Archive | May 2016

மலர் 6 இதழ் 400 – சத்தத்திற்கு செவிகொடுத்தால் ஆசீர்வாதம்!

உபா: 28; 1,2 ”இன்று நான் உனக்கு விதிக்கிற உன் தேவனாகிய கர்த்தருடைய கட்டளைகளின்படியெல்லாம் செய்ய நீ கவனமாயிருக்கும்படிக்கு அவர் சத்தத்திற்கு உண்மையாய் செவிகொடுப்பாயானால் உன் தேவனாகிய கர்த்தர் பூமியிலுள்ள சகல ஜாதிகளிலும் உன்னை மேன்மையாக வைப்பார்.

 நீ உன் தேவனாகிய கர்த்தரின் சத்தத்துக்குச் செவிகொடுக்கும்போது இப்பொழுது சொல்லப்படும் ஆசீர்வாதங்களெல்லாம் உன்மேல் வந்து உனக்கு பலிக்கும்.”

 

நேற்று நாம் கர்த்தர் நம்மை இருப்புக்காளவாயிலிருந்து புறப்படப்பண்ணுவார் என்ற அருமையான வாக்குத்தத்தத்தை உபா:4;20 லிருந்து வாசித்தோம். இன்னும் இருப்புக்காளவாயின் மத்தியில் துடித்துக்கொண்டிருக்கும் உங்களில் அநேகர் உண்டு! திருமண வாழ்வில் பிரச்சனைகள், குடிப்பழக்கத்துக்கு அடிமையான கணவர், முரட்டுத்தனமான பிள்ளை , நோயினால் சரீர வேதனை, பண நெருக்கடி என்று பலவிதமான நெருப்பில் நாம் நடந்து கொண்டிருக்கும்போது கடவுள் எங்கேயிருக்கிறார்? ஏன் எனக்கு செவிகொடுக்கவில்லை? என்ற கேள்விகள் எழலாம்.

எனக்கு ஏன் இந்தப் பிரச்சனைகள்? என்று கேள்விகேட்கும் நீங்கள் என்றாவது எனக்கு ஏன் இந்த வேதனை கொடுக்கப்பட்டது என்று சிந்தித்தீர்களா? வேதத்தில் கர்த்தரைப் பிரியப்படுத்தினவர்களை கர்த்தர் ஆசிர்வதிப்பதையும், கீழ்ப்படியாமல் போனவர்களை துன்பங்களால் சபிப்பதையும் தானே பார்க்கிறோம். அதுமட்டுமல்ல, இந்த உபாகமம் புத்தகத்தில் அநேக அதிகாரங்கள் ‘ஆசீர்வாதமும், சபித்தலும்’ என்ற தலைப்பின்கீழ் எழுதப்பட்டவைகள்! இவற்றை நாம் படிக்கும்போது, சரி நான் கர்த்தருக்கு கீழ்ப்படிந்து அவருடைய சித்தப்படி நடந்தால் எனக்கு எல்லாம் சரியாக நடக்கும், எந்த துன்பமும் வராது என்றுதானே நினைக்கத்தோன்றுகிறது.

உபாகமம் 5 லிருந்து 27 வரை மோசே இஸ்ரவேல் மக்களுக்கு தாம் கற்றுக்கொடுத்த எல்லா கட்டளைகளையும், விதிமுறைகளையும் மறுபடியும் நினைவூட்டுகிறார். இவை நாம் யாத்திராகமம், லேவியராகமம், எண்ணாகமம் என்ற புத்தகங்களில் நாம் படித்த கட்டளைகளே!

உபா:28 ம் அதிகாரத்தில் மோசே மூச்சு விட்டது போல ஒரு இடைவெளி கொடுத்து, ”உங்களுக்கு கர்த்தர் இந்த 41 வருடங்களும் கற்றுக்கொடுத்தவைகளைப் பார்க்கும்போது எனக்கு ஒன்று தோன்றுகிறது.!  அவருடைய சத்தத்திற்கு மாத்திரம் செவிகொடுப்போமானால்,ஆசீர்வாதங்களெல்லாம் உன்மேல் வந்து உனக்கு பலிக்கும்”. என்றான்.

இந்தவாரம் முழுவதும் நாம் கர்த்தருக்கு செவிகொடுக்கும்போது கர்த்தர் நமக்காக வைத்திருக்கும் ஆசீர்வாதங்களைப் பற்றி நாம் படிக்கப்போகிறோம்.

கர்த்தர் கொடுத்த இந்த வாக்குதத்தத்தில் முதலில் நாம் கவனிக்கவேண்டியது செவிகொடுத்தல் என்ற வார்த்தை. செவிகொடுத்தல் என்றால் கூர்ந்து கவனித்தல் என்பது எபிரேய மொழிப்பெயர்ப்பு! கர்த்தருடைய வார்த்தைகளை நாம் கூர்ந்து கவனித்து அவற்றை சரிவர புரிந்துகொண்டு அதின்படி நடக்கும்போது கர்த்தர் நம்மை ஆசீர்வதிப்பார் என்பது அதன் அர்த்தம்!

தேவனாகிய கர்த்தர் கையில் பெரம்பு வைத்துகொண்டு, தம்முடைய வார்த்தைகளுக்கு நம்மைக் குருட்டுத்தனமாக கீழ்ப்படியும்படி உத்தரவு கொடுக்கவில்லை. நம்மை அரவணைத்து, என் வார்த்தைகளை கூர்ந்து கவனி, அவை உன் வாழ்க்கைக்கு நல்லது என்பதை புரிந்துகொள் என்கிறார்.

அவ்வாறு அவருடைய வார்த்தைகளுக்கு நாம் செவிகொடுக்கும்போது என்ன நடக்குமாம் பாருங்கள்! ”நீ உன் தேவனாகிய கர்த்தரின் சத்தத்துக்குச் செவிகொடுக்கும்போது இப்பொழுது சொல்லப்படும் ஆசீர்வாதங்களெல்லாம் உன்மேல் வந்து உனக்கு பலிக்கும்.”

எபிரேய மொழியில் ’உன்மேல் வந்து உனக்கு பலிக்கும்’ என்ற பதம் ‘உன்னைகிட்டி சேர்ந்து பற்றிக்கொள்ளும்’ என்று உள்ளது. ஆம் கர்த்தருடைய வார்த்தைகளை நாம் கூர்ந்து கவனித்து கீழ்ப்படியும்போது அவருடைய ஆசீர்வாதங்கள் நம்மை கிட்டிசேர்ந்து பற்றிக்கொள்ளும். என்ன அருமையான வாக்குதத்தம்! இந்த பூமியில் நான் கர்த்தருடைய பிள்ளையாக ஜீவிக்கும்போது ஆசீர்வாதங்கள் என்னைத் தானாகவே கிட்டி சேர்ந்து சூழ்ந்து கொள்ளும். இதைக் கற்பனைப் பண்ணி பார்க்கவே எத்தனை அருமையாக இருக்கிறது!

