Tag Archive | யூதா

இதழ்: 823 உன்னைப் புண்படுத்திய ஒருவரை மன்னிக்க முடியுமா?

ஆதி:44: 18 “ அப்பொழுது யூதா அவனண்டையிலே சேர்ந்து, ஆ என் ஆண்டவனே , உமது அடியேன் உமது செவிகள் கேட்க ஒரு வார்த்தை சொல்லுகிறேன் கேட்பீராக;  அடியேன் மேல் உமது கோபம் மூளாதிருப்பதாக; நீர் பார்வோனுக்கு ஒப்பாயிருக்கிறீர்

நாம் கடந்த ஆண்டின் கடைசி நாளில், யோசேப்புக்கு  இழைக்கப்பட்ட தீங்கை பரலோக தேவன் எப்படி நன்மையாய், ஆசீர்வாதமாய் மாற்றியமைத்தார் என்று பார்த்தோம்.

இன்று நாம் யோசேப்பின் வாழ்விலிருந்து இன்னுமொரு காரியத்தை கற்று கொள்ளப் போகிறோம்! அதற்கு முன்னால் ஒரே ஒரு கேள்வி!

ஒரு நிமிடம்!  உங்கள் வாழ்வில் யாரையாவது பார்த்து,  ஒருவேளை  உங்கள் உறவினரை பார்த்து, நாளுக்கு நாள் அவர்கள் பேசும் கொடிய வார்த்தைகளைக் கேட்டு ,  இவர்களை கடவுள் மன்னிக்கவே மாட்டார் என்று கசப்போடு எண்ணியிருக்கிரீர்களா? உண்மைதாங்க! சிலர் செய்வதும், பேசுவதும் கத்தியால் குத்துவது போல இருக்கும், ஆனால் தாங்கள் தான் பரிசுத்தவான்கள் என்ற நினைப்பில் இருப்பார்கள்!

 நாம் சில நாட்களுக்கு முன் படித்த யூதாவை சற்று நினைவு கொள்வோம்! ஞாபகம் இருக்கிறதா யார் அவன் என்று? என்னுடைய அம்மா ஒரு பழமொழி சொல்லுவார்கள்!  ‘பக்தியான பூனை ஒன்று பரலோகம் போகும்போது நெத்திலி கருவாட்டை த் தன் பக்கத்தில் ஒளித்துக்கொண்டு  சென்றதாம் என்று’.  தன் மருமகளை அவமதித்தவன்…… யாரும் பார்க்காத வேளையில் வேசியை தேடி சென்றவன்…….பின்னர் தன் விதவை மருமகள் கர்ப்பம்தரித்திருக்கிறாள் என்று கேள்விப்பட்டவுடன், பரிசுத்தவான் போல அவளை சுட்டெரிக்க வேண்டும் என்று சொன்னவன்….தான் அந்தக் குழந்தையின் தகப்பன் என்று அறிந்தவுடன் வாயை மூடிக் கொண்டவன்…..

இவை யாவற்றுக்கும் மேலாய் அவனுடைய பரிசுத்தமான வாழ்க்கையில் இன்னுமொரு நெத்திலியாக இருந்தது, அவன் யோசேப்பை இஸ்மவேலரிடம்  விற்றுப் போட்டது.  ஆதி: 37: 26 “யூதா தன் சகோதரரை நோக்கி, நாம் நம் சகோதரனைக் கொன்று அவன் இரத்தத்தை மறைப்பதினால் லாபம் என்ன? அவனை இஸ்மவேலருக்கு விற்று போடுவோம் வாருங்கள்.. என்பதைப் பார்க்கிறோம்.

யோசேப்பு பதினான்கு வயது சிறுவன், அவனை விற்றுப் போடலாம் என்று யூதா எண்ணுகிறான்! ஏன் அவனை உண்மையிலேயே காப்பாற்ற வேண்டும் என்ற எண்ணத்திலா? இல்லை!  20 வெள்ளிக் காசுக்காகவே! பத்து சகோதரருக்கும், ஆளுக்கு  இரண்டு காசுகள் வீதம் கிடைக்குமல்லவா? எப்படி எண்ணம் பாருங்கள்! இவனை கொன்றால் நமக்கு என்ன லாபம்? இவனை விற்றால் நமக்கு கொஞ்சம் பணமாவது கிடைக்குமே! என்ற மோசமான எண்ணத்தில் வந்ததுதான் இந்த தூண்டுதல்.

இப்பொழுது 23 வருடங்களுக்கு பின்னர் எகிப்தின் அதிபதியான யோசேப்பின் முன்னால் நிற்கிறான் இந்த யூதா. யோசேப்பின் கண்கள் முன்னால் படம் போல வருகிறது அன்று நடந்த அபரீதமான சம்பவம், இவனைக் கொல்லுவதால் நமக்கு என்ன லாபம், விற்றுப் போடுவோம் என்று யூதா கூறியது காதுகளில் ஒலிக்கிறது. கசப்பான நினைவு ! மறக்கமுடியாத ஒரு வலி!  நான் ஒருவேளை யோசேப்பின் இருக்கையில் இருந்திருந்தால் எனது இரத்தக் கொதிப்பு ஏறியேப்போயிருக்கும்.

ஆனால் யூதா பேச ஆரம்பித்தவுடன், (ஆதி: 44: 33, 34) அவன் குரலில் தம்பி பென்யமீனைக் காப்பாற்ற விரும்பும் உண்மையான ஆவல் தெரிகிறது! பென்யமீனைக் கொண்டு செல்லாவிட்டால் தன் தகப்பனுக்கு தீங்கு நேரிடும் என்று அவன் பயத்தோடு கெஞ்சுவதை உணர்கிறோம். என்ன வித்தியாசம் நாம் அன்று கண்ட யூதாவுக்கும், இன்று யோசேப்பின் முன்  நிற்கின்ற யூதாவுக்கும்! அன்று அவன்  நான், எனக்கு என்று சுயநலமாய் வாழ்ந்தவன், இன்று தன் தகப்பனுக்காய், தன் இளைய சகோதரனுக்காய் தன் ஜீவனை பணயம் வைத்து பேசுகிறதைப் பார்க்கிறோம்! இத்தனை மாறுதல் எப்படி  வந்தது? யூதா மனந்திருந்தி தேவனிடம் மன்னிப்பு பெற்றானோ?

