Tag Archive | தைரியம்

இதழ்: 826 ஒரு நல்ல தாயாக வாழும் சிலாக்கியம் உண்டா?

யாத்தி:2:1,2  “லேவியின் குடும்பத்தாரில் ஒருவன் லேவியின் குமாரத்திகளில் ஒருத்தியை விவாகம் பண்ணினான். அந்த ஸ்திரி கர்ப்பவதியாகி, ஒரு ஆண் பிள்ளையைப் பெற்று, அது அழகுள்ளதென்று கண்டு அதை மூன்று மாதம் ஒளித்து வைத்தாள்.

 நாம் சிப்பிராள், பூவாள் என்ற மருத்துவச்சிகளின் தேவ பயத்தினால் எகிப்தில் வாழ்ந்த இஸ்ரவேல் மக்களைக் கர்த்தர் காத்தார் என்று பார்த்தோம். பார்வோன் அவர்களை கடின உழைப்பினால் வாதித்தான், ஆனாலும் இஸ்ரவேல் மக்கள் பலுகிப் பெருகினார்கள். அதனால் பார்வோன், பிறந்த ஆண்பிள்ளைகளை நதியில் போட்டுவிட வேண்டுமென்று கட்டளையிட்டான்.

இப்படிப்பட்ட சமயத்தில் வாழ்ந்த யொகெபேத் என்ற ஒரு தாயைப் பற்றி ஒருசில நாட்கள் படிக்கலாம் என்று நினைக்கிறேன்.

ஒரு தாய் என்றவுடன் எனக்கு நீதி:31 ம் அதிகாரத்தில் வரும் குணசாலியான  ஸ்திரி தான் ஞாபகத்துக்கு வருகிறது.  பெண்ணை ஒரு நல்ல மனைவியாக, ஒரு நல்ல தாயாக சித்தரிக்கும் படம் அது. அதில் வர்ணிக்கப்பட்ட குணவதியான பெண்ணின் பல நற்குணங்களை, 42 வருடங்களுக்கு முன்னால் கர்த்தரிடம் சென்று விட்ட  என்னுடைய அம்மாவின் வாழ்வில் கண்டதுண்டு.  வாழ்க்கை என்னும் படகு, பல கஷ்டங்கள், துன்பங்கள் போன்ற புயலில் அடிபட்டாலும்,  கோழி தன் குஞ்சுகளை காப்பதுபோல காத்து என்னை உருவாக்கியவர்கள்.

இன்று நாம் படிக்கப்போகிற யொகெபேதின் வாழ்க்கையும் மலரால் அமைக்கப்பட்ட மெத்தை அல்ல.

யார் இந்த யொகெபேத்????? இவள் மோசேயைப் பெற்றெடுத்த தாய்.

யாக்கோபின் குடும்பத்தினர் எகிப்தில் உள்ள கோசேன் நாட்டில் குடியேறி வாழ்ந்தனர் என்ற நமக்கு தெரியும். அந்த தேசத்திலே யாக்கோபின் குமாரனாகிய லேவிக்கு பிறந்தவள் தான் இந்த யொகெபேத்.

எண்ணா: 26: 59 வாசித்து பாருங்கள்! அம்ராமுடைய மனைவிக்கு யொகெபெத் என்று பேர்; அவள் எகிப்திலே லேவிக்கு பிறந்த குமாரத்தி; அவள் அம்ராமுக்கு ஆரோனையும், மோசேயையும், அவன் சகோதரியான மிரியாமையும் பெற்றாள் என்று பார்க்கிறோம்.

இவளுக்கு தெரிந்ததெல்லாம் அடிமைத்தனம் என்ற கடினமான உழைப்பும், வேதனையும் நிறைந்த வாழ்க்கையே. இவள் கானானைக் கண்டவள் இல்லை, எகிப்தை மட்டுமே கண்டவள். ஒவ்வொரு நாளும் வாழ்க்கையையே  பாரமாக சுமந்த இந்தத் தாய் தன் பிள்ளைகளின் நலனுக்காக எதையும் செய்ய தயாராக இருந்தாள்.

முதலாவது அவளின் தைரியத்தையும், நம்பிக்கையையும் நமக்கு எடுத்துக் காட்டுவது அவள் தனக்கு பிறந்த ஆண் பிள்ளையை மூன்று மாதங்கள் யாருக்கும் தெரியாமல் ஒளித்து வைத்ததுதான். ஏனெனில் எகிப்தின் ராஜாவாகிய பார்வோன், எபிரேய மருத்துவச்சிகளால், தன் சூழ்ச்சி நிறைவேறாததை அறிந்து,  பிறந்த ஆண்பிள்ளைகளை நைல் நதியில் போட்டுக் கொன்றுவிட கட்டளை கொடுத்திருந்தான்.