இந்த ஆசீர்வாதங்கள் யாவை? பென்ஸ் காரில் போகும் வசதியா? அல்லது போயஸ் தோட்டத்தில் வீடு வாங்கும் ஆசீர்வாதமா? இப்படிப்பட்ட ஆசிர்வாதத்தைதான் என்று பலர் பிரசங்கம் பண்ணுகிறார்கள்! அதனால் தான் தொடர்ந்து சில நாட்கள், கர்த்தராகிய தேவன் நமக்காக வைத்திருக்கிற ஆசிர்வாதங்களைப் பற்றிப் படிக்கப் போகிறோம். நாம் அவருடைய வார்த்தைகளைக் கூர்ந்து கவனித்து, புரிந்துகொண்டு அவருடைய சித்தத்துக்கு கீழ்ப்படிந்து நடக்கும்போது நம்மை சூழ்ந்துகொள்ளும் ஆசீர்வாதங்களைப் பற்றிதான்!

 

நம் வாழ்க்கையில் இருப்புக்காளவாய் போன்ற சோதனைகள் உண்டு, வனாந்தரமும், முள்ளுள்ள பாதைகளும் உண்டு, ஆனால் நாம் கர்த்தருடைய சித்தத்தின்படி வாழும்போது ஆசீர்வாதங்களும் உண்டு!

கர்த்தர் நமக்கு கொடுத்திருக்கும் அளவுக்கடங்கா ஆசீர்வாதங்களை ஒவ்வொன்றாய் எண்ணும்போது, கர்த்தர் நமக்கு கொடுக்காத ஆடம்பர வசதிகள் கண்ணில் படவேபடாது! எண்ண ஆரம்பிக்கலாம்!

 

உங்கள் சகோதரி,

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

மலர் 6 இதழ்: 399 – முள்ளுள்ள கத்தாழையில் மலர்கள்!

 உபாகமம்: 4:20 இந்நாளில் நீங்கள் இருக்கிறது போல தமக்கு சுதந்தரமான ஜனமாயிருக்கும்படி கர்த்தர் உங்களை சேர்த்துக் கொண்டு உங்களை எகிப்து என்னும் இருப்புக்காளவாயிலிருந்து புறப்படப்பண்ணினார்.

இருப்புக்காளவாய் என்ற வார்த்தையை சென்னையில் வாழும் நாங்கள், எங்களுடைய கோடை வெயிலுக்கு ஒப்பிட்டுப் பழக்கம். சூரியனின் கதிர்கள் எங்களை எரித்துவிடும் எண்ணத்தில் பாய்வதுபோல் இருக்கும். அதன் கொடுமைக்கு ஒத்துழைப்பது போல கடலின் ஈரப்பதமும் சேர்ந்து கொள்ளும்! ஒருசில நாட்கள் மாலையில் சில்லென்று தென்றல் காற்று கடலிலிருந்து வீசும்போது சென்னைவாசிகளாகிய நாங்கள் அதை அனுபவிக்கும் சுகமே தனிவிதம் தான்.

ஆவிக்குரிய வாழ்க்கையிலும் இருப்புக்காளவாய் போன்ற அனுபவங்கள் நம்மில் அநேகருக்கு உண்டு. எங்கள் குடும்பத்திலும் சூறாவளி, பூகம்பம், அக்கினி போன்ற அனுபவங்களைத் தாண்டி வந்திருக்கிறோம்.

அப்படிப்பட்ட அனுபவங்களை கடந்து கொண்டிருக்கிற கர்த்தருடைய பிள்ளைகளான உங்களில் அநேகருக்கு இன்று வாசிக்கிற இந்த வசனம் சில்லென்று வருகின்ற ஒரு பூங்காற்றைப் போல இருக்கும்.

தொடர்ந்து அக்கினி போன்ற துன்பத்துக்குள் கடந்து வரும் சில தேவனுடைய பிள்ளைகளைப் பார்த்து கடவுள் ஏன் இவர்களை இப்படித் தண்டிக்கிறார்? என்று நாம் நினைப்போம். ஆனால் அவர்களோ கர்த்தருடைய அளவுகடந்த கிருபையை அனுபவித்துக் கொண்டிருப்பார்கள். கர்த்தருடைய அன்பின் இனிமையை ரசித்துக் கொண்டிருப்பார்கள்.

நீதிமான்களுக்கு வரும் துன்பம் அநேகமாயிருக்கும்; கர்த்தர் அவைகளெல்லாவற்றிலும் நின்று அவனை விடுவிப்பார். (சங்:34:19).

இருப்புக்காளவாய் உன்னை பயமுறுத்தலாம்! ஆனால் எரிக்க முடியாது! சாத்தான் உன்னை அதற்குள்ளே தள்ளலாம், ஆனால் கர்த்தர் நம்மை அங்கிருந்து புறப்படப்பண்ணுவார் என்று வேதத்தில் பார்க்கிறோம். புறப்படப்பண்ணுவார் என்ற வார்த்தைக்கு எபிரேய மொழியில் ’சுமப்பார்’ என்ற ஒரு அர்த்தம் உண்டு. நாம் இருப்புகாளவாய்க்குள் விழுந்து விடாதபடி அவர் நம்மைத் தூக்கி சுமப்பார்! .அல்லேலூயா!

 நாங்கள் அக்கினியைக் கடந்தபோது கர்த்தர் எங்களோடு இருப்புக்காளவாயில் இருந்ததை உணர முடிந்தது. எங்களோடு அக்கினியின் மத்தியில் உலாவினார் ஒவ்வொவொரு நாளும் அவர் எங்களோடு முகமுகமாய் வேதத்தின் மூலம் பேசி வழிநடத்தியதையும், எங்களை வெளியே சுமந்து கொண்டு வந்ததையும் வார்த்தைகளால் விளக்க முடியாது. உபா: 4:20 ல் சொல்லப்பட்டவிதமாக, “தமக்கு சுதந்தரமான ஜனமாயிருக்கும்படி கர்த்தர் உங்களை சேர்த்துக் கொண்டு உங்களை எகிப்து என்னும் இருப்புக்காளவாயிலிருந்து புறப்படப்பண்ணினார்” என்ற வாக்கியத்துக்கு நாங்களே ஜீவனுள்ள சாட்சிகள்!

கர்த்தர் ஏன் இருப்புக்காளவாய் போன்ற அனுபவங்களை நம் வாழ்க்கையில் அனுமதிக்கிறார்? என்று ஒருவேளை நீங்கள் கேட்கலாம்!  நம்மை இஸ்ரவேல் மக்களைப் போல அவருக்கு சுதந்தரமான ஜனமாகவும், பிரித்தெடுக்கப்பட்ட ஜனமாகவும், தெரிந்து கொண்டதால்தான் இந்த அனுபவங்கள். அவருக்காக சாட்சியாக, பிரித்தெடுக்கப்பட்ட வாழ்க்கை வாழ இவை உதவுகின்றன. சாத்தான் எங்களையும் எங்கள் ஊழியத்தையும் அழித்துவிட நினைத்தான் ஆனால் வெற்றி பெறமுடியவில்லை! அவன் கர்த்தர் மேல் எங்களுகிருந்த வாஞ்சையை அழித்துவிட நினைத்தான், ஆனால் கர்த்தரோ எங்களோடிருந்து தம் அன்பை வெளிப்படுத்தியதால் நாங்கள் அவரை அதிகமாக நேசித்தோம்!

