முழுவதும், தேவனுக்குக் கீழ்ப்படியாமல் வாழ்ந்தது மட்டுமல்லாமல், ஆபத்து தலைக்கு மேல் வந்தபோதும் பொல்லாங்கைத் தேடுகிறான் என்று பார்க்கிறோம். அவன் ஏதோ தீமையை எதிர்பாராத விதமாக சந்திக்க வில்லை! அதைத் தேடிப் போகிறான்!

பவுல் 1 தெசலோனிக்கேயர் 5:22ல் பொல்லாங்காய்த் தோன்றுகிற எல்லாவற்றையும் விட்டு விலகுங்கள் என்று கூறுகிறதைப் பார்க்கிறோம்.

பல ஆண்டுகளுக்கு முன்பு டெல்லியில்  போதை மருந்துக்கு அடிமையான வாலிபருக்காக ஏற்படுத்தப்பட்ட மறுவாழ்வு மையத்தில் நாங்கள் ஒருவருட பயிற்சிக்காக அனுப்பப்பட்டோம். அங்கு இருந்த வாலிபருக்கு ஒரு விதி வழங்கப்பட்டிருந்ததை நான் கவனித்தேன். அவர்கள் சில இடங்களுக்கு போகவேக் கூடாது, சிலரை சந்திக்கவேக் கூடாது. அந்த இடங்களில் அவர்களுக்கு சலனம் அதிகம் இருக்கும் என்றதால் தான் அந்த விதிமுறை கொடுக்கப்பட்டது.

நம்  ஒவ்வொருவருக்கும்  சலனம் வேறு வேறு வழிகளில் வரலாம். ஆனால் கர்த்தருடைய வார்த்தை ஒன்றுதான்! பொல்லாங்காய்த் தோன்றுகிற எல்லாவற்றையும் விட்டு விலகுங்கள்!

சிங்கம் இருக்கிறது என்று அறிந்து, அதின் குகைக்குள் நடக்கலாமா? அதைதான் சவுல் செய்தான்! பொல்லாங்கைத் தேடிப் போனான். எத்தனை பரிதாபமான செயல்!  அவனை நேசித்த, அவனை சிறுமையிலிருந்து தூக்கிய, இஸ்ரவேலின் ராஜாவாக்கிய, கிருபையும், இரக்கமும் நிறைந்த தேவனாகிய கர்த்தரை விட்டு விட்டு பொல்லாங்கைத் தேடிக் கொண்டான்!

பொல்லாங்கைத் தேடிய சவுலின் வாழ்க்கை நல்லபடியாக முடியவில்லை என்பது எனக்கும் உங்களுக்கும் இன்று ஒரு பாடமாக அமையட்டும்!

ஆகையால் தேவனுக்குக் கீழ்ப்படிந்திருங்கள். பிசாசுக்கு எதிர்த்து நில்லுங்கள், அப்பொழுது அவன் உங்களைவிட்டு ஓடிப்போவான். (யாக்:4:7)

உங்கள் சகோதரி,

பிரேமா சுந்தர் ராஜ்

(contact me at premasunderraj@gmail.com)

 

 

 

 

இதழ்: 659 தீமையின் பலன் பயம்!

1 சாமுவேல் 28:3 – 5  சாமுவேல் இதற்கு முன்னமே மரித்துப் போனான்….. பெலிஸ்தர் கூடிவந்து சூநேமிலே பாளயமிறங்கினார்கள். சவுலும் இஸ்ரவேலர் எல்லாரையும் கூட்டினான். அவர்கள் கில்போவாவிலே பாளயமிறங்கினார்கள். சவுல் பெலிஸ்தரின் பாளயத்தைக் கண்ட போது பயந்தான். அவன் இருதயம் மிகவும் தத்தளித்த்துக் கொண்டிருந்தது.

தாவீதின் வாழ்க்கைப் பயணத்தை நாம் தொடரும் முன், நான் சற்றுப் பின் 28 ம் அதிகாரத்துக்கு சென்று, சவுலின் வாழ்க்கையின் கடைசி பாகத்தைத் பற்றி சற்றுப் பார்க்கலாம் என்று யோசித்தேன்.