இந்த மனசாட்சியில்லாத செயலை ஏற்றுக்கொள்ள முடியாத யொகெபேத், தன் பிள்ளையை மிகுந்த புத்திசாலித்தனத்துடன் மறைத்து வைத்தது மாத்திரமல்ல, அந்தக் குழந்தையை ஆபத்திலிருந்து இரட்சிக்கவும் வகை தேடினாள். பார்வோனின் கட்டளையை மீறி தன் பிள்ளையை காப்பாற்ற வேண்டும் என்ற  இந்த மனத்தைரியம் எங்கிருந்து வந்தது?

அவளுடைய சொந்த வாழ்க்கையில் புயல் வீசினாலும், இந்தப் பெண்மணி இஸ்ரவேலின் தேவனாகிய கர்த்தர் மேல் தன் நம்பிக்கையை வைத்து, கர்த்தருடைய பெலத்தினால் தன் குடும்பத்தை நடத்தினாள்.

எகிப்து என்னும் அடிமைத்தன வீட்டில் தாங்கள் படும் கஷ்டங்களை நினைத்து அவள் அழுது புலம்பவுமில்லை, சூழ்நிலையால் தன் குடும்பம் அழிந்து விடுமோ என்று அஞ்சி ஒளிந்து கொள்ளவுமில்லை. நம்பிக்கை என்னும் விதையை அவள் தன் குடும்பத்தில், தன் பிள்ளைகளின் பிஞ்சு மனதில் விதைக்கிறாள்!

ஒரு நல்ல தாயை அடைந்த பாக்கியம் உங்களுக்கு கிடைத்திருக்கிறதா? அல்லது ஒரு நல்ல தாயாக வாழும் சிலாக்கியம் உங்களுக்கு உண்டா?

பெண்களாகிய நாம் எந்த நிறுவனத்தில் வேலை செய்கிறோம் என்று கூறிக்கொள்வதில் பெருமையடைகிறோம். எவ்வளவு சம்பளம் வாங்குகிறோம் என்பதில் பெருமிதம் கொள்கிறோம். ஆனால் ஒரு நல்ல தாயாக, நம் பிள்ளைகளுக்கு தைரியத்தையும், நம்பிக்கையையும் ஊட்டுகிறவர்களாக, நம் குடும்பத்தை தேவன் மேல் கொண்ட விசுவாசத்திலும், அன்பிலும் கட்டுகிறவர்களாக வாழ்கிறோமா?

பிள்ளைகளை ஒரு தாயால் மட்டும் தான் சரிவர புரிந்து கொள்ளவும், அவர்களை உருவாக்கவும் முடியும்! உனக்கு கர்த்தர் கொடுத்திருக்கிற இந்த பெரிய பொறுப்பில் ஒருநாளும் தவறி விடாதே!

ஜெபம்: ஆண்டவரே! என் பிள்ளைகளை உம்மேல் கொண்ட நம்பிக்கையிலும், விசுவாசத்திலும் வளரச்செய்யும் நல்ல தாயாக இருக்க எனக்கு உதவி தாரும். ஆமென்!

உங்கள் சகோதரி

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும். ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.

இதழ்: 790 கெர்ச்சிக்கும் சிங்கம் போல!

2 சாமுவேல் 14: 12, 13  அபொழுது அந்த ஸ்திரீ ராஜாவாகிய என் ஆண்டவனோடே உமது அடியால் ஒரு வார்த்தைசொல்ல உத்தரவாக வேண்டும் என்றாள். அவன் சொல்லு என்றான். அப்பொழுது அந்த ஸ்திரீ: பின்னை ஏன் தேவனுடைய ஜனத்திற்கு விரோதமாய் இப்படிப்பட்ட நினைவை நீர் கொண்டிருக்கிறீர். துரத்துண்ட தம்முடையவனை ராஜா திரும்ப அழைக்காததினாலே ராஜா இப்பொழுது சொன்ன வார்த்தையினால் குற்றமுள்ளவரைப்போல இருக்கிறார்.

எனக்கு சின்ன வயதிலிருந்தே மிருக கண்காட்சிக்கு போவது மிகவும் பிடிக்கும். அங்கே உள்ள மிருகங்களில் நம்முடைய காட்டுக்கே ராஜாவாகிய சிங்கத்தை அதின் கம்பீரத்தோடு பார்ப்பது பிடிக்கும்.  அதனுடைய தங்க நிறமும், கெம்பீரக் குரலும் என்னை சிலிர்க்க வைக்கும்.