அன்பின் தேவனுடைய பிள்ளையே! கர்த்தர் உன்னை இருப்புக்காளவாய் அனுபவத்தின்மூலமாக, துன்பத்தில் வாடும் மற்றவர்களை உற்சாகப்படுத்தும், ஜெபிக்கும், ஊழியத்துக்காக உன்னை ஆயத்தப்படுத்திக் கொண்டிருக்கலாம்!!

பின்வரும் வரிகளை சிந்தித்துப்பார்! நம்மைப்போன்ற மற்ற விசுவாசிகளின் அனுபவங்கள் இவை! நீ கலங்காதே! எல்லாம் நன்மைக்கேதுவாகவே முடியும்.

கர்த்தரிடம் நான் மலர்களைக் கேட்டேன், கர்த்தரோ முள்ளுள்ள கத்தாழையைக் கொடுத்தார்!

கர்த்தரிடம் வண்ணத்துபூச்சிகளைக் கேட்டேன், கர்த்தரோ அருவருப்பான புழுக்களைக் கொடுத்தார்!

நான் துக்கத்தில் அழுதேன்! புரண்டேன்! கர்த்தர் என்னை நேசிக்கவில்லையோ என்று கதறினேன்!

பலநாட்களுக்கு பின்னர் ஒருநாள்,

முள்ளுள்ள கத்தாழையில் மலர்களைக் கண்டேன்! எத்தனை அருமை!

அருவருப்பாயிருந்த புழுக்கள் வண்ணத்துப்பூச்சிகளாய் மாறி என்னை சுற்றிவந்தன!

என் நேசரின் வழி மாறாக இருந்தாலும், அவர் எனக்கு நன்மையையே நினைத்திருக்கிறார் என்பதை புரிந்துகொண்டேன்!

உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

மலர் 6 இதழ்: 398 – இயேசுவின் நாமமே பலத்த துருகம்!

  உபாகமம்: 4: 41, 43 ”முற்பகையின்றிக் கைப்பிசகாய்ப் பிறனைக் கொன்றவன் அடைக்கலப்பட்டணங்களில் ஒரு பட்டணத்தில் தப்பியோடிப்போய் பிழைத்திருக்கும்படியாக,..

மூன்று பட்டணங்களை மோசே யோர்தானுக்கு இப்புறத்தில் சூரியோதய திசையில் ஏற்படுத்தினான்.

நான் அதிகமாக சரித்திர புத்தகங்களை விரும்பி வாசித்திருக்கிறேன். சரித்திரப்பூர்வமான இடங்களைப் பார்ப்பதும் எனக்கு மிகவும் பிடிக்கும். பள்ளிக்கூட நாட்களில் போன உல்லாசப்பயணங்களில், ராஜாக்கள் தம்முடைய நாட்டைப் பாதுகாக்கக் கட்டிய கோட்டைகள் தான் எப்பொழுதும் என் மனதில் நிற்கும். அந்தக் கோட்டைகளைப் பார்க்கும்போது அந்த நாட்டின் ஜனங்கள் எப்படியாக பாதுகாப்பாய் இருந்திருப்பார்கள் என்று யோசிப்பேன். இன்று நமக்கு அவை சரித்திரமாக இருந்தாலும், அந்தநாட்களில் அவர்களுக்கு அதுவே இரட்சிப்பு. எதிரிகள் அணுகும்போது அவர்கள் அந்தக் கோட்டைக்குள் தஞ்சம் புகுவார்கள்.

இஸ்ரவேல் நாட்டில் பிரயாணம் பண்ணினபோது ஏரோது ராஜாவினால் கட்டப்பட்ட “மசாடா” (கோட்டை) என்ற மலைக்கோட்டையைப் பார்க்க சென்றோம். அங்கே அவர்கள் எதிரிகள் அந்த மலையின்மேல் ஏறினால் அவர்கள்மேல் உருட்டிவிட பெரிய கற்களை அடுக்கி வைத்திருந்தார்கள். எதிரிகளிடம் இருந்து பாதுகாப்பையும் அடைக்கலத்தையும் கொடுத்தவை இப்படிப்பட்ட கோட்டைகள் தான்.

வேதாகமத்தில் கர்த்தர் மோசேயிடம் இப்படிப்பட்ட மூன்று அடைக்கலப்பட்டணங்களை ஏற்படுத்துமாறு கட்டளைக் கொடுக்கிறார். இவை தெரியாத்தனமாக மகா பெரிய குற்றத்தில் மாட்டிகொண்ட மக்களை, மற்றவர்களுடைய பழிவாங்குதலிருந்து காப்பாற்றி அடைக்கலம் கொடுக்கவே கர்த்தர் எடுத்த முடிவு. அப்படிப்பட்டவர்கள் ஓடி அந்தப் பட்டணங்களில் புகுந்துகொண்டால் அவர்கள்மேல் யாரும் கைவைக்க முடியாது. தேவனாகிய கர்த்தர் பூமியில் வாழும் ஜனங்கள்மேல் எவ்வளவு அக்கறையுள்ளவர் என்று நமக்கு இதன்மூலம் விளங்கும்.

இதைப்பற்றி வாசிக்கும்போது, நீதிமொழிகளில் சாலொமோன் ராஜா சொன்ன இந்த வசனம் என்னை ஆழமாக சிந்திக்க வைத்தது, ”கர்த்தரின் நாமம் பலத்த துருகம்; நீதிமான் அதற்குள் ஓடிச் சுகமாயிருப்பான்” (நீதி: 18:10). இது நமக்காக கர்த்தர் ஏற்படுத்தியிருக்கிற  அடைக்கலப்பட்டணம்.  கர்த்தருடைய பிள்ளைகளாகிய நமக்கு எதிரியாகிய சாத்தானிடமிருந்து தாக்குதல்கள் ஒவ்வொருநாளும் வெவ்வேறு திசைகளிலிருந்தும் வரும். அந்த நேரத்தில் கர்த்தர் , ”நான் உனக்கு அடைக்கலமும், அரணான கோட்டையுமாயிருக்கிறேன். என்னிடம் வந்து அடைக்கலம் பெற்றுகொள்” என்று சொல்லுகிறார். அவருடைய செட்டைகளுக்குள் நமக்கு பாதுகாப்பு உண்டு.