யோசேப்பு யூதாவின் குரலில் இருந்த மாற்றத்தைக் கண்டான். தன்னை இஸ்மவேலருக்கு விற்றுப் போட்ட யூதாவை உடனே மன்னிக்கிறான்! எப்படிப்பட்ட மன்னிப்பு?  நீ மனம் மாறிவிட்டதை நான் உணர வேண்டும் என்று கண்டிப்பு போட்டானா? அல்லது நான் உன்னை விட பரிசுத்தமானவன், நீ ஏன் சமுகத்தில் நிற்க தகுதியானவன் அல்ல என்ற பெருமை இருந்ததா? அல்லது அவனுடைய பழைய பாவங்களை நினைவுபடுத்தி ‘நீ குத்திய புண் இன்னும் ஆறவில்லை’ என்று குற்றம் சாட்டினானா? அல்லது அவனுடைய முதுகுக்கு பின்னால் அவனைப் பற்றி பேசினானா? எதுவுமே இல்லை! வெறும் மன்னிப்பு என்ற ஒரே வார்த்தையில் யூதாவின் பாவங்கள் கரைந்தோடின!

கர்த்தராகிய கிறிஸ்து இயேசு நம்முடைய பாவங்களை மன்னிக்கும்போது, நம்முடைய பாவங்களை மறந்து போகிறார் என்று வேதம் சொல்லுகிறது. பாவியாகிய நாம் மனந்திரும்பி  அவருடைய சமூகத்துக்கு வரும் போது, கர்த்தர் நம்மைப் பார்த்து, சரி சரி , கையும் மெய்யுமாய் மாட்டிக் கொண்டதால் மனந்திருந்தினாய்! இன்னும் சில வருடங்கள் நல்லவனாய் வாழ்ந்து காட்டு பின்னர் மன்னிப்பதைக் குறித்து யோசிக்கிறேன் என்று சொல்லுகிறாரா?  இல்லை! அளவிட முடியாத கிருபையால் நம்மை மன்னித்து கிழக்குக்கும் மேற்குக்கும் எவ்வளவு தூரமோ அவ்வளவாய் நம் பாவங்களை விலக்குகிறார்.

இப்படிப்பட்ட மகா மேன்மையான குணத்தைத்தான்  யோசேப்பின் வாழ்வில் காண்கிறோம்!

நம் வாழ்வில் தீங்கு இழைத்தவர்களை நாம் எப்படிப் பார்க்கிறோம்? நம்மால் மன்னிக்க முடிகிறதா? உன்னுடைய அண்டை வீட்டுக்காரர் உனக்கு விரோதமாய் செய்த தவறுகளை மன்னித்து விட்டாயா? உன்னுடைய உற்றார் உறவினர் உனக்கு விரோதமாய் செய்தவையை, இயேசு கிறிஸ்து உன் பாவங்களை மன்னித்து மறந்தது போல மன்னித்து விட்டாயா?

நீ கசப்பான நினைவுகளோடு, மறக்கமுடியாத வலியோடு , மன்னிக்கவே முடியாது என்று வெறுக்கிற உன் உறவினர் ஒருவர், ஒருவேளை மனந்திருந்தியிருந்தால் , கிருபையே உருவான நம் தேவன் அவரை மன்னித்து, மறந்து விட்ட அவர் பாவங்களை மன்னியாமல் இருப்பதற்கு நீ யார்?

ஜெபம்:  நல்ல ஆண்டவரே! நீர் எங்களை மன்னிக்கிறது போல நாங்களும் பிறரை மன்னிக்க எங்களுக்கு பெலன் தாரும். ஆமென்.

 

உங்கள் சகோதரி

பிரேமா சுந்தர் ராஜ்

 

இதழ்: 816 குற்றம் சாட்டியதொரு விரல்!

ஆதி:  38: 25 – 26 அவள் (தாமார்) வெளியே கொண்டுவரப் பட்டபோது, அவள் தன் மாமனிடத்துக்கு அந்த அடைமானத்தை அனுப்பி, இந்த பொருட்களை உடையவன் எவனோ அவனாலே நான் கர்ப்பவதியானேன்; இந்த முத்திரை மோதிரமும், இந்த கோலும், இந்த ஆரமும் யாருடைவகள் பாரும் என்று சொல்லி அனுப்பினாள்.

யூதா அவைகளை பார்த்தறிந்து, என்னிலும் அவள் நீதியுள்ளவள், அவளை என் குமாரனாகிய சேலாவுக்கு கொடாமற்போனேனே என்றான். அப்புறம் அவன் அவளை சேரவில்லை.

 அன்பானவர்களே! ஒருவேளை நீங்கள் இந்த தோட்டத்திற்கு முதன் முறையாக வருவீர்களானால், தயவுசெய்து முந்தின இதழ்களை வாசித்துவிட்டு இன்றைய இதழை வாசியுங்கள்! இது தாமாரைப் பற்றி நாம் படிப்பதின் கடைசி இதழ்!

நேற்று நாம் யூதாவைப் பற்றி படிக்கும்போது அவன் முக்காடிட்ட ஒரு  பெண்ணோடு தன் மாமிச தேவையை பூர்த்தி செய்ய பேரம் பேசினான் என்று பார்த்தோம். நீருற்றுகளண்டையில் வேசியின் வேடம் தரித்து அமர்ந்திருந்த தாமார் அவனை வசமாக தன் வலையில் சிக்க செய்தாள். அவள் எனக்கு என்ன தருவீர் என்று கேட்டதற்கு அவன், நான் போய் உனக்கு என் மந்தையிலிருந்து ஒரு ஆட்டுக் குட்டியை அனுப்புகிறேன், என்கிறான். அதற்கு அவள், அதுவரை உமது  முத்திரை மோதிரத்தையும், உமது கைக்கோலையும், உமது ஆரத்தையும் அடைமானமாக கொடும் என்கிறாள்.

தன்னுடைய இச்சைகளை திருப்தி படுத்துவதற்காக, ( ஆதி:38:18 )‘அவன் அவைகளை அவளுக்கு கொடுத்து அவளிடத்தில் சேர்ந்தான், அவள் அவனாலே கர்ப்பவதியானாள்” என்று.

யூதா என்ன செய்கிறான் பாருங்கள்! ஒரு ஆட்டுக்குட்டியை தன் நண்பன், அதுல்லாம் ஊரானாகிய ஈராவிடம் கொடுத்து,  நீருற்றண்டை இருந்த தாசியிடமிருந்த தன் அடைமானத்தை திருப்பி வரும்படி சொல்கிறான். தன் பெயருக்கு அவகீர்த்தி வந்துவிடுமோ என்ற பயம். ஆனால் இந்த அசிங்கமான, தாசியை தேடி அலைகிற,  வேலையை செய்யப்போகிற தன நண்பனின் பெயரைப் பற்றி சிறிதும் கவலைப்படவில்லை. ஈரா திம்னாவை சென்று அடையுமுன் தாமார் தன் வேஷத்தை களைந்து போட்டு, கைம்பெண் வேஷம் தரித்து ஊருக்குள் மறைகிறாள். ஈரா, அப்படிப்பட்ட தாசி அந்த ஊரில் இல்லை என்ற செய்தியை கொண்டு வந்தபோது, யூதாவுக்கு கலக்கமாகத்தான் இருந்திருக்கும்.