அதனால்தானோ ஏனோ வேதத்தில் தைரியசாலிகளை சிங்கத்துக்கு ஒப்பிட்டு கூறப்பட்டுள்ளது.

நீதிமான்களோ சிங்கத்தைப் போல தைரியமாயிருக்கிறார்கள்  ( நீதி: 28:1)

அதுமட்டுமல்ல தேவனுடைய கர்த்தருடைய பாதுகாப்பைப் பற்றி கூறும்போது ஏசாயா தீர்க்கதரிசி

..சிங்கமும், பாலசிங்கமும் தங்கள் இரையைப் பிடித்திருக்கும்போது கெர்ச்சித்து, தங்களுக்கு விரோதமாய்க் கூப்பிடுகிற திரளான மேய்ப்பரின் சத்தத்தினாலே கலங்காமலும் அவர்கள் அமளியினாலே பணியாமலும் இருக்கிறதுபோல சேனைகளின் கர்த்தர் சீயோன்மலைக்காகவும் அதின் மேட்டுக்காகவும் யுத்தம்பண்ண இறங்குவார். ( ஏசா:31:4)

சிங்கம் பயமே இல்லாமல் தன்னுடையதை தைரியமாக பாதுகாக்கும். இந்த மிருகத்தைத்தான் வேதம் நமக்கு தைரியத்தோடு ஒப்பிட்டுக் காட்டுகிறது. இப்படிப்பட்ட ஒரு தைரியத்தைதான் நாம் தெக்கோவாவூராளாகிய புத்தியுள்ள ஸ்திரீயிடம் பார்க்கிறோம்.

இந்தப்பெண்ணைப்ப்ற்றி நாம் படிக்கும்போது அவள், பகுத்தறியும் ஞானம் உள்ளவள், இரக்க குணம் உள்ளவள், குரல் வளமும், தெளிவான வார்த்தைகள் கொண்டவள், தன்னுடைய அறிவால் தாவீதுடைய பரிவான குணத்தை தட்டி எழுப்புகிறாள் என்று பார்த்தோம்.

இன்று அவள் யாருமே போகத் துணியாத, ஏன், தாவீதுடைய நண்பனாகிய யோவாப் கூட செய்யத்துணியாத ஒரு பெரிய காரியத்தை தைரியமாக செய்கிறாள். பின்னை ஏன் தேவனுடைய ஜனத்திற்கு விரோதமாய் இப்படிப்பட்ட நினைவை நீர் கொண்டிருக்கிறீர்?  என்று அவள் துணிந்து கேட்டது வேறு யாரும் இல்லை! இஸ்ரவேலின் ராஜாவாகிய தாவீது!

தாவீது தன்னுடைய குமாரனைக் குறித்த முடிவு எடுக்க தேவன் இந்த தையமான பெண்ணை உபயோகப்படுத்த வேண்டியிருந்தது.

இந்தப் பகுதியை நான் படிக்கும் போது, இந்தப்பெண் ராஜாவாகிய தாவீதிடம் பேசி, உறவாடிக்கொண்டிருக்கும்போது அவனை நன்கு அறிந்ததாலே, அவள் அவனுடைய சமூகத்தில் தைரியமாக ஒரு வேண்டுகோளை வைக்கிறாள் என்று உணர்ந்தேன். எனக்கு இன்று

ஆதலால் நாம் இரக்கத்தைப் பெறவும், ஏற்ற சமயத்தில் சகாயஞ்செய்யுங் கிருபையை அடையவும் தைரியமாய்க் கிருபாசனத்தண்டையிலே சேரக்கடவோம்.  ( எபிரேயர் 4: 16)

தான் நினைவுக்கு வந்தது. நம்முடைய தேவனாகியக் கர்த்தருடன் ஒவ்வொரு நாளும் அப்பா பிதாவே என்று உறவாடும் நாம் அவருடைய கிருபாசனத்தண்டையில் தைரியமாய் நெருங்கி அவருடைய கிருபையை பெற முடியும்!

ஒரு தைரியமான, சிங்கத்தைப் போன்ற ஒரு பெண், ராஜாவின் சமுகத்தில் வந்து வேண்டுகோளை வைத்தது போல நாமும் தேவனுடைய கிருபாசனத்தை அண்டுவோம்!  நமக்கும் இரக்கம் கிடைக்கும்!

