Tag Archive | மன்னிப்பு

இதழ்: 680 பழிவாங்குதலுக்கு பதிலாய் மன்னிப்பு!!

1 சாமுவேல்: 26:8,9  அப்பொழுது அபிசாய் தாவீதைப் பார்த்து: இன்று தேவன் உம்முடைய சத்துருவை உம்முடைய கையில் ஒப்புக்கொடுத்தார். இப்பொழுதும் நான் அவனை ஈட்டியினால் இரண்டு குத்தாகக் குத்தாமல், ஒரே குத்தாக நிலத்தில் உருவக்குத்தட்டுமா என்றான்.

தாவீது அபிசாயைப் பார்த்து: அவரைக் கொல்லாதே. கர்த்தர் அபிஷேகம் பண்ணுவித்தவர்மேல் தன் கைகளைப்போட்டு, குற்றமில்லாமல் போகிறவன் யார்? என்று சொன்னான்.

 

தாவீது இஸ்ரவேலின் ராஜாவாகிய சவுலுக்கு மிகப்பெரிய வெற்றியைத் தேடித்தந்தான். கோலியாத்தைக் கொன்றபின்னர் சவுலின் சேவகனாகவும், சவுல் அசுத்த ஆவியால் அலைக்கழிக்கப்பட்டபோது அவனை அமைதிப்படுத்தும் இசைக்கலைஞனாகவும் சேர்ந்தான். ஆனால் சவுலோ அவனுடைய உயிரை எடுக்கவேண்டி அவனை ஒரு பறவையைப்போல வேட்டையாடினான்.

அப்படிப்பட்ட வேளையில்தான் அவன் துராகிரதனாகிய நாபாலை சந்தித்தான். நாபால் அவனை நடத்திய விதம் தாவீதை நாபாலின் மொத்தக்குடும்பத்தையும் அழிக்கத் தூண்டியது. புத்திசாலியான அபிகாயிலால் அது தடுக்கப்பட்டது. தாவீது பழிவாங்குவதை விட்டு பின்வாங்கி, கர்த்தரே பழிவாங்கும்படி விலகினான்.

இப்படியாகப் பழிவாங்கும் சூழ்நிலை அவனுக்கு  பலமுறை வந்துள்ளது. இன்றைய வேதாகமப்பகுதியில் அப்படிப்பட்ட ஒரு சூழ்நிலையைத் தான் பார்க்கிறோம்.  இங்கு அபிசாய் தாவீதைப் பார்த்து இன்று தேவன் உம்முடைய சத்துருவை உம்முடைய கையில் ஒப்புக்கொடுத்தார் என்கிறான்.

ஒருநிமிஷம்! அபிசாயின் வார்த்தைகளை கவனித்துப் பாருங்கள்! ஒரு இஸ்ரவேலனாகிய அபிசாய் தேவனுடைய நாமத்தில் ஒரு அட்வைஸ் கொடுக்கிறான். அதை தேவனே கூறிய விதமாக நினைத்து அந்த புத்திமதியை ஏன் தாவீது ஏற்றுக்கொள்ளவில்லை?  நல்லவேளை தாவீது தன்னுடைய பரமபிதாவின் சத்தத்தை நன்கு அறிந்திருந்தான். அதைப்போல சில நேரங்களில் ஒரு நல்ல கிறிஸ்தவனின் வாயில் இருந்து வரும் எல்லா வார்த்தைகளும் கிறிஸ்துவின் வார்த்தைகள் ஆகாது! நம்முடைய பரம பிதாவின் சத்தத்தை நாம் வேதத்தின் மூலமாய் அறிந்து கொள்ள வேண்டும்.

தாவீது அபிசாயிடம் கர்த்தர் அபிஷேகம் பண்ணுவித்தவர்மேல் தன் கைகளைப்போட்டு, குற்றமில்லாமல் போகிறவன் யார்? என்றான். தன்னை ஒரு பறவையைப்போல கண்ணி வைத்து வேட்டையாடிக்கொண்டிருந்த சவுலைப்பற்றி தாவீது கூறிய வார்த்தைகள்தான் இவை.  எப்படிப்பட்ட உள்ளம் பாருங்கள்! பழிவாங்குதலுக்கு பதிலாய் மன்னிப்பு!

பவுல் கொலோசேயருக்கு எழுதும்போது, ஒருவரையொருவர் தாங்கி, ஒருவர்பேரில் ஒருவருக்கு குறைபாடு உண்டானால் கிறிஸ்து உங்களுக்கு மன்னித்ததுபோல, ஒருவருக்கொருவர் மன்னியுங்கள் ( 3:13) என்கிறார்.

தாவீது அபிசாயிடம் பெற்ற புத்திமதிக்கு இது முற்றிலும் மாறானது!  ஆனால் இந்த ஒரு அட்வைஸ் தான் நமக்கு அமைதியைக் கொடுக்கும்.