ஓரிரு மாதங்களில் யூதா, தான் ஒரு வேசியை தேடி திம்னாவில் அலைந்ததை மறந்திருப்பான் ஆனால் அவனுக்கு ஒரு அதிர்ச்சி காத்திருந்தது.

ஆதி:38:24 ல் தாமார் வேசித்தனம் பண்ணி கர்ப்பமாயிருக்கிறாள் என்று யூதாவுக்கு அறிவிக்கப்பட்டபோது , அவளை சுட்டெரிக்க கொண்டு வரும்படி கூறுகிறான். ஒரு நிமிஷம்! தன் மருமகளை ஏமாற்றியவன், தன் இச்சைக்காக ஒரு பெண்ணை உபயோகப்படுத்தியவன், இப்பொழுது தாமாரை விரல் நீட்டி  குற்றவாளியாக தீர்த்து , அவளை சுட்டெரிக்க வேண்டும் என்கிறான்.

தாமார் அழைத்து வரப்பட்ட போது, இந்தப் பொருட்களை உடையவன் எவனோ அவனாலே நான் கர்ப்பவதியானானேன் என்று தன்னிடமிருந்த மோதிரத்தையும், கோலையும், ஆரத்தையும் கொடுத்தனுப்பி இவைகள் யாருடையவைகள் பாரும், இவற்றிக்கு சொந்தமானவனே என்னை கர்ப்பமாக்கினான்” என்று கூறினாள்.  யூதா, அவைகள் தன்னுடையவைகள் என்று அறிந்து,  இவள் என்னிலும் நீதியுள்ளவள் என்றான். தாமாரை குற்றவாளியாகக் காட்டிய அவனுடிய ஆள்காட்டி  விரல் இப்பொழுது அவன் பக்கம் திரும்பியது.

பல ஆயிர வருடங்களுக்கு அப்பால், தேவாலயத்துக்கு அருகே , இயேசு கிறிஸ்துவிடம், வேசித்தனத்தில் பிடிக்கப்பட்ட ஒரு பெண்ணை, தாமார் சுட்டெரிக்கப்பட வேண்டும் என்று யூதா கூறியது போல, இவளை கல்லெறிய வேண்டும் என்று இழுத்து வந்தனர் ஒரு கூட்டத்தினர் (யோவான்: 8:7) இயேசு அவளை ஒருகணம் நோக்கினார்! ஒருவேளை அன்று தாமார், யூதாவின் முன் நின்ற கோலம், எல்லாம் அறிந்த நம் தேவனின் மனக்கண் முன்னால் தோன்றியிருக்கும். உங்களில் பாவமில்லாதவன் இவள்மேல் முதலில் கல்லெறியக்கடவன்’ என்றார். யூதாவுக்கு அவளை சுட்டெரிக்க தகுதியில்லை, நம்மில் ஒருவருக்கும் இல்லை, வேதம் கூறுகிறது ‘நாமெல்லாரும் பாவம் செய்திருக்கிறோம்’ என்று.

சாட்சியற்ற, தகுதியற்ற இந்த யாக்கோபின் புத்திரனாகிய யூதாவின் பரம்பரையில், இவ்வுலகை  இரட்சிக்க  தகுதி பெற்ற யூத ராஜசிங்கம் தோன்றினார்! தாமாரைப் போல நாம் அவருடைய சமுகத்தில் வந்து, அவர் நாமத்தை அறிக்கையிட்டு,  நான் உமக்கு சொந்தம் ஆண்டவரே என்று நம்மை தாழ்த்துவோமானால், அவர் நம்முடைய கடந்த காலத்தின் அவல நிலையை பார்க்காமல், நம்மை இரட்சித்து அவருக்கு சொந்தமாக்கி கொள்வார்..

ஜெபம்: தேவனே, நான் உமக்கு சொந்தம் என்ற கிருபைக்காக நன்றி செலுத்துகிறேன். என் கடந்த காலத்தின் நினைவுகள்  என்னையே கலங்க வைக்கும்போது, நீர் அதை பார்க்காமல், என்னை உம்முடைய பிள்ளையாக நேசித்து,  அணைப்பதற்காக நன்றி ஆண்டவரே!  ஆமென்.

 

உங்கள் சகோதரி

பிரேமா சுந்தர் ராஜ்

இதழ்: 815 பிறரை உபயோகப்படுத்தும் சுயநலம்!

ஆதி:  38:16 “( யூதா ) அந்தவழியாய் அவளிடத்தில் போய், அவள் தன் மருமகள் என்று அறியாமல்: நான் உன்னிடம் சேரும்படி வருவாயா என்றான்; அதற்கு அவள்: நீர் என்னிடத்தில் சேரும்படி எனக்கு என்ன தருவீர் என்றாள்.

தாமார் தன் கைம்பெண் வேஷத்தை கலைத்து தன்னை வேசியைப்போல அலங்கரித்து, முக்காடிட்டு, திம்னாவுக்கு போகிற வழியில் நீருற்றண்டையில் அமர்ந்தாள் என்று பார்த்தோம்.

ஆடுகளுக்கு மயிர்கத்தரிக்கும் காலம் அது,  ஆதலால் யூதா தன் சிநேகிதனுடன் சேர்ந்து தன் மந்தையை மயிர்கத்தரிப்பதர்காக திம்னாவுக்கு அழைத்து சென்றான்.

யூதாவின் மனைவி சூவா இறந்து சில காலமே ஆகியிருந்தது. மனைவியில்லாத அவனுக்கு பெண் சுகம் தேவைப்பட்டது. அந்த காலத்தில், வேலை சம்பந்தமாக, சொந்த ஊரை விட்டு சென்றவர்கள் வேசியிடம் தங்கள் தேவையை நிவிர்த்தி செய்வது, ஒன்றும் புதிதான காரியம் அல்ல என்று வேதாகம வல்லுனர்கள் கூறுகின்றனர். அப்படிப்பட்ட செயல் இன்றைய சமுதாயத்தில்  கூட புதிதான காரியம் அல்ல என்பது தான் வருந்தத்தக்க விஷயம்.