பெலிஸ்தர் இஸ்ரவேலுக்கு விரோதமாக பாளயமிறங்கினார்கள். சவுல் அவர்களின் பாளயத்தைக் கண்டபோது பயந்து நடுங்கினான். அந்த சமயத்தில் சாமுவேல் மரித்து விட்டான். அவனை தீர்க்கதரிசிகளின் பட்டணமாகிய ராமாவிலே அடக்கம் பண்ணினார்கள்.

கர்த்தருடைய செல்வாக்கோ அல்லது கர்த்தருடைய மனிதரின் செல்வாக்கோ இல்லாத சவுல், பெலிஸ்தரின் பாளயத்தைக் கண்டவுடன் பயந்தான். கர்த்தருக்கு பயந்தால் தானே மனிதரிடம் பயப்பட மாட்டோம். தன்னுடைய வாழ்க்கை முழுவதும் தேவனுக்கு கீழ்ப்படியாமல் போன சவுல் இப்படி நடுங்கியது சகஜம் தானே! சாமுவேல் மரித்தவுடன் தான் வெறுமையானதை சவுல் உணர்ந்தான்.

மறுபடியும் மறுபடியும் கர்த்தரின் ஆலோசனையை ஏற்காத அவனுக்கு, இப்பொழுது ஆலோசனை சொல்ல யாரும் இல்லை! தீமையோடு விளையாடின அவனுக்குள் நன்மையானது ஏதும் இல்லை. கர்த்தர் அவனுடைய வாழ்வில் அங்கமாகவும் இல்லை! அதுமட்டுமல்ல! தன்னை ஆபத்திலிருந்து காப்பாற்றிக்கொள்ள வேண்டிய நேரத்தில் மட்டும்தானே அவன் தேவனைப் பற்றி நினைத்தான்.

நம்மில் எத்தனைபேர் இன்று சவுலைப்போல வாழ்ந்து கொண்டிருக்கிறோம்? நமக்கு கஷ்டம் வரும்போது மட்டும் தான் கர்த்தர் வேண்டும். மற்ற நேரத்தில் நம்முடைய வாழ்க்கையை நாமே வாழ ஆசைப்படுகிறோம் அல்லவா? நமக்கு பயம் வரும் வேளையில் மட்டுமே கடவுள் வேண்டும் நமக்கு!

கீழ்ப்படியாமைக்கு அடிமையானவர்கள், நிச்சயமாக பயத்துக்கும் அடிமையாவார்கள். நமக்குள்ளாக அடிக்கிற பயம் என்கிற புயல் வெளியே அடிக்கிற காற்றையும், புயலையும் விட ஆபத்தானது. சவுலின் உள்ளத்தை பயம் ஆட்கொண்டது!

சின்ன சின்ன காரியங்களில் கர்த்தருடைய வார்த்தையை மதிக்காமல், நான் ஒன்றும் பெரிய பாவம் செய்யவில்லையே கர்த்தர் என்னைத் தண்டிக்க மாட்டார் என்று தீமையோடு விளையாடிக்கொண்டிருக்கிறாயா? முள்ளில் உதைப்பது கடினம் என்று தெரியுமா  உனக்கு? ஒருநாள் உனக்கு ஆலோசனை சொல்லக் கர்த்தர் உன்னோடு இல்லை என்பதை உணர்வாய்! அந்தத் தீமையின் பலனால் நீ பயத்தினால் தத்தளிக்கும்போது உனக்கு தேவனின் உதவி கிட்டாது! ஜாக்கிரதை!

என் வாழ்வை இருள் மூடும்போது

என்னைப் பனியின் குளிர் தாக்கும்போது

என் கண்ணுக்கு பாதை  மறையும்போது

என்னை அன்பற்ற வெறுமை பற்றும்போது

நான் கைவிடப்பட்ட நிலையில் வாடும்போது

பயம் என்னும் இருள் என்னைவிட்டு நீங்கும்வரை

என்னைவிட்டு நீங்காதிரும் என் நேசரே!

 

உங்கள் சகோதரி

பிரேமா சுந்தர் ராஜ்