நாம் மன்னிக்குபோது ஒரு கடந்த காலத்தை மாற்ற முடியாது ஆனால் நிச்சயமாக எதிர் காலத்தை மாற்றமுடியும்!

உங்கள் சகோதரி

பிரேமா சுந்தர் ராஜ்

 

 

Advertisements

இதழ் 592 அவர் நாமம் பெற்றுத் தந்த மன்னிப்பு!

1 சாமுவேல் 12:20,22  அப்பொழுது சாமுவேல் ஜங்களை நோக்கி: பயப்படாதேயுங்கள். நீங்கள் இந்த பொல்லாப்பையெல்லாம் செய்தீர்கள். ஆகிலும் கர்த்தரைவிட்டுப் பின்வாங்காமல் கர்த்தரை உங்கள் முழு இருதயத்தோடும் சேவியுங்கள்.

கர்த்தர் உங்களைத் தமக்கு ஜனமாக்கிக் கொள்ள  பிரியமானபடியால், கர்த்தர் தம்முடைய மகத்துவமான நாமத்தினிமித்தம் தமது ஜனங்களைக் கைவிடமாட்டார்.

அமெரிக்க தேசத்தில்  ஒலி ஒளி அரங்கத்தில் ஒருமுறை கிறிஸ்துவின் பிறப்பை சித்தரித்த நாடகத்தையும், மறுமுறை மோசேயின் சரித்திரத்தையும் காண கர்த்தர் உதவி செய்தார். அந்த நாடகங்களின் சிறப்பு அம்சமே அதன் பின்னணி தான். இயேசு பிறந்த போது நாமும் பெத்லெகேமில் இருந்தது போன்ற பின்னணி மெய் சிலிர்க்க வைத்தது. மோசேயில் அவன் சிவந்த சமுத்திரத்தைப் பிளந்ததும், முட்செடியில் கர்த்தர் அவனோடே பேசியதும், ஆரோனின் கோல் சர்ப்பமாக மாறியதும் யாத்திராகமத்தை நேரில் பார்த்ததைப் போல் இருந்தது.

அதைப்போலத்தான் 1 சாமுவேல் 12 ம் அதிகாரம் நமக்கு சவுல் ராஜாவாக தெரிந்து கொள்ளப்பட்டதின் பின்னணியாக அமைகிறது.

இஸ்ரவேல் மக்கள் தங்களுக்கு ஒரு ராஜா வேண்டும் என்று கேட்டதை விரும்பாத கர்த்தர் அதனால் அவர்களுக்கு வரப்போகும் மனவேதனையை விளக்கினார். நம்முடைய பரம தகப்பன் சொல்வதைக் கேட்போம் என்று எண்ணாத இஸ்ரவேல் மக்கள் தங்களுடைய தேவையை முன்வைத்தனர்.

நானாக இருந்திருந்தால் இவர்களை ஒருபோதும் மன்னித்திருக்கமாட்டேன் என்ற ஒரு சிறிய எண்ணம் என் மனதில் தலை தூக்கியது. ஆனால் கர்த்தரோ என்னைப் போல எண்ணவில்லை. அவர் அவர்களை மன்னித்து அவர்களுடைய பிடிவாதம் இருந்த இடத்தை தம்முடைய அன்பினால் மூடிவிட்டார்.

இஸ்ரவேல் மக்கள் மட்டுமல்ல அவர்களுடைய தலைவர்களான சவுல், தாவீது, சாலொமோன் கூட தங்களுடைய பிடிவாதத்தால் கீழ்ப்படியாமல் போனாலும் தேவனாகிய கர்த்தர் அவர்களை மன்னித்து ஆசீர்வதித்தார். இன்று இதைத்தானே நம் வாழ்க்கையிலும் பார்க்கிறோம்? எத்தனை பிடிவாதம், எத்தனை முறை கீழ்படியாமல் போயிருக்கிறோம்? ஆனால் அத்தனை முறையும் அவர் நம்மை மன்னிக்கவில்லையா?

இந்தப் பின்னணியைத்தான் 1 சாமுவேல் 12 ம் அதிகாரம் நமக்குத் தருகிறது. தேவனாகிய கர்த்தரின் மன்னிப்பு என்னும் குணம் நிறைந்த பின்னணி. அவருடைய பிள்ளைகளின் நற்கிரியைகளால் வந்த மன்னிப்பு அல்ல அவருடைய பெருந்தன்மையால் கிடைக்கப்பெற்ற மன்னிப்பு.

இத்தனை மாதயவுக்கு  நாம் எவ்வளவு நன்றி உள்ளவர்களாக இருக்க வேண்டும் என்று சிந்திப்போம்!

கர்த்தர் நம் பாவத்தை மன்னிக்க தயவுள்ளவராக இல்லாவிடில் இன்று மோட்சமே வெறுமையாகத்தானே இருக்கும்!  சிந்தியுங்கள்!

 

உங்கள் சகோதரி

பிரேமா சுந்தர் ராஜ்