யூதா தன் இச்சையை பூர்த்தி செய்ய ஏதாவது ஒரு பெண் கிடைப்பாளா என்ற தேடினான் என்று பார்க்கிறோம். இன்றைய நமது சமுதாயத்தில், தங்களுடைய வேலை ஸ்தலத்தில் கூட தங்கள் ஆசையை நிறைவேற்ற யாராவது பெண்கள் கிடைப்பார்களா என்று ஆண்களும், எவனாவது கிடைத்தால் அவனை கைக்குள் வைத்துக்கொண்டு, அவன் மூலம் தங்கள் காரியத்தை சாதிக்கலாம் என்று பெண்களும் அலைவதில்லையா? நம்மில் யாராவது இப்படி ஒரு பெண்ணினால் அல்லது ஒரு ஆணினால் அவர்களது சுயநலத்துக்காக  உபயோகப்படுத்தப் பட்டிருப்போமோனால், இந்த வலியின் கொடுமை நமக்கு தெரியும்!

யூதாவுடைய மாமிச இச்சை, அவன் கண்களை மூட, அவன் முக்காடிட்ட ஒரு வேசியைப் பார்த்தானேயொழிய, தன் வீட்டில் மகளாய் வாழ்ந்த தன் மருமகளைக் காணவில்லை. முக்காடிட்டிருந்த பெண்ணை வேசி என்று எண்ணினான். வெளிப்புற தோற்றம் அவனை அவள் வேசி என்று நம்ப வைத்தது.

தேவனுடைய பிள்ளைகளே, நாம்  எத்தனை முறை யூதாவைப் போல நம் வாழ்வில் இப்படி தவறான முடிவுகள் எடுத்திருக்கிறோம்? நான், எனக்கு, என்ற சுயநல ஆசைகள் நம் உள்ளத்தை நிரப்பும் போது, நம் கண்கள் மங்கிப் போகின்றன. நாம் யாரை ஏமாற்றி நம் தேவையை பூர்த்தி செய்யலாம் அல்லது காரியத்தை சாதிக்கலாம் என்று நினைப்போமே தவிற, அதனால் பாதிக்கப்பட போகிறவர்களைப் பற்றி சிறிது கூட நினைப்பதில்லை.

யூதா அவளை தன் இச்சைக்கு உபயோகப்படுத்த விரும்பினானே தவிர,  அவளுக்கு கொடுக்க அவன் கரத்தில் ஒன்றுமே இல்லை. வெறும் கையுள்ளவனாய் இப்பொழுது என்னிடத்தில் சேரு, பின்னர் உனக்கு ஒரு வெள்ளாடுக்குட்டியைத் தருகிறேன் என்று பேரம் பேசுவதைப் பார்க்கிறோம். என்ன வருத்தத்துக்குரிய காரியம்! நாம் மற்றவர்களை உபயோகப்படுத்தும்போது நம் தேவைகள் தான் நம் கண்ணில் படுகிறதே தவிர, மற்றவர்களுடைய தேவைகள் நம் கண்ணில் படுவதில்லை!

பிலிப்: 2:3.4 ல் பவுல் கூறுகிறார், “ ஒன்றையும் வாதினாலாவது, வீண்பெருமையினாலாவது செய்யாமல், மனத்தாழ்மையினாலே ஒருவரையொருவர் தங்களிலும் மேன்மையானவர்களாக எண்ணக்கடவீர்கள். அவனவன் தனக்கானவைகளையல்ல பிறருக்கானவைகளையும் நோக்குவானாக.

 நாம் ஒவ்வொருவரும் பிறரை மதிக்கவும், பிறரை நம்மைவிட மேன்மையானவர்களாக நடத்தவும்  கற்றுக்கொண்டால் , இன்றைய சமுதாயத்தில் , தாமாரைப் போல  ஒருவரும் , ஏமாற்றப்படுதல், உபயோகப்படுத்தபடுதல் , என்ற வேதனையையும், வலியையும் மறைத்து முக்காடிட்டு அமர்ந்திருக்க வேண்டியதில்லை!

சுயநலம் என்பது நாம் விரும்பிய விதமாய் வாழ்வது அல்ல! மற்றவர்களை நாம் விரும்பிய விதமாய் உபயோகப்படுத்துவதுதான்!

 இன்று உன்னுடைய சுயநலம்  யாருடைய வாழ்க்கையையாவது பாதித்திருக்கிறதா?

ஜெபம்: ஆண்டவரே! என்னை சுற்றயுள்ளவர்களை மதித்து, அவர்களை அன்போடும் பண்போடும் நடத்த எனக்கு உதவி தாரும். யாரையும் என் சுய நலத்துக்கு பணயமாக்காமல் வாழ கிருபை தாரும். ஆமென்!

உங்கள் சகோதரி

பிரேமா சுந்தர் ராஜ்

 

இதழ்: 814 முகத்திரைக்கு பின்னால்!

ஆதி:  38:14,15  “ சேலா பெரியவனாகியும் தான் அவனுக்கு மனைவியாக கொடுக்கப்படவில்லை என்று அவள் கண்டபடியால், தன் கைம்பெண்மைக்குரிய வஸ்திரங்களை களைந்து போட்டு, முக்காடிட்டு தன்னை மூடிக்கொண்டு, திம்னாவுக்கு போகிற வழியிலிருக்கிற நீருற்றுகளுக்கு முன்பாக உட்கார்ந்தாள்.

யூதா அவளைக் கண்டு, அவள் தன் முகத்தை மூடியிருந்த படியால், அவள் ஒரு வேசி என்று நினைத்து

நேற்று நாம் தாமாருக்கு இழைக்கப் பட்ட அநியாயத்தை கர்த்தர் கண்டார் என்று பார்த்தோம். இன்றைய வேத பகுதியில் நான் தாமார் நடந்து கொண்ட விதத்தை படித்தபோது, ஒரு பெண் தன்னை தானே இவ்வளவு கீழ்த்தரமாய் நடத்த முடியுமா என்று நினைத்தேன்.

ஏதோ நாடகத்தில் நடிகர்கள் வேஷம் மாற்றுவதைப் போலத் தன் கைம்பெண் வேஷத்தை கலைத்துவிட்டு, தன்னை வேசியைப் போல அலங்கரித்துக் கொண்டு தாமார் திம்னாவுக்கு போகிற வழியில் நீருற்றண்டையில் அமருகிறாள்!

நம்மில் எத்தனை பேர் உள்ளான வாழ்க்கையை மூடி மறைத்துவிட்டு வெளிப்புறமாய் அலங்கரித்துக் கொள்கிறோம்? என்னுடைய நிறுவனத்தில் வேலை செய்த  ஒரு பெண் கல கலவென்று சிரித்துக் கொண்டே இருப்பாள். அவளை ஒரு நிமிடம் நிறுத்தி எப்படி இருக்கிறாய் என்று கேட்பேனானால், உடனே கண்களில் நீர் பெருக்கெடுத்துவிடும். சிறுகுழந்தை போல சிரிக்கும் இவளுக்குள் இவ்வளவு பெரிய வேதனை மறைந்திருக்கிறதா என்று ஆச்சரியமாயிருக்கும்.