ஆனால் நம்மில்  அநேகருக்கு கர்த்தருடைய நாமம் பலத்த துருகமாயிருப்பதற்கு பதிலாய் ஆஸ்தியும் அந்தஸ்தும்தான் நமது துருகமாயிருக்கிறது! நீதிமொழிகள் 18 ம் அதிகாரம் 11 வது வசனத்தை நாம் தொடர்ந்து வாசித்தால் சாலொமோன் ராஜா   ”ஐசுவரியவானுடைய பொருள் அவனுக்கு அரணான பட்டணம்; அது அவன் எண்ணத்தில் உயர்ந்த மதில் போலிருக்கும்” என்று சொல்லுகிறான்.

எப்படிங்க! இன்றைக்கு பணம் இல்லையானால் எப்படி வாழமுடியும்? ஒரு சுகமான வாழ்க்கை வேணும்னா பணம் இல்லைனா எப்படிங்க? ஒரு ஆபத்துன்னா உதவுகிறது பணம்தானே! ஒரு நல்ல ஆஸ்பத்திரிக்கு போகணும்னா பணம் வேணும்! ஒரு நல்ல வக்கீலைப் பார்க்கணும்னா பணம் வேணும்! பணம் பத்தும் செய்யும்! என்று நம்மில் பலர் கணக்குபோடுவது தெரிகிறது.

விசேஷமாக இன்று உலகநாடுகளின் பொருளாதார நிலைமை மோசமாகிக் கொண்டிருக்கும்வேளையில் பணத்தை சேர்த்து வைத்திருப்பவர்கள் அதைத் தங்கள் அரணான கோட்டையாக நம்புகிறார்கள்!

இன்று நீ அச்சடிக்கப்பட்ட காகிதத்தையும், பட்டறையில் உருக்கிய வெள்ளியையும், பொன்னையும் அரணான கோட்டையாக எண்ணுகிறாயா? அல்லது சாலொமோன் ராஜாவைப் போல கர்த்தருடைய நாமத்தை பலத்த துருகமாக, அரணான கோட்டையாக எண்ணுகிறாயா?

இயேசு கிறிஸ்து என்ற நாமமே நமக்கு பலத்த துருகம்! நம்பி அவரண்டை வா!

நாம் அதற்குள் எந்த ஆபத்தும் அணுகாமல் சுகமாயிருப்போம் என்பது தேவனாகிய கர்த்தர் நமக்கு கொடுத்திருக்கிற வாக்குத்தத்தம்!

உங்கள் சகோதரி,

பிரேமா சுந்தர் ராஜ்

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் எழுதுங்கள்!

 

மலர் 6 இதழ்: 397 – உனக்காக வேறொரு திட்டமொன்று!

 உபாகமம்: 3: 23 -27 ”அக்காலத்திலே நான் கர்த்தரை நோக்கி;

கர்த்தராகிய ஆண்டவரே நீர் உமது அடியானுக்கு உமது மகத்துவத்தையும், உமது வல்லமையுள்ள கரத்தையும் காண்பிக்கத் தொடங்கினீர்; வானத்திலும் பூமியிலும் உம்முடைய கிரியைகளுக்கும், உம்முடைய வல்லமைகளுக்கும் ஒப்பாக செய்யத்தக்கவன் யார்?

நான் கடந்துபோய் யோர்தானுக்கு அப்புறத்திலுள்ள அந்த நல்ல தேசத்தையும் அந்த நல்ல மலையையும், லீபனோனையும் பார்க்கும்படி உத்தரவு கொடுத்தருளும் என்று வேண்டிகொண்டேன்.

கர்த்தரோ உங்கள் நிமித்தம் என்மேல் கோபங்கொண்டு எனக்கு செவிகொடாமல் என்னை நோக்கி; போதும் இனி இந்தக் காரியத்தைக் குறித்து என்னோடே பேசவேண்டாம்,…………உன் கண்களினாலே அதைப் பார், இந்த யோர்தானை நீ கடந்து போவதில்லை”.

என்னைப் பொறுத்தவரை இதுதான் கரத்தருக்கும், அவருடைய தாசனாகிய மோசேக்கும் இடையில் நடந்த வேதனையான உரையாடலாக இருந்திருக்கும்.

நாற்பது வருடம், பெரிய பாடுபட்டு, பல்லாயிரக்கணக்கான இஸ்ரவேல் மக்களை யோர்தான் அருகே கொண்டுவந்து சேர்த்தாயிற்று. எத்தனை வேதனை! எத்தனை சோர்பு! எத்தனை எதிரிகள்! எத்தனை முறுமுறுப்பு! இவற்றையெல்லாம் தாண்டி யோர்தானுக்கு இக்கரையில் வந்தாயிற்று! இனி சில மைல் தூரம் தான் கானானுக்குள் பிரவேசித்துவிட்டால் நமக்கு இளைப்பாறுதல் தான்! என்ற பெரிய ஆவலோடு மோசே கர்த்தரைப் பார்த்து நான் கடந்து போய் அந்த நல்ல தேசத்தைப் பார்க்க உத்தரவு கொடும் என்று கேட்டான். கர்த்தரோ இனி இதைப் பற்றி என்னிடம் பேசாதே என்றார்.

என்ன காரணம்?  நாற்பது வருட வனாந்தரத்தில் மோசே சில நேரங்களில் பொறுமையிழந்து போய்விட்டான்! மனித கண்ணோடு பார்க்கும்போது இவ்வளவு கஷ்டங்களை அனுபவித்த ஒரு மனிதன், நாற்பது வருடங்கள் தலைசாய்க்க இடமில்லாமல் நாடோடியாய் அலைந்தவன், ஒருசில சிறிய தவறுகள் செய்ததால் கர்த்தர் இவ்வளவு பெரிய தண்டனையைக் கொடுக்கலாமா என்று தோன்றவில்லையா? இனி இதைப் பற்றிப் பேசாதே என்று வாயடைத்துவிட்டாரே! நாற்பதுவருட உழைப்பினால் என்ன பலன்?

எத்தனைமுறை நாம் இப்படி சிந்தித்திருக்கிறோம்? நான் எத்தனை கஷ்டங்களை தாங்கிக்கொண்டு அவருக்காக வாழ்கிறேன். ஏன் என் வேண்டுதலை மறுத்துவிட்டார்! என் விண்ணப்பம் ஏன் அவர் செவிகளில் விழவில்லை? அவர் என்னை நேசிக்கவில்லையா? என்றெல்லாம் எண்ணும் வேளை உன் வாழ்க்கையில் வந்திருக்கலாம்!

இவற்றைப்பற்றி சிந்திப்பதற்கு முன்னால், ஒரு காரியத்தை சிந்தித்து பாருங்கள்! சில நேரங்களில் நாம் குடும்பத்தின் நலனுக்காக நாம் எடுக்கும் முடிவுகள் முதலில் எல்லோர் கண்ணுக்கும் தவறாகப் படும், பின்னர் என்றாவது ஒருநாள் நாம் அவர்கள் மேல் வைத்த அன்பினால் தான் இந்த முடிவு எடுத்தோம் என்று உணர்வார்கள். என்னுடைய அப்பா எடுத்த முடிவு எனக்கு கடுமையாகத் தெரிந்தது ஆனால் இன்று நான் இந்த நிலைமைக்கு உயர அவர்கள் தான் காரணம் என்று எத்தனை பிள்ளைகள் தங்கள் பெற்றோரைப்பற்றி பேசுகின்றனர்.