தேவன் தாமே இந்த வார்த்தைகள் மூலம் நம்மை ஆசீர்வதிப்பாராக!

உங்கள் சகோதரி

பிரேமா சுந்தர் ராஜ்

 

 

இதழ்: 620 பயத்தை வென்ற தைரியம்!

1 சாமுவேல் 19: 11,12 தாவீதைக் காவல்பண்ணி மறுநாள் காலமே அவனைக் கொன்றுபோடும்படிக்கு, சவுல் அவன் வீட்டிற்குச் சேவகரை அனுப்பினான். இதை தாவீதுக்கு அவன் மனைவியாகிய மீகாள் அறிவித்து: இன்று இராத்திரியிலே உம்முடைய பிராணனைத் தப்புவித்துக்கொள்ளாவிட்டால் நாளைக்கு நீர் கொன்றுபோடப்படுவீர் என்று சொல்லி, மீகாள் தாவீதை ஜன்னல் வழியாய் இறக்கிவிடாள். அவன் தப்பி ஓடிப்போனான்.

சவுலின் மகளாகிய மீகாள் தாவீதை நேசித்துத் திருமணம் செய்துகொண்டாள். ஆனால் மீகாளுக்கு நன்கு தெரியும் சவுல் அவனைக் கொலைசெய்ய அலைகிறான் என்று. சவுலால் வளர்க்கப்பட்ட அவளுக்கு அவனின் மூர்க்ககுணம் தெரியாதா என்ன?

ஒருதடவை, இருதடவை அல்ல! சவுல் தொடர்ந்து தாவீதைக் கொலை செய்ய முயன்று கொண்டிருந்தான். அப்படிப்பட்ட சூழலில் அவள் தாவீதை மணந்த அவள் மிகுந்த தைரியசாலியாகத்தான் இருந்திருக்கவேண்டும்!

இன்றைய வசனத்தில் நாம் பார்க்கும் அந்த இராத்திரியில் மீகாளின்  வாழ்க்கையில் காணப்பட்ட தைரியம் புல்லரிக்க வைக்கும் ஒன்று. அவள் தகப்பனுடைய மூர்க்கமும், கோபமும் தன் கணவனை மட்டும் அல்ல ஒருவேளை அவளையும் கூட அழித்துவிடலாம் என்று தெரியும். அந்த இருண்ட இராத்திரி மீகாள் தைரியமாக தன் கணவனைப் பாதுகாத்து, சவுலும் உறங்கிக் கொண்டிருந்த  அதே மாளிகையிலிருந்து ஜன்னல் வழியாக இறக்கி அவனைத் தப்பிக்கவும் செய்தாள்.

அவளுக்கு பயமில்லாமல் இருந்திருக்கும்  என்று நினைக்கிறீர்களா? நிச்சயமாக இருந்திருக்கும்! சவுல் கண்டுபிடித்து விட்டால் அவள் உயிருக்கே ஆபத்து அல்லவா? அவள் தாவீது மேல் கொண்ட அன்பு பயத்தை மேற்கொள்ள உதவியது.

நம்முடைய வாழ்க்கையில் மீகாளைப் போல் தைரியமாய் நடக்கவேண்டிய சூழல் என்றாவது ஏற்பட்டதுண்டா?

என்னுடைய வாழ்க்கையில் தைரியம் எப்பொழுது தேவைப் படுகிறது தெரியுமா?  பெரிய மலையைத் தாண்டவோ அல்லது நீரில் மூழ்கவோ இல்லை!  என்னால் இதை செய்ய முடியாது என்ற ஒரு காரியத்தை செய்து முடிக்க நான் அடிமேல் அடி வைக்கும்போதுதான்!  ஒருவேளை என்னால் முடியாவிட்டால் என்ற பயத்தின் மத்தியில் நான் எடுக்கும் ஒவ்வொரு அடியும் தைரியத்தைத்தான் காட்டுகிறது!

மீகாளைப் பொறுத்தவரை அவள் ஒருவனை நேசிக்கவும் தைரியம் தேவைப்பட்டது! அவனோடு ஒவ்வொருநாளும் வாழவும் தைரியம் தேவைப்பட்டது! அவனைத் தன் தகப்பனிடமிருந்து  காப்பாற்றவும் தைரியம் தேவைப்பட்டது!

உன் வாழ்க்கை எப்படி? நிச்சயமாய் பயம்  உண்டு! ஆனால்  பயத்தை வெல்வதற்கு பெயர் தான் தைரியம்!

உங்கள் சகோதரி

பிரேமா சுந்தர் ராஜ்