தாமார் தன் முதல் கணவன் ஏரினால் சரியாக நடத்தப்படவில்லை, அவனுடைய சகோதரன் அவளை அவமதித்தான். அவள் மாமனார் யூதா அவளுக்கு மதிப்பு கொடுத்ததாக தெரியவில்லை. அந்த காலத்தில் இருந்த எல்லா ஆண்களையும் போல பெண்களைப் பிள்ளைகள் பெற்றுக்கொடுக்கும் இயந்திரமாகவே  பார்த்தான். அவனுடைய வீட்டு மருமகளான அவளை அன்புடன் நடத்துவதற்கு பதிலாக, இளம் பெண் தாமாரை, அவள் வீட்டில் விதவை கோலத்தில் தன் மகன் பெரியவனாகும் வரை காத்திருக்க அனுப்பினான்.

இப்பொழுது யூதா தன்  மனைவி மரித்து போன பின்னர், பெண் ஆசை பிடித்து வேசியை தேடி அலைகிறான் என்று பார்க்கிறோம். அவன் செய்த பெரிய குற்றம் என்னவெனில், ஆசை வெறியில் அடையாளம் தெரியாமல், அவன் மருமகளாகிய தாமாரை ஒரு வேசி என்று எண்ணி நெருங்கியதுதான்!

யூதா , நம்முடைய கர்த்தராகிய இயேசு கிறிஸ்த்து உதித்த யூத குலத்தின் தகப்பன், ஆபிரகாம், ஈசாக்கு, யாக்கோபின் பிள்ளைகளில் ஒருவன், ஒரு வேசியை தேடி அலைந்து, தான் வேசி என்று நினைத்த தன் மருமகளிடம் சேருகிறான்!  சில தினங்களுக்கு முன்பு நாம் படித்த,  தீனாள், சீகேம் விஷயத்தில், யாக்கோபு தன் குமாரரைப் பார்த்து கூறிய விதமாய்,  தெரிந்து கொள்ளப் பட்ட ஜனமாகிய இவர்கள் தங்களுக்குரிய நறுமணத்தை கானானியர் முன்பு கெடுத்தார்கள்.

கர்த்தர் ஏன் இந்த கதையை வேதத்தில் இடம் பெற செய்தார்? தாமாரின் வாழ்க்கையில் நாம் கற்றுகொள்ள என்ன இருக்கிறது என்று நாம் எண்ணலாம். ஒவ்வொரு மனிதனாலும் அலட்சியமாய் நடத்தப் பட்ட தாமார்,  தான் வாழ வேண்டிய வீட்டிலிருந்து கைம்பெண்ணாய், தகப்பன் வீட்டுக்கு துரத்தப்பட்ட இவள், திடீரென்று தன் ‘நல்ல பெண்’ வேஷத்தை கலைத்துவிட்டு, முக்காடிட்டு கீழ்த்தரமான வேசியின் வேஷத்தை அணிந்து கொண்டது ஏன்? என்ன ஆயிற்று அவளுக்கு? அவள் தன் கணவன் ஏர் போல கெட்டவள் இல்லை, ஓனான் போல கர்த்தருடைய கட்டளையை அவமதிக்கவில்லை, யூதாவின் வஞ்ச புத்தி கூட இல்லை? பின்னர்  ஏன் இப்படி செய்தாள்? ஏன் தன்னை அவமானத்துக்குட்படுத்தினாள்?

இங்கு தாமார் தன் அவல நிலையை மாற்றுவதாக எண்ணி, தன்னை கேவலப் படுத்திக்கொண்டாள்!  தன் பிரச்சனைகளுக்கு தீர்வு காண்பதாக எண்ணி, தன்னையே கேள்விக் குறியாக்கினாள் என்று பார்க்கிறோம்.

என்றாவது , என்னை நானே மதிக்காத அளவுக்கு நடந்து கொண்டிருக்கிறேனா? நான் செய்த ஏதாவது ஒரு  காரியம் என்னை நானே வெறுக்கும் படி இருந்ததா? தாமாரைப் போல முக்காடிட்ட வாழ்க்கையை வாழ்கிறேனா? முகத்திரைக்கு பின்னால் என் வாழ்க்கை எப்படி இருக்கிறது? என்னுடைய பிரச்சனைகளுக்கு தீர்வு காண்பதாய் எண்ணி என்னை நானே வெறுக்கும்படி நடந்து கொண்டிருக்கிறேனா? சிந்தித்து பார்ப்போம்!

வேதம் I கொரி:6:20 ல் கூறுகிறது, “ கிரயத்துக்கு கொள்ளப்பட்டீர்களே; ஆதலால் தேவனுக்கு உடையவைகளாகிய உங்கள் சரீரத்தினாலும், உங்கள் ஆவியினாலும் தேவனை மகிமைப்படுத்துங்கள்”என்று.

நாம் அவருடைய விலையேறப் பெற்ற இரத்தத்தினாலே  கிரயத்துக்கு கொள்ளப்பட்டிருக்கிறோம், நம்மை கேவலமாக விற்பதற்கு அல்ல! நம் தாயின் கருவில் நாம் உருவாகும்போதே கர்த்தர் நம்மை அவருடைய  சித்தப்படி உபயோகப் படுத்துவதற்காகவே  உருவாக்கியிருக்கிறார்.  நம்முடைய இஷ்டப்படி, முக்காடிட்டு, வேஷம் மாற்றுவதற்காக அல்ல!

ஜெபம்: ஆண்டவரே! திம்னாவுக்கு போகும் வழியில், பாவம் கண்களை மூட செய்யும் இடத்தில் உள்ளேன்! என்னை விடுதலையாக்கும். ஆமென்!

உங்கள் சகோதரி

பிரேமா சுந்தர் ராஜ்

இதழ்: 813 உன்னைக் காணும் கண்கள்!

ஆதி:  38:6,7  யூதா தன் மூத்த மகனாகிய ஏர் என்பவனுக்கு தாமார் என்னும் பேருள்ள ஒரு பெண்ணைக் கொண்டான்.

யூதாவின் மூத்த மகனாகிய ஏர் என்பவன் கர்த்தரின் பார்வைக்குப் பொல்லாதவனாயிருந்ததினால் கர்த்தர் அவனை அழித்து போட்டார்.