இதைத்தான் கர்த்தரும் செய்தார். ஒருவேளை அவர் எடுத்த இந்த முடிவு நமக்கு கடுமையாக தெரியலாம் ஆனால் அது கர்த்தர் மோசேயை அதிகமாக நேசித்ததால் எடுத்த முடிவே தவிர மோசேக்கு கொடுத்த தண்டனை அல்ல.

மோசேயுடைய குணத்தை விளக்க, யாத்திராகமம் 32 ம் அதிகாரத்தில் நடந்த ஒரு சம்பவத்தை உங்களுக்கு ஞாபகப்படுத்துகிறேன்! மோசே சீனாய் மலையிலிருந்து வர சற்று தாமதித்தபோது இஸ்ரவேல் மக்கள் ஆரோனை வற்புறுத்தி தங்களுக்கு ஒரு பொன் கன்றுக்குட்டியை வார்ப்பித்து அந்த விக்கிரகத்தை வணங்க ஆரம்பித்தார்கள். கர்த்தர் அவர்கள் மேல் கோபங்கொண்டு அவர்களை சங்கரிக்க கட்டளையிட்டார். மோசே மலையின் மேல் ஏறி கர்த்தாவே உமக்கு எதிராக பாவம் செய்த இந்த ஜனங்களை மன்னியும், இல்லாவிட்டால் என் பேரை உம்முடைய புஸ்தகத்திலிருந்து கிறுக்கிப்போடும் என்றான்.

ஒரு நிமிடம்! இதை உங்களாலும் என்னாலும் சொல்ல முடியுமா? ஆண்டவரே என் பக்கத்துவீட்டுகாரன் விக்கிரகத்தை வணங்குகிறான், அவனை மன்னித்துவிடும், இல்லாவிடில் என் பேரை ஜீவபுத்தகத்திலிருந்து எடுத்து பொடும் என்று சொல்லுவோமா? என்னால் நிச்சயமாக முடியாது!

மோசேயுடைய இந்த செயல் அவன் கர்த்தருடைய ஜனமாகிய இஸ்ரவேலை, முரட்டாட்டமும், முறுமுறுப்பும் கொண்ட மக்களை, எவ்வளவாய் நேசித்தான் என்று காட்டுகிறது!. பாவிகளை நேசிக்கும் இந்த குணம், தேவனாகிய கர்த்தர் நம்முடைய பெலவீனங்களுக்கு மத்தியில் நம்மை நேசிக்கிறாரே அப்படிப்பட்ட தெய்வீக குணம் மோசேக்கு எப்படி வந்தது? அவன் கர்த்தரோடு முகமுகமாய் பேசி அவரோடு கொண்டிருந்த உறவினால்தான்!  அவரோடு நெருங்கி ஜீவித்ததால்தான் கர்த்தருடைய மட்டற்ற அன்பை அவனால் பிரதிபலிக்க முடிந்தது!

கர்த்தரை முகமுகமாய் அறிந்தவனைப் பார்த்து, கர்த்தர் நீ கானானுக்குள் பிரவேசிப்பதில்லை என்றபோது அவன் திடுக்கிடவில்லை! அவர் என்னை நேசிக்கவில்லை என்று முகத்தை தூக்கவில்லை! கர்த்தர் எடுத்த முடிவின் மேல் ஒரு துளிகூட சந்தேகமில்லை! ஒரு நண்பரோடு பேசுவதுபோல பேசினான்! அவர் தன்னை அதிகமாக நேசிப்பது அவனுக்குத் தெரியும்! கர்த்தர் தனக்கு இதைவிட பெரிய காரியத்தை செய்வார் என்றுதான் விசுவாசித்தான்.. ஆம்! கர்த்தர் தாம் நேசித்த தம்முடைய தாசனாகிய மோசேக்கு உலகப் பிரகாரமான கானான் தேசத்தை அல்ல! பரம கானானையே கொடுத்தார்!

தேவனுடைய பிள்ளைகளே! இன்று ஒருவேளை உன் உள்ளத்தின் ஆசையை கர்த்தர் கொடுக்கவில்லை என்று ஆதங்கப்பட்டுக் கொண்டிருக்கலாம். ஏன் என்னை கானானுக்குள் பிரவேசிக்க செய்யவில்லை? கர்த்தர் என்னை நேசிக்கவில்லையா? என்று எண்ணலாம். கர்த்தர் உன்னை அதிகமாக நேசிப்பதால்  உனக்காக உன்னத திட்டமொன்றை வைத்திருகிறார்! நீ நினைப்பதற்கு மேலாக உன்னை ஆசிர்வதிப்பார்!

அநாதி சிநேகத்தால் உன்னை சிநேகித்தேன், காருணியத்தால் உன்னை இழுத்துக் கொள்ளுகிறேன்” (எரே::31:3 ) என்கிறார்.

அவருடைய அன்பை அளவிடாதே!

உங்கள் சகோதரி

பிரேமா சுந்தர் ராஜ்

 

 

 

 

மலர் 6 இதழ் 396 – கடந்து வந்த பாதையை திரும்பிப் பார்!

 உபாகமம்:2:7 ”உன் தேவனாகிய கர்த்தர் உன் கைக்கிரியைகளிலெல்லாம் உன்னை ஆசிர்வதித்து வருகிறார். இந்த பெரிய வனாந்தரவழியாய் நீ நடந்து வருவதை அறிவார். இந்த நாற்பது வருஷமும் உன் தேவனாகிய கர்த்தர் உன்னோடே இருந்தார். உனக்கு ஒன்றும் குறைவுபடவில்லை..”

நேற்று நாம் உபாகமம் புத்தகத்தை ஆரம்பித்தோம். இந்த புத்தகம் இஸ்ரவேல் மக்களின் பிரயாணத்தை சரித்திரபூர்வமாக விளக்கும் புத்தகம் மாத்திரம் அல்ல, வல்லமையுள்ள தேவ மனிதனான மோசேயின் ஆவிக்குரிய பிரயாணத்தின் நாட்குறிப்பும்கூட என்று பார்த்தோம்.

 அன்றன்று கர்த்தர் கொடுக்கும் செய்தியை தியானமாக எழுதுவது என் வழக்கம். இன்றைய தியானத்துக்காக ஜெபத்தோடு இந்த புத்தகத்தை படிக்க ஆரம்பித்தபோது இந்த வசனம் கண்களில் பட்டது. இந்த வசனத்தை கர்த்தர் எனக்காகவே காண்பித்தார். ஏனெனில் நான் இதை எழுத ஆரம்பிக்கும்முன் வரவு செலவு கணக்குகளைப் பார்த்து விட்டு கலங்கிப்போயிருந்தேன்!