 நேற்று நாம் தீனாள் என்றப் பெண்ணைப் பற்றி படித்தோம்! இன்று இங்கு  தாமார் என்ற பெண்ணின் கதையை வாசிக்கிறோம். நம்முடைய இயேசு கிறிஸ்துவின் வம்ச வரலாற்றில்  (மத்: 1:3)  இடம் பெற்ற இந்த பெண் யார்? இவள் கதை எதனால் வேதத்தில் இடம் பெற்றுள்ளது? நமக்கு என்ன போதிக்கிறது? என்று நாம்  தியானிப்போம்.

ஆதி: 49:10  யூதாவின் குலத்தில் சமாதான கர்த்தர் உதிப்பார் என்று கூறுகிறது. அதனால் யூதாவின் குடும்பத்தில் நடந்த எல்லா சம்பவங்களுமே ஆதியாகமத்தில் முக்கிய இடம் பெற்றுள்ளன. ஆதி 37 ல் யோசேப்பு விற்க படுவதையும்,   39 ல் அவன் கதை போத்திபார் வீட்டில் தொடர்வதையும் படிக்கிறோம். ஆனால் இடையில் இந்த   38 ம் அதிகாரம், யூதா, தாமார் கதையை நமக்கு கூறாமல் இருக்குமானால், மத்தேயு இயேசுவின் வம்ச வரலாறு எழுதியதில் இடம் பெற்ற தாமார், பாரேஸ் இவர்கள் யாரென்று நமக்கு தெரியாமல் போயிருக்கும்.

தயவு செய்து நினைவு படுத்தி பாருங்கள்! யாக்கோபின் புத்திரர், அவர்கள் சகோதரி தீனாளை கெடுத்த சீகேமை, அவன் அவளை திருமணம் செய்ய தயை செய்யுமாறு வேண்டி நிற்கையில், அவன் கானானியன் என்பதால், அவனையும், அவன் பட்டணத்தார் அனைவரையும் பட்டய கருக்கினால் வெட்டி கொலை பண்ணினார்கள்.சில அதிகாரங்களே கடந்து வருகிறோம்! இங்கு யாக்கோபின் புத்திரனாகிய யூதா ஒரு கானானியப் பெண்ணாகிய சூவாவை கண்டு, விவாகம் பண்ணி, அவளோடே சேர்ந்தான் என்று பார்க்கிறோம். இவனுக்கும், தீனாவை விரும்பிய சீகேமுக்கும் என்ன வித்தியாசம்? ஆபிரகாமும், ஈசாக்கும் தங்கள் பிள்ளைகளுக்கு கானானியரில்  பெண் கொள்ளக் கூடாதென்று அக்கறை காட்டினர், ஏனெனில் உடன்படிக்கையின் பிள்ளைகளாகிய இவர்கள், கானானியருடைய விக்கிரகங்களுக்கும், விபசாரங்களுக்கும் அடிமையாகக் கூடாது என்பதால் தான்.

ஆனால் யாக்கோபின் புத்திரர் தங்கள் தகப்பனாகிய ஆபிரகாமும், ஈசாக்கும் வெறுத்த பாவத்தை செய்தனர் என்று பார்க்கிறோம்.

யூதாவுக்கு மூன்று புத்திரர் பிறந்தனர். மூத்தவன் ஏர் , திருமண வயதான போது, யூதா அவனுக்கு தாமார் என்ற பெயருள்ள பெண்ணை திருமணம் செய்து வைக்கிறான்.ஆதி 38:7 ல் வேதம் கூறுகிறது,  கர்த்தர் ஏர் என்பவனை அழித்துபோட்டார் ஏனெனில் அவன் கர்த்தர் பார்வைக்கு பொல்லாதவனாய் காணப் பட்டான் என்று. தேவனுடைய இந்த நியாயத்தீர்ப்பை பெரும் அளவுக்கு அவன் என்ன பாவம் செய்தான் என்று தெரியாது! அவன் உயிர் வாழும் தகுதியை இழந்தான் என்று அறிகிறோம்.

தேவன் தம்முடைய கரத்தினால் அவனை அழிக்கும்படி வாழ்ந்த அவன் தன் மனைவியை எப்படி நடத்தியிருப்பான்? ஒரு கணம் சிந்தியுங்கள்!  இதைப் பற்றி வேதம் நமக்கு கூறாவிட்டாலும், கர்த்தர் இந்தப் பெண் தாமாரின் மேல் காட்டிய மிகுந்த கிருபைக்கு இது ஒரு காரணமாக இருக்கலாம் அல்லவா? இந்த பெண்ணை அவன் இரக்கமில்லாமல் நடத்தியதால் கர்த்தர் அவனை அழித்திருப்பாரோ?

ஏரை தேவன் அழித்த பின், யூதா தன் இரண்டாவது குமாரன் ஓனானை தாமாரின் மூலமாய் அவன் தமையனுக்கு சந்ததி உண்டாக்க சொல்கிறான். அவன் தாமாருக்கு ஒரு குழந்தையை கொடுக்க விரும்பாமல், அவளை பாலியலினால் அவமதிக்கிறான். அவனுடைய செயல் கர்த்தருடைய பார்வையில் பொல்லாததாயிருந்ததால் அவனையும் அழித்துபோட்டார் என்று வேதம் சொல்கிறது.

இப்பொழுது யூதாவுக்கு மிஞ்சியது ஒரே ஒரு குமாரன் சேலா என்பவன் தான். அவனும் அழிந்து விடுவானோ என்ற பயத்தில் யூதா, தாமாரை நோக்கி, சேலா பெரியவனாகும் வரைக்கும் உன் தகப்பன் வீட்டிலேயே கைம்பெண்ணாக தங்கியிரு என்று சொன்னான். சேலா பெரியவனான பின்பும், யூதா அவன் சொன்ன வார்த்தையை காப்பற்ற வில்லை. அவள் விதவையாக, பிள்ளையில்லாதவளாக, மரித்து,  எல்லோராலும் மறக்கப் பட வேண்டும் என்பது அவன் எண்ணம். அப்படி நடந்ததா? தாமாரின் பெயர் இன்று இயேசு இரட்சகரின் வம்ச வரலாறில், வேதத்தில் அல்லவா இடம் பெற்றிருக்கிறது! எவ்வளவு பெரிய கிருபையை அவர் தாமார் மீது காட்டியிருக்கிறார்.

பெண்களுக்கு சரீரரீதியாகவோ, மனரீதியாகவோ இழைக்கப்படும் துன்பத்தை கர்த்தர் பார்க்கிறார். பெண்களே! இது உங்கள் மனதில் பதியட்டும்! இரக்கமுள்ள கர்த்தர், உன் உள்ளத்தை வார்த்தைகளால்  குத்துகிறவனைப் பார்க்கிறார்! உன்னை காலால் உதைப்பவனைப் பார்க்கிறார்!  உன்னை சரீரரீதியாய் வதைக்கிறவனைக் காண்கிறார்! பயப்படாதீர்கள்! அவருடைய இரக்கம் உன்னை விட்டு விலகாது. தாமாரைக் கண்ட தேவன் உன்னையும் காண்கிறார்!