நம் எல்லோருக்கும் ஒவ்வொரு மாதமும் கவலைப்பட வைக்கும் அநேக செலவுகள் உண்டு. குழந்தைகள், வயதானவர்கள், சுகவீனமானவர்களை கவனிப்பது, எதிர்பார்க்காத செலவுகள், எதிர்பார்த்தற்கு மேலான செலவுகள் என்று ஏதாவது ஒன்று நடந்து நம்மை அதிர்சியிலும் கவலையிலும் ஆழ்த்தும்.

அப்படிப்பட்ட பார சுமையோடு நான் அமர்ந்திருந்தபோது உபாகமம் புத்தகத்திலிருந்து தேவனாகிய கர்த்தர் தம் தாசனாகிய மோசேயிடம் கூறிய இந்த வார்த்தைகள், கோரமான வெயிலினால் வாடிய மலரின்மேல் வானிலிருந்து விழுந்த பனித்துளி போல் இருந்தது. உண்மையை சொல்லப்போனால் கண்களில் நீர் பெருகியது.

உபாகமத்தில் மறைந்து கிடந்த இந்த முத்துக்கள் மூலம், கர்த்தர் என்னோடு பேசி, உனக்கு ஏதாவது குறை நான் வைத்திருக்கிறேனா?  உன் கையின் பிரயாசங்களையெல்லாம் ஆசிர்வதித்தேன். நீ நடந்து வரும் பாதையை அறிவேன். கடந்த 43 வருட கிறிஸ்தவ பிரயாணத்தில் நான் உன்னோடேகூட இருக்கிறேன். உனக்கு என்ன குறை வைத்தேன்? என்று கேட்பது போல இருந்தது. கடந்துவந்த பாதையை நினைவுகூறும்போது கர்த்தர் ஒருநாளும் எங்களை கைவிட்டதே இல்லை என்று திட்டமாக கூறமுடியும்.

தேவனுடைய தாசனாகிய மோசே தன்னுடைய நாற்பதுவருட அனுபவங்களை திரும்பி பார்க்க ஆரம்பித்தபோது, பரமபிதாவானவர் தாம் அவர்களோடு வனாந்தர பிரயாணம் முழுவதும் இருந்ததை ஞாபகப்படுத்தினார். கர்த்தர் மோசேயிடம்,

”மோசே நீங்கள் வனாந்தரத்தில் நடந்த போதும், கல்லும் முள்ளுமான பாதைகளை கடந்த போதும், தண்ணீர் கசப்பாக இருந்தபோதும், எதிரிகள் தாக்கியபோதும், மனசோர்புகள் தாக்கியபோதும் நான் உங்கள் அருகாமையில் உங்களோடு கூட நடந்து வரவில்லையா? மோசே இன்னொன்றும் மறந்து போகாதே கடந்த நாற்பது வருடமும் நீங்கள் ஒன்றிலும் குறைவு படவில்லை.” என்று நினைவூட்டினார்..

மோசே ஜனங்களை நோக்கி இந்த நாற்பது வருஷமும் உன் தேவனாகிய கர்த்தர் உன்னோடே இருந்தார். உனக்கு ஒன்றும் குறைவுபடவில்லை, என்று நினைவூட்டினான்.

இவரே நம் தேவன்!  காட்டு புஷ்பங்களை உடுத்துவிக்கிறவர்! ஆகாயத்துப் பறவைகளைப் போஷிக்கிறவர்! உங்களுடைய தேவைகளை அறிந்தவர்! உன் வாழ்வில் குறைகள் உண்டா? பாரங்கள் உண்டா? தேவைகள் உண்டா? அவற்றையெல்லாம் கர்த்தரிடம் ஒப்புக்கொடுத்திருக்கிறாயா? இனி அவர் உனக்காக கவலைப்படுவார்! நீ கவலைப்படத் தேவையில்லை!

 ஏன் வருகிற மாதத்தைக் குறித்து கவலைப்படுகிறாய்? ஏன் எதிர்காலத்தைக் குறித்து கலங்குகிறாய்?? கடந்து வந்த பாதையை நினைத்துப்பார்! அவர் உன்னோடு நடந்து கொண்டிருப்பதை உணர்வாய்! அவர் என்றுமே உன்னை விட்டு விலகினதில்லை!

அவர் உங்களை விசாரிக்கிறவரானபடியால் உங்கள் கவலைகளையெல்லாம் அவர் மேல் வைத்துவிடுங்கள். ( 1 பேது: 5:7 )

 

உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் premasunderraj@gmail.com என்ற முகவரிக்கு அனுப்புங்கள்

மலர் 6 இதழ் 395 – சித்திரமும் கைப்பழக்கம்!

 

உபாகமம்: 1:4 ”நாற்பதாம் வருஷம், பதினோராம் மாதம் முதல் தேதியிலே, மோசே இஸ்ரவேல் புத்திரருக்குச் சொல்லும்படி தனக்கு கர்த்தர் விதித்த யாவையும் அவர்களுக்குச் சொன்னான்…”

இன்று நாம் உபாகமம் புத்தகத்தை ஆரம்பிக்கிறோம். இந்த புத்தகத்தை நாம் படிக்கும்போது கர்த்தர் தாமே நம்மோடுகூட இருக்க ஜெபிப்போம்.

சித்திரமும் கைப்பழக்கம் என்ற வாசகத்தைக் கேள்விப்பட்டிருக்கிறீர்களா? எந்த ஒரு கலையும் பல நாட்கள் கடின முயற்சியோடு, பயிற்சி எடுத்தபின் தான் நமக்கு சிறப்பாக வரும். ஒரு கோடு அல்லது வட்டம் சரியாக போடத்தெரியாதவர்கள் எப்படி முகத்தை சரியாக வரைய முடியும்?

ஒரு சாதாரண கலைக்கு அல்லது பொழுதுபோக்குக்கு கடின பயிற்சி தேவை என்று சொல்லுகிறோம் ஆனால் ஆவிக்குரிய வாழ்க்கையில் மாத்திரம் ஒரே ராத்திரியில் நாம் மறுரூபமடைந்து விடலாம் என்று நினைக்கிறோமே அது சரியா? நாம் இயேசு கிறிஸ்துவுக்கு நம் வாழ்வில் இடம் கொடுத்தவுடனே நமக்குள் ஏதோ மாஜிக் நடந்துவிட்டதாக நினைப்பு! வேதாகமத்தில் நாம் காணும் வல்லமையான தேவபிள்ளைகள் யாரும் தங்கள் வாழ்க்கையில் சுலபமாக அந்தநிலையை வந்தடையவில்லை! சிலர் வாழ்நாள் முழுவதும் இதற்காக உழைக்கவேண்டியதிருந்தது.