 ஜெபம்: ஆண்டவரே! உம்முடைய இரக்கத்துக்கு அளவே இல்லை! நீர் என்னைக் காண்கிற தேவன்! ஸ்தோத்திரம்! ஆமென்!

உங்கள் சகோதரி

பிரேமா சுந்தர் ராஜ்

இதழ்: 776 தாமார் என்னும் பேரீச்சைமரம்!

2 சாமுவேல் 14:27  அப்சலோமுக்கு மூன்று குமாரரும், தாமார் என்னும் பேர் கொண்ட குமாரத்தியும் பிறந்திருந்தார்கள். இவள் ரூபவதியான் பெண்ணாயிருந்தாள்.

கடந்த சில நாட்கள் நாம் அம்னோன் தாமார் என்ற தாவீதின் பிள்ளைகளின் வாழ்க்கையைப் பார்த்துக்கொண்டிருக்கிறோம். தாமாரைப்போல வாழ்ந்து கொண்டிருக்கும் பலர் நம்மில் உண்டு! அவர்களுக்கு தாமாரின் வாழ்க்கை என்ன அர்த்தத்தைக் கொடுக்கும் என்று சற்று ஆழமாகப் படிக்கும்போதுதான் என்னுடைய ஆத்துமாவுக்கு செழிப்பூட்டிய சில உண்மைகளைப் பார்த்தேன்.

தாமாரைப்பற்றி அதிகம் படிக்க எனக்கு ஆசை வந்ததின் காரணம் அந்தப் பெயரின் அர்த்தம்தான்! அது மட்டுமல்ல தாமார் என்ற இந்தப் பெயரில் வேதத்தில் இடம்பெற்ற இன்னும் இருவரைப் பற்றிப் படித்ததும்தான்!

தாமார் என்ற பெயருக்கு பேரீச்சை என்ற அர்த்தம். பேரீச்சம் மரம் நம்முடைய பனை மரங்கள் வகையை சேர்ந்தது! நம்முடைய தென்னை மரங்களும் அதே குடும்பத்தை சேர்ந்தவைதான்!  202 நாடுகளில் இந்தக் குடும்பத்தை சேர்ந்த 2600 வகை மரங்கள் உள்ளன. பாலைவனத்தில் வளரும் வகையும் உண்டு, கடலோரத்தில் வளரும் ஜாதியும் உண்டு, மலைப்பகுதிகளில் வளரும் வகையும் உண்டு! ஆனால் இவை எல்லாமே மிகுந்த பயனைக் கொடுக்கும் மரங்கள்! இவை சரித்திரத்தில் செழிப்பு, வெற்றி, சமாதானம் என்பவற்றுக்கு அடையாளமாக இருந்தன!

வேதத்தில் மூன்று பெண்கள் தாமார் என்ற பெயருடன் வாழ்ந்தனர். முதலாவது வாழ்ந்த தாமாரைப்பற்றி ஆதியாகமம் 28ல் படிக்கிறோம். அவள் யாக்கோபின் குமாரனான யூதாவின் மருமகள்.  அவளை ஒரு வேசி என்று எண்ணி அவளுடைய மாமனார் அவளைத் தன் இச்சைக்காக உப்யோகப்படுத்துகிறான். ஆனால் அவளுடைய கடந்த காலம் அவளுடைய எதிர்காலத்துக்கு ஒரு தடையாகவே இல்லை. மத்தேயு 1:3-6 ல் தாமாரின் குமாரனாகிய பாராஸ் வம்சமாய் வந்தவன் தான் தாவீதும், பின்னர் கர்த்தராகிய இயேசுவும். இதைப்படிக்கும்போது புன்னகை வந்தது. எத்தனைபேர் நம்முடைய வாழ்க்கையை நம்முடைய கடந்த காலத்தின் அளவு கோலால் அளக்கின்றனர். யூதாவும் அவளோடிருந்தவர்களும் அவளை வேசி என்று கணித்தபோது, அவளுடைய சந்ததியில்தான் மேசியா பிறப்பார் என்று யாருமே நினைக்கவில்லை! ஆனால் கர்த்தர் அவளை ஒரு உயர்ந்த, தலை நிமிர்ந்து நின்ற, அன்பு உள்ளம் கொண்ட ஒரு  பேரீச்சையாகப் பார்த்தார்!

அடுத்தது நாம் பார்த்துக்கொண்டிருக்கிற தாவீதின் மகளான தாமார்! தன்னுடைய சகோதரனால் கற்பழிக்கப்பட்டு, வெட்கத்தால் நாணி, கூனி குறுகி தனிமையில் நின்ற தாமார்!  ஐயோ என்னை விட்டுவிடு என்று கதறிய உனக்கு, வெட்கத்தால் குறுகிப்போன உனக்கு,  கறையான வாழ்க்கையோடு தனிமையில் வாடும் உனக்கு, ஒரு ஆறுதலைத் தரும் தாமார்! இன்று இந்தத் தாமாரின் வாழ்க்கை எத்தனை பேருடைய வலிக்கு மருந்தாக இருக்கிறது!

மூன்றாவது அப்சலோமின் மகள் தாமார்! தாவீதின் குமாரனாகிய அப்சலோம் கற்பை அம்னோனிடம் இழந்து கிழிந்த வஸ்திரத்தோடு, த்லையில் சாம்பலோடு ஓடி வந்த தாமாரை ஆறுதல் பேசி தன்னுடைய வீட்டில் தங்க வைத்தது மட்டுமல்லாமல் அவனுக்கு பிறந்த குமாரத்திக்கு தன்னுடைய தங்கையின் பெயரை சூட்டினான். அது அவன் மனம் புண்பட்ட தன்னுடைய அழகிய தங்கைக்கு  கொடுத்த மரியாதை. அதுமட்டுமல்ல வேதம் சொல்கிறது அப்சலோமின் குமாரத்தியாகிய இந்தத் தாமார் மிகவும் ரூபவதியானவள் என்று!

இன்று பேரீச்சையை தாமார் என்ற பெயரோடு சேர்த்து பார்க்கும்போது கர்த்தருடைய பிள்ளைகளான இவர்கள் பல்வேறு வகைகளாக இருந்தாலும் தங்கள் சந்ததிக்கு, இவர்களைப்பற்றி படிக்கும் நமக்கு ஒரு ஆசீர்வாதத்தை விட்டு சென்றனர். நாம் ஒவ்வொருவரும்கூட நமக்கு பின்வரும் சந்ததிக்கு ஒரு மாதிரியாக, ஆசீர்வாதமாக வாழ முடியும்!

பாலைவனமோ, கடலோரமோ, மலைப்பகுதியோ எங்காயிருந்தாலும் நம்முடைய வாழ்க்கை மற்றவர் படிக்கும் ஒரு ஏற்பாடு போன்ற புத்தகமாக மாற முடியும்!

கர்த்தர்தாமே இந்த வார்த்தைகளின் மூலம் உங்களை ஆசீர்வதிக்கட்டும்!

 

உங்கள் சகோதரி

பிரேமா சுந்தர் ராஜ்

 

 

 

 

 

 

இதழ்: 664 தடைகள் யாவும் நீங்கும்!

2 சாமுவேல் 2:1 – 10 பின்பு தாவீது கர்த்தரை நோக்கி, நான் யூதாவின் பட்டணங்கள் ஒன்றிலே போய் இருக்கலாமா என்று விசாரித்தான். அதற்கு கர்த்தர்: போ என்றார்.  எவ்விடத்திற்கு போகலாம் என்று தாவீது கேட்டதற்கு அவர் எப்ரோனுக்குப் போ என்றார்….. அப்பொழுது யூதாவின் மனுஷர்வந்து, அங்கே தாவீதை யூதா வம்சத்தாரின்மேல் ராஜாவாக அபிஷேகம்பண்ணினார்கள்….. சவுலின் படைத்தலவனான…. அப்னேர் சவுலின் குமாரனாகிய இஸ்போசேத்தை…. இஸ்ரவேலனைத்தின்மேலும் ராஜாவாக்கினான்….யூதா கோத்திரத்தார் மாத்திரம் தாவீதைப் பின்பற்றினார்கள்.

சவுல் யுத்தத்தில் மரித்துப்போனான். அவனோடு அவனுடைய மூன்று குமாரரும் மரித்துப்போனார்கள். அதில் தாவீதின் நல்ல நண்பனான யோனாத்தானும் உண்டு. பல வருடங்களுக்கு முன்பே சாமுவேல் தீர்க்கதரிசி, தாவீதை ராஜாவாக அபிஷேகம் பண்ணியிருந்தார்.

தாவீது உடனே ராஜாவாகிவிடுவான் என்று யாராகிலும் நினைத்திருந்தால் அது தவறு என்று இப்பொழுதாவது உணர்ந்திருப்பார்கள். சவுல் மரித்தபின்னரும் தாவீதால் இஸ்ரவேலை ஆள முடியவில்லை. சவுலின் படைத்தலைவனான அப்னேர் வேறொரு திட்டம் தீட்டியிருந்தான். சவுலின் குமாரர்களில் மிஞ்சியிருந்த இஸ்போசேத்தை இஸ்ரவேலின் ராஜாவாக்கினான்.

கர்த்தர் தாவீதை தெரிந்து கொண்டிருப்பாரானால் அப்னேருக்கு என்ன வந்தது? அவன் இஸ்போசேத்தை தெரிந்தெடுத்தான்.  இஸ்போசேத் ஒருபக்கமும், தாவீது யூதா கோத்திரத்தையும் ஆண்டார்கள்.

அதன் முடிவை 2 சாமுவேல் 3:1  நமக்கு இந்த கசப்பான சூழ்நிலையை விளக்குகிறது. தாவீதை சார்ந்தவர்களுக்கும், இஸ்போசேத்தை சார்ந்தவர்களுக்கும் இடையே வெகு காலமாக யுத்தம் இருந்தது,

தாவீது நினைத்தமாதிரி எதுவுமே நடக்கவில்லை. அவனை மலர்கள் தூவி யாரும் சிங்காசனத்தில் உட்காரவைக்கவில்லை! பெண்கள் ஆரத்தியெடுத்து வரவேற்கவுமில்லை! ஒரு கசப்பான சூழல் நிலவியது.

ஆனால் 2 சாமுவேல் 3 ல் நாம் படிக்கிறோம், தாவீது வரவரப்பலத்தான். சவுலின் குடும்பத்தாரோ வரவரப்பலவீனப்பட்டுப் போனார்கள் என்று.

வெகுகாலமாக யுத்தம் நிலவியது ஆனால் நாட்கள் செல்ல செல்ல தாவீதின் கரம் ஓங்கியது!

இதை வாசித்த நான் தாவீதின் வாழ்க்கையைப் பற்றி சிந்தித்தேன். கர்த்தரால் தெரிந்துகொள்ளப்பட்ட பின்னரும் எதுவுமே சுலபமாக முடியவில்லை! உயிருக்குத் தப்பி ஓடினான். சவுலால் விரட்டியடிக்கப்பட்டான். எதிரியின் நாட்டில் தஞ்சம் கொண்டான். சவுல் மரித்தபின்னரும் போட்டிக்கு இன்னொரு ராஜா வந்துவிட்டான்.

நான் மட்டும் அந்த இடத்தில் இருந்திருந்தால் இன்னும் எத்தனை நாட்கள் நான் காத்திருக்க வேண்டும் என்று கர்த்தரிடம் புலம்பியிருப்பேன். கர்த்தரை பின்பற்றிய தாவீதின் வாழ்வில்தான் எத்தனை தடைகள்!

நாம் சிலநேரம் இப்படிப்பட்ட தடைகளை பார்ப்பது இல்லையா? எல்லாம் சரியாகப்போய்க்கொண்டிருக்கிறது என்று நினைக்கும் வேளையில் எங்கிருந்தோ ஒரு தடை வந்துவிடும்.

தாவீதுடைய இந்த வனாந்திர வாழ்க்கை அவனுடைய சிங்காசன வாழ்க்கைக்கு அவனைத் தகுதிப்படுத்திற்று.

ஒருவேளை இன்று நீ நினைப்பதெல்லாம் தடைப்பட்டுக் கொண்டிருக்கலாம்! தாவீது இன்று நீ இருக்கும் சூழலில்தான் இருந்தான்.ஆனால் அவன் சோர்ந்துபோகவில்லை! தொடர்ந்து முன்னேறினான். கர்த்தரின் வழிநடத்துதலை கவனித்து, அவர் சத்தத்தைக்கேட்டு நடந்தான். கடைசியில் அவன் கரம் ஓங்கிற்று!

தாவீதைப்போல பொறுமையோடுக் காத்திரு! தடைகள் யாவும் நீங்கும்!

இன்று நீ உன் பாதையை அறியாமலிருக்கலாம் ஆனால் உன் பாதைகாட்டியை அறிவாய் அல்லவா? அவரை நம்பு! இளைப்பாறு!

உங்கள் சகோதரி,

பிரேமா சுந்தர் ராஜ்