இதைத்தான் நாம் வேதத்தில் ஐந்தாவது புத்தகமாக இடம் பெற்றிருக்கும் உபாகமம் புத்தகத்திலிருந்து படிக்கப்போகிறோம்.! இந்த புத்தகம் வாசிக்கும்போது நாற்பது வருடங்கள் வனாந்தரத்தில் அலைந்து திரிந்து வாக்குத்தத்தம் பண்ணப்பட்ட கானானுக்குள் அடியெடுத்து வைத்த இஸ்ரவேல் மக்களின் நீண்ட பிரயாணத்தின் தினசரி நாட்குறிப்பு போல தோன்றும்.

இந்த புத்தகத்தில் மோசே தங்களது நாற்பது வருட அனுபவங்களை சரித்திரப்பூர்வமாகவும், தங்களுடைய வெற்றி தோல்விகளை ஒவ்வொன்றாகவும் வெளிப்படுத்துகிறார். அதை வாசிக்கும்போது இஸ்ரவேல் மக்களும், தானும் ஆவிக்குரிய வாழ்க்கையிலும் எவ்வளவு பெலவீனராக இருந்ததையும் தெளிவாக கூறுகிறார்.

எகிப்து தேசத்தில் பார்வோன் குமாரத்தியின் வளர்ப்பு மகனாக வளர்ந்த மோசே நாற்பது வருடங்கள் எகிப்தின் ராஜகுமாரனுக்கேற்ற விசேஷ கல்வியிலும், கலைகளிலும் பயிற்சி பெற்றிருந்தார். ஆனாலும் அவருக்கு கர்த்தரைப்பற்றிய ஞானம் குறைவாகவே இருந்தது.

அதனால் கர்த்தர் மோசேயுடைய சில முட்டாள்தனமான செய்கைகளை உபயோகப்படுத்தி மீதியான் தேசத்து வனாந்தரத்தில் நாற்பது வருடங்கள் அலையவிட்டார். அங்கே கர்த்தர் அவருக்கு கொடுத்த கடின பயிற்சிக்கு பின்னால் தம்மை ஆபிரகாமின் தேவனாகவும், ஈசாக்கின் தேவனாகவும், யாக்கோபின் தேவனாகவும் வெளிப்படுத்தினார். கர்த்தர் மோசேயை இஸ்ரவேல் மக்களை எகிப்தின் அடிமைத்தனத்திலிருந்து வெளியே வழிநடத்தும் மகாபெரிய ஊழியத்துக்கும் அழைத்தார்.

இந்த வனாந்தரத்தில் அவருக்கு கொடுக்கப்பட்ட பயிற்சியானது அவருக்கு கர்த்தரோடு முகமுகமாய் பேசவும், அவருடைய வாழ்நாளில் எஞ்சியுள்ள நாற்பதுவருடங்கள், கடின இருதயமுள்ள பார்வோனின் முன்பு நின்று அற்புதங்களை செய்யவும், வணங்கா கழுத்துள்ள இஸ்ரவேல் மக்களை எகிப்தின் வனாந்தரங்களில் வழிநடத்தவும் ஒரு அடிப்படை பயிற்சியாகும். இத்தனை கடினமான பயிற்சிக்கு பின்பும், தன்னுடைய வாழ்நாள் முழுவதும் மோசே கற்றுக்கொள்ள வேண்டியதாயிருந்தது.

உபாகமம் கடைசி அதிகாரத்தில் “ கர்த்தரை முகமுகமாய் அறிந்த மோசேயைப் போல ஒரு தீர்க்கதரிசியும் இஸ்ரவேலில் அப்புறம் எழும்பினதில்லை” (உபா:34:12) என்று அவரைப் பற்றி வேதம் சாட்சி கொடுக்கிறது.

மோசே எகிப்தின் ராஜகுல வாழ்க்கையிலிருந்து மீதியான் தேசத்துக்கு ஓடியதிலிருந்து, மோசேயை ஒரு ஆவிக்குரிய வல்லவனாக்க கர்த்தர் எடுத்துக்கொண்ட காலம் எண்பது வருடங்கள்!

உபாகமம் இஸ்ரவேல் மக்களின் ஒரு பிரயாண நாட்குறிப்பு மட்டும் அல்ல மோசேயின் ஆவிக்குரிய பிரயாண நாட்குறிப்பும்கூட. கர்த்தருக்கு ஸ்தோத்திரம்! மோசே தன்னுடைய ஆவிக்குரிய வாழ்க்கை ஆரம்பித்த இடத்தில் நிற்கவில்லை! ஆவிக்குரிய வாழ்க்கையும் ஒரு நீண்ட பிரயாணம் தான் என்று நமக்கு எடுத்துக் காட்டியிருக்கிறார்.

இந்தப் பிரயாணத்தில் வெயிலும் உண்டு நிழலும் உண்டு! மலைகளும் உண்டு, பள்ளத்தாக்குகளும் உண்டு! பாடலும் உண்டு! அழுகையும் உண்டு! யுத்தமும் உண்டு, வெற்றித் தோல்விகளும் உண்டு! வெட்டுக்கிளிகளும் உண்டு! இராட்சதரும் உண்டு!

இந்தப் பிரயாணத்தில் இன்று நாம் எங்கேயிருந்தாலும் சரி, மலையிலோ அல்லது பள்ளத்தாக்கிலோ, கர்த்தருடைய சித்தமான இடத்தில், கர்த்தருடைய வழிநடத்துதலுக்குள் இருக்கிறோமா என்பதுதான் முக்கியம்!

உன்னுடைய ஆவிக்குரிய வாழ்க்கையில் இன்று நீ எங்கேயிருக்கிறாய்? நீ நேற்று இருந்த இடத்தில் இன்று நிற்காதே! கிறிஸ்துவை நோக்கியவாறு முன்னேறு!

உங்கள் சகோதரி,

பிரேமா சுந்தர் ராஜ்

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி!  இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். உங்கள் கருத்துகளைத் தவறாமல் premasunderraj@gmail.com என்ற முகவரிக்கு அனுப்புங்கள்!

 

மலர் 6 இதழ் 394 – இதுவரை ஒன்றுமே கேட்கவில்லையே!

 எண்ணா: 27:4  ”……எங்கள் தகப்பனுடைய சகோதரருக்குள்ளே எங்களுக்கு காணியாட்சி கொடுக்கவேண்டும் என்றார்கள்.”

’வாய் உள்ள பிள்ளைதான் பிழைக்கும்’ என்ற பழமொழி தெரியுமா? எத்தனை முறை நாம் வாய் திறந்து கேட்காதால், நமக்கு வந்து சேரவேண்டியவை வராமல் போய்விட்டன. இது நம் எல்லோருடைய வாழ்க்கையிலும் நடப்பது தானே!                                                                                                    கேட்பது என்ற வார்த்தைக்கு எபிரேய மொழியில் பிரசுரித்தல் என்று அர்த்தம் உண்டு! இதைத்தான் செலோப்பியாத்தின் ஐந்து குமாரத்திகளும் செய்தனர்.

அவர்களுடைய வாழ்க்கையிலிருந்து கடந்த நாட்களில் சில அருமையான காரியங்களை நாம் படித்தோம்!

அவர்கள் கர்த்தருடைய சபைக்கு முன்பாகவும், மோசேக்கு முன்பாகவும், பிரபுக்களுக்கு முன்பாகவும் தைரியமாக வந்து நின்று தங்கள் பிரச்சனையை தெளிவாக எடுத்துரைத்தனர் என்று பார்த்தோம். ஆண்வாரிசு இல்லாமல் விட்டு சென்ற தங்களுடைய தகப்பன் பேர் அநியாயமாக அழியாமலிருக்க தங்களுக்கு சொத்துரிமை வேண்டும் என்று குரல் கொடுத்தனர். அவர்களுடைய விண்ணப்பத்தை மோசே கர்த்தரிடம் எடுத்து சென்றார். கர்த்தர் அவர்கள் கேட்டது சரிதான், அவர்களுக்கு நியாயம் வழங்கு என்று கட்டளையிட்டார் என்று பார்த்தோம்.

இன்றைக்கு நாம் இந்த சகோதரிகளின் வாழ்க்கையிலிருந்து கடைசியான ஆனால் மிகவும் முக்கியமான பாடத்தைப் படிக்கப்போகிறோம்!

அந்த சகோதரிகள் வாயைத்திறந்து தங்கள் தேவையை கேட்காமல் இருந்திருந்தால் இன்று அவர்களைப்பற்றி நாம் வேதத்திலிருந்து படித்துக்கொண்டிருக்க மாட்டோம். அவர்கள் கேட்டதே, பதில் என்ற கதவைத் திறக்கும் திறவுகோலாயிற்று!

நாம் இன்னும் கேட்காத விண்ணப்பங்களுக்கு பதில் பரலோகத்தில் காத்துக் கொண்டிருக்கிறது என்று பில்லி கிரஹாம் அவர்களின் புத்தகத்தில் வாசித்தேன். அதை வாசித்தபோது, இவை எனக்கு தேவை என்று கர்த்தருக்கு தெரியும் அல்லவா? அப்படியானால் நான் ஏன் கேட்கவேண்டும்? அவரே அதை எனக்கு கொடுத்துவிடக் கூடாதா? என்று மனது கூறியது. அதனால் நான் வேதத்தை எடுத்து கர்த்தராகிய இயேசு கிறிஸ்து ‘கேளுங்கள்’ என்று நமக்கு கட்டளையிட்ட 30 க்கும் மேற்பட்ட வசனங்களை வாசித்தேன். இவற்றில் கர்த்தர் கூறிய இந்த வசனம் என் உள்ளத்தைத் தொட்டது.

யோவான்:16:24 இதுவரைக்கும் நீங்கள் என் நாமத்தினாலே ஒன்றும் கேட்கவில்லை; கேளுங்கள், அப்பொழுது உங்கள் சந்தோஷம் நிறைவாயிருக்கும்படிக்கு பெற்றுக்கொள்வீர்கள்.

இதுவரைக்கும் நீ ஒன்றுமே கேட்கவில்லை, கேள் அப்பொழுது நிறைவாகப் பெற்றுக்கொள்வாய் என்று என்னை நோக்கிக் கூறுவது போலிருந்தது.

நாம் பரலோகத்தை நோக்கி நம் இருதயத்தின் வாஞ்சைகளை, விண்ணப்பங்களை ஏறெடுக்கும்போது, நம்முடைய சந்தோஷம் நிறைவாகும்படி, அவர் நமக்கு பதிலளிப்பார்! என்ன அற்புதமான வாக்குத்தத்தம்!  அதுமட்டுமல்ல! அவர் நம்மைக் கேட்க சொல்லுவது நம்முடைய தேவைகளை அறிந்து கொள்ள அல்ல! அவற்றை அவர் நன்கு அறிவார்! ஆனாலும் நம் அன்றாடத் தேவைகளை அவருக்கு நாம் தெரியப்படுத்த வேண்டுமென்று விரும்புகிறார்! இது அன்றாடம் சரீரத்திற்காக நாம் செய்யும் உடற்பயிற்சி போல ஆவிக்குரிய பயிற்சியாகும்!

செலோப்பியாத்தின் ஐந்து குமாரத்திகளும் எபிரேயர் 4:16 பவுல் கூறியவிதமாக, ”ஆதலால் நாம் இரக்கத்தைப் பெறவும், ஏற்ற சமயத்தில் சகாயஞ்செய்யும் கிருபையை அடையவும், தைரியமாக் கிருபாசனத்தண்டையிலே சேரக்கடவோம்

என்று, தைரியமாக தேவனுடைய கிருபாசனத்தண்டைக்கு வந்து தங்களுடைய விண்ணப்பத்தை தெளிவாக ஏறெடுத்து, கர்த்தர் வாக்குக்கொடுத்தபடியே அவர்கள் சந்தோஷம் நிறைவாயிருக்கும்படிப் பெற்றுக்கொண்டார்கள்.

இன்னும் நாம் கர்த்தருடைய சமுகத்துக்கு கொண்டுவராத தேவைகள் உண்டா? அதற்கு பதில் என்ற கதவின் திறவுகோல் உங்கள் கரத்தில்தான் இருக்கிறது!

”கேளுங்கள், அப்பொழுது உங்களுக்குக் கொடுக்கப்படும்; தேடுங்கள் அப்பொழுது கண்டடைவீர்கள்; தட்டுங்கள் அப்பொழுது உங்களுக்குத் திறக்கப்படும்.” மத்:7:7

இன்று உன்னுடைய தேவை என்ன? அவருடைய பிரசன்னமா? அவருடைய ஞானமா? அவருடைய வழிநடத்துதலா? அவருடைய கிருபையா?

நீ என்னிடத்தில் இவற்றில் எதுவுமே கேட்கவில்லையே! கேள்! உன் சந்தோஷம் நிறைவாகும்படி பெற்றுக்கொள்வாய்! என்று கர்த்தர் உரைக்கிறார்.

உங்கள் சகோதரி,

பிரேமா சுந்தர் ராஜ்

premasunderraj@gmail.com

 

பின்குறிப்பு: ஒவ்வொரு வாரமும் திங்கள் முதல் வெள்ளி வரை ‘ராஜாவின் மலர்கள்’ உங்களை வந்தடையும் படி தயவுசெய்து ‘subscribe’ என்ற இடத்தில் கிளிக் செய்து உங்கள் email id யை கொடுக்கவும்.

ராஜாவின் மலர்கள் மலரும் இந்த தோட்டத்துக்கு வந்தமைக்கு நன்றி. இதைப் பற்றி மற்ற நண்பர்களுக்கும், உறவினர்களுக்கும் கூறி அவர்களும் ஆசிர்வாதம் பெற உதவுங்கள். நன